«اتىراۋ وبلىسى سۋ ارناسى» كمك-نىڭ ءباسپاسوز قىزمەتىنەن ءمالىم ەتكەندەي, بۇعان جايىق وزەنىندە قابىرشاق مۇز قاتىپ, سۋ سوراتىن ستانسالاردىڭ جۇمىسىنا كەدەرگى كەلتىرگەن. سول سەبەپتەن, 9 جەلتوقساندا جەرگىلىكتى ۋاقىتپەن ساعات 23:30 شاماسىندا سۋ بەرۋ توقتاتىلعان.
«اۋا رايىنىڭ كۇرت سالقىنداۋىنان جايىق وزەنىندە مۇز قاتىپ, اعىس جىلدامدىعى تومەندەدى. وسىعان بايلانىستى اتىراۋ قالاسىنىڭ سۋ تازارتۋ كەشەنىنە سۋ بەرۋ توقتاتىلدى. ال 10 جەلتوقساندا تاڭعى ساعات 4:30-دا قالاداعى جەلىلەرگە توتەنشە جاعدايلاردى بولدىرماۋ ءۇشىن تومەن قىسىممەن سۋ بەرىلدى. «اتىراۋ-ماقات» ماگيسترالدىق قۇبىرىمەن, ونىڭ ىشىندە «بەرەكە» شاعىن اۋدانىنداعى توعىز قاباتتى ۇيلەرگە, كوكتەم, جۇلدىز-3, تەڭدىك, اقساي-1, اقساي-2 شاعىن اۋداندارىنا تەحنيكالىق سەبەپتەرگە بايلانىستى سۋ جىبەرىلمەدى», دەپ اقپارات تاراتتى كاسىپورىننىڭ ءباسپاسوز قىزمەتىنەن.
سۋسىز وتىرۋ كىمگە وڭاي دەيسىز؟ الەۋمەتتىك جەلىدەگى پاراقشالار مەن WhatsApp مەسسەندجەرىندەگى چاتتار تۇرعىنداردىڭ رەنىشىن بىلدىرگەن پىكىرىنە تولدى. ەل-جۇرتتىڭ بازىناسى قالالىق, وبلىستىق اكىمدىكتەرگە جەتكەنى داۋسىز. وبلىس اكىمدىگىندە قالىپتاسقان جاعدايعا بايلانىستى ارنايى كوميسسيا قۇرىلدى. كوميسسياعا جەتەكشىلىك ەتكەن وبلىس اكىمىنىڭ ورىنباسارى قايرات نۇرتاەۆ پەن اتىراۋ قالاسىنىڭ اكىمىنىڭ شاكىر كەيكين جايىق وزەنىنەن سۋ سوراتىن, تازالايتىن ستانسالاردىڭ جۇمىسىن قالپىنا كەلتىرۋدى قاداعالادى.
بىراق ماسەلەنىڭ وڭ شەشىمى وڭايلىقپەن تابىلا قويعان جوق. ويتكەنى 10 جەلتوقساندا جەرگىلىكتى ۋاقىتپەن ساعات 15:00-گە دەيىن ەكى سۋ تازارتۋ قوندىرعىسى مۇزدان تازارتىلىپ, ىسكە قوسىلعان. سول كەزدە سۇڭگۋىرلەر ءۇشىنشى سۋ تازارتۋ قوندىرعىسىن مۇزدان تازالاۋدى جالعاستىرىپ جاتتى. اۋا رايىنىڭ قۇبىلىسىن قالت جىبەرمەيتىن «قازگيدرومەت» رمك اتىراۋ وبلىستىق فيليالىنىڭ مالىمەتىنە سۇيەنسەك, سوڭعى اپتادا شىعىستان ەكپىندى جەل سوعىپ, كاسپي تەڭىزىنىڭ دەڭگەيى 40 سم-گە تومەندەگەن. بۇل جايىق وزەنىندە دە سۋ دەڭگەيىنىڭ تومەندەۋىنە اسەر ەتكەن.
ال «اتىراۋ وبلىسى سۋ ارناسى» كمك سۋ تازارتۋ قوندىرعىلارىنىڭ باسشىسى بوريس پەنكيننىڭ ايتۋىنشا, جايىق وزەنىندە قابىرشاق مۇزدىڭ تىعىز ماسساسى پايدا بولعان. مۇنداي قۇبىلىس شامامەن 20 جىلدان بەرى بايقالماعان.
