ۇستاز بوس ۋاقىتىن ءۇيىنىڭ اۋلاسىنداعى شاعىن شەبەرحانادا وتكىزەدى. اۋىلداستارى اكەپ بەرگەن كەز كەلگەن زاتتى كادەگە جاراتىپ, تەمىردەن دە, اعاشتان دا ءتۇرلى بۇيىمدار جاساي بەرەدى. ونىڭ قولىنان شىققان تاماشا مۇسىندەر اقكول مەكتەبى مەن بالاباقشانىڭ كىرەبەرىسىنە قويىلعان. تەمىرحان بالاباقشا اۋلاسىن بالدىرعانداردىڭ ويناۋىنا لايىقتاپ بەزەندىرىپ, اتكەنشەكتەردى ءوز قولىمەن جاسادى. كەيىنگى جىلدارى اقتوبەدەگى مەيرامحانا, دەمالىس ورىندارى تەمىرحانعا ساندەلگەن ساندىقتار جاساۋعا تاپسىرىس بەرىپ ءجۇر.
50-جىلدارعا دەيىن قازىرگى ايتەكە بي اۋدانى اۋىلدارىندا ايەلدەردىڭ اشەكەي زاتتارىن, سۇيەك پەن اعاشتان جاساعان تۇرمىستىق بۇيىمدار, تەمىردەن شارۋاشىلىققا قاجەت سايماندار سوققان ۇستالار كوپ بولدى. سول زاماندا ءار ۇيدە كەبەجە-ساندىق, ىدىس-اياق جينايتىن شكاف, سۇيەكتەن جاساعان كەرەۋەت بولاتىن. اۋىل ۇستالارى سوعىس جىلدارى, ودان كەيىن دە شارۋاشىلىقتىڭ قاجەتى ءۇشىن سوقا, تىرما, كۇرەكتى وزدەرى ۇستاحانالاردا سوقتى.
شەبەر ۇستاز قولونەر بۇيىمدارىن جاساۋدان ءتۇرلى سايىستارعا قاتىسىپ, جۇلدەلى ورىن الىپ ءجۇر. 2009 جىلى اقتوبە وبلىسىنىڭ ەڭ ۇزدىك مۇعالىمى اتاندى, «قازاقستاننىڭ ۇزدىك ۇستازى», «وزات پەداگوگ» مەدالدارىمەن ماراپاتتالىپ, رەسپۋبليكالىق وزاتتار ەنتسيكلوپەدياسىنا ەندى, ءبىلىم جانە عىلىم ءمينيسترىنىڭ العىسحاتىنا يە بولدى. قولونەرگە بەيىم وقۋشىلارىن ءوز كاسىبىنە باۋلىپ جۇرگەن تەمىرحان ۇستاز ەرتەدەگى شەبەرلەردىڭ ءونىم جاساۋ تەحنولوگياسىن تەرەڭىرەك ۇيرەنگىسى كەلەدى. ول ءۇشىن قولونەرشىلەر ءوزارا تاجىريبە الماساتىن ورتالىقتار كوبىرەك قاجەت دەيدى.
اقتوبە وبلىسى