«بيىل, ءتىپتى سوڭعى اپتادا جايىق وزەنىندەگى سۋ دەڭگەيىنىڭ كۇرت تومەندەگەنى بايقالدى. ماسەلەن, 9 جەلتوقساندا كەشكى بىرنەشە ساعاتتا سۋ دەڭگەيى 15-20 سم-گە تومەندەدى. كۇن كۇرت سۋىتىپ, وزەن بەتىندەگى ۇساق مۇز كريستالى سۋ جينايتىن جابدىققا ورناتىلعان قورعانىس تورلارىن بىتەپ تاستادى», دەپ ءمالىم ەتتى بوريس پەنكين.
ماماندار قابىرشاق مۇز وزەننەن سۋ الۋعا كەدەرگى كەلتىرەتىن بىرنەشە سەبەپتى تۋىنداتاتىنىن العا تارتىپ وتىر. بىرىنشىدەن, سۋ جينايتىن قۇرىعىلار بىتەلەدى. ويتكەنى ۇساق مۇز كريستالى بالىق قورعاۋ تورلارىن, سۋ جينايتىن جابدىقتىڭ باسقا ەلەمەنتتەرىن بىتەپ تاستاۋى مۇمكىن. بۇل سۋ جيناۋدىڭ تيىمدىلىگىن تومەندەتەدى.
ەكىنشىدەن, جابدىقتىڭ بۇزىلۋىنا ىقپال ەتەدى. وزەندەگى سۋ اعىسىمەن قابىرشاق مۇز جەڭىل قوزعالادى. اسىرەسە مۇز كريستالدارى ۇلكەن بولسا, نەمەسە تىعىز جيناقتالسا, سۋ الاتىن جابدىققا مەحانيكالىق زاقىم كەلتىرەدى.
ۇشىنشىدەن, مۇنداي فاكتورلار سۋ ساپاسىن تومەندەتەدى. مۇزبەن بىرگە ءارتۇرلى لاستاۋشى زاتتار ءجۇرۋى مۇمكىن.
تورتىنشىدەن, سۋ اعىسىنا كەدەرگى كەلتىرەدى. كەيبىر جاعدايدا قابىرشاقتى مۇز سۋدىڭ قالىپتى اعىسىنا كەدەرگى كەلتىرەتىن تىعىز كلاستەرلەر ءتۇزۋى مۇمكىن. ال بۇل سۋ جينايتىن قۇرىلعىلاردىڭ تيىمدىلىگىنە كەرى اسەر ەتەدى.
بۇل سەبەپتەردىڭ قانشالىقتى اسەرى ەتكەنى بەلگىسىز, 10 جەلتوقساندا كەشكە دەيىن سۋمەن قامتۋ ماسەلەسى ۋشىعىپ تۇردى. «اتىراۋ وبلىسى سۋ ارناسى» كوممۋنالدىق مەملەكەتتىك كاسىپورنىنىڭ باسشىسى مەيىرىم قالاۋيدىڭ ايتۋىنشا, سول كۇنى جەرگىلىكتى ۋاقىتپەن ساعات 16:00 شاماسىندا تۇتىنۋشىلارعا سۋ بەرىلە باستاعان. ال ساعات 19:00-دە قۇبىرداعى قىسىمدى قالپىنا كەلتىرۋ اياقتالعان.
«سۋ تازارتۋ قوندىرعىلارىن جوندەۋ, تازارتۋ جۇمىستارى 9 جەلتوقسان كۇنى كەشكە باستالدى. كاسىپورىننىڭ جۇمىسشىلارى مەن ارنايى مەكەمەنىڭ سۇڭگۋىرلەرى اۋا رايىنىڭ قولايسىزدىعىنا قاراماستان ءۇزىلىسسىز جۇمىس ىستەدى. ولار بارلىق سۋ تازارتۋ قوندىرعىسىن مۇزدان تولىق تازارتتى. قازىر كاسىپورىننىڭ سۋ تارتۋ قۇرىلعىلارى شتاتتىق رەجىمدە جۇمىس ىستەپ تۇر. سۋدىڭ قۇرامى تازارعان سايىن قۇبىرداعى قىسىم ارتادى», دەيدى م.قالاۋي.
اتىراۋ وبلىسى
