سۋرەتتى تۇسىرگەن – ەرلان ومار, «EQ»
وسىعان قاتىستى ورتالىق كوممۋنيكاتسيالار قىزمەتى الاڭىندا جامبى اتۋ سپورتىنىڭ دامۋى تاقىرىبىنا ارنالعان ءباسپاسوز جيىنىندا ءبىراز جاڭالىق ايتىلدى. ماسەلەن, الداعى ەكى جىلدىڭ ىشىندە شىمكەنتتە جامبى اتۋ اكادەمياسى اشىلىپ, سەريال تۇسىرىلمەك. بۇعان قوسا ۇلتتىق سپورتتىڭ بۇل تۇرىنە قاتىستى رەسمي سايت پەن ءموبيلدى قوسىمشانى ىسكە قوسۋ جانە جامبى اتۋ ونەرىنىڭ تاريحى تۋرالى كىتاپ دايىندالىپ جاتقانى ايتىلدى.
ءباسپاسوز جيىنىنا دەنە شىنىقتىرۋ جانە سپورت كوميتەتى ۇلتتىق سپورت تۇرلەرى باسقارماسىنىڭ باسشىسى مۇحامەدجان بەكنازاروۆ, ۇلتتىق جانە ات سپورتى تۇرلەرى ورتالىعىنىڭ ديرەكتورى باقداۋلەت ءسابيتوۆ پەن جامبى اتۋ فەدەراتسياسىنىڭ پرەزيدەنتى ەركەبۇلان ءىلياسوۆ قاتىستى.
سپيكەرلەردىڭ مالىمەتىنشە, 7-10 جەلتوقسان ارالىعىندا جامبى اتۋدان فەدەراتسيا كۋبوگى وتەدى. وعان ەلدىڭ تۇكپىر-تۇكپىرىنەن 100-گە جۋىق سپورتشى قاتىسپاقشى.
– ءبىز «تايتۇياق» ءستيلىن قويامىز. ونىڭ جۇلدەسى 600 مىڭ تەڭگە بولادى. قىلدى قاي مەرگەن ءۇزىپ وتەدى, سول 600 مىڭ تەڭگەنىڭ يەگەرى بولادى. بۇعان دەيىن جامبى اتۋعا ەرلەر مەن قىزدار بىرگە قاتىسقان. ەندى قىزدارعا ارنالعان «توميريس» جۇلدەسىن تاعايىندادىق, – دەيدى جامبى اتۋ فەدەراتسياسىنىڭ پرەزيدەنتى ە.ءىلياسوۆ.
ال مۇحامەدجان بەكنازاروۆ ۇلتتىق سپورتتىڭ دامۋى مەن وركەندەۋىنە جانە كەلەر جىلى ەلىمىزدە وتكىزىلەتىن V دۇنيەجۇزىلىك كوشپەندىلەر ويىندارىنا دا توقتالدى.
– كوشپەلى دالا سالتىن ۇلىقتاعان ەل رەتىندە ءبىز ءدۇبىرلى جارىستى جوعارى دەڭگەيدە وتكىزۋىمىز كەرەك. بۇل ماسەلە – مەملەكەت باسشىسىنىڭ تىكەلەي باقىلاۋىندا. ايتا كەتۋ كەرەك, بۇل سايىس جىلدان-جىلعا قاناتىن كەڭگە جايىپ كەلەدى. مىسالى, 2014 جىلى بۇعان 19 مەملەكەتتەن 583 سپورتشى قاتىسقان بولاتىن. 2022 جىلى تۇركيادا وتكەن ويىندارعا 102 مەملەكەتتەن 3 مىڭ سپورتشى قاتىستى. ال كەلەسى جىلى ەلىمىزدە وتەتىن ءىس-شاراعا الەمنىڭ 100-دەن اسا ەلىنەن 3 مىڭنان اسا سپورتشى, 15 مىڭعا جۋىق شەتەلدىك تۋريست كەلەدى دەپ جوسپارلانىپ وتىر, – دەدى م.بەكنازاروۆ.
جامبى اتۋ فەدەراتسياسىنىڭ پرەزيدەنتى ەركەبۇلان ءىلياسوۆتىڭ ايتۋىنشا, الداعى ۋاقىتتا AHAF (Asia horseback arhchery federation) جامبى اتۋدان ازيا فەدەراتسياسى قۇرىلادى.
– جامبى اتۋ سپورتشىلارى 2023 جىلدى جاقسى جەتىستىكتەرمەن اياقتادى. فرانتسيا, ماجارستان, موڭعوليادا ءبىزدىڭ سپورتشىلار جۇلدەلى ورىنداردى يەمدەندى. جامبى اتۋ قۇراماسى ساۋد ارابياسىنىڭ ءال-ۋلا قالاسىندا الەم كۋبوگىنىڭ فينالىنا قاتىسادى. بۇل ۇلكەن جەتىستىك دەپ ويلايمىز. جالپى, ۇلتتىق سپورتتىڭ دامۋىنا كەيىنگى ۋاقىتتا جاقسى كوڭىل ءبولىنىپ كەلەدى. وسى قارقىن جالعاسسا دەيمىز. ويتكەنى ۇلتتىق سپورت – ەلىمىزدىڭ ماقتانىشى. الداعى ۋاقىتتا جامبى اتۋ سپورت ءتۇرى جاستار اراسىندا دا داميدى. سوندىقتان جامبى اتۋ اكادەمياسى اشىلاتىن بولدى, – دەيدى ول.
ونىڭ ايتۋىنشا, ۇلتتىق سپورتتى جاستار اراسىندا دارىپتەۋ ماقساتىندا جامبى اتۋ تاريحى كەڭىنەن تارقاتىلىپ باياندالاتىن, سپورتتىڭ قىر-سىرى اڭگىمەلەنگەن كىتاپ دايىندالىپ جاتىر. وعان قوسا بالالارعا ارنالعان كوميكستەر باسىلىپ شىعارىلماق.
– جامبى اتۋ – حالقىمىزدىڭ اتادان بالاعا مۇرا بولىپ كەلە جاتقان ءتول سپورتى. كەيىنگى جىلدارى قۇرالايدى كوزگە اتقان ارۋ مەرگەندەرىمىزدىڭ جەتىستىگى الەمدى تاڭعالدىرىپ ءجۇر. بيىل جامبى اتۋداعى قىزدار اراسىندا «توميريس» جۇلدەسى قوسىلدى, – دەيدى ۇلتتىق جانە ات سپورتى تۇرلەرى ورتالىعىنىڭ ديرەكتورى باقداۋلەت ءسابيتوۆ.
ونىڭ سوزىنشە, ساۋد ارابياسىنىڭ ءال-ۋلا قالاسىندا الەم كۋبوگىنىڭ فينالىنا ەلىمىزدىڭ نامىسىن قورعاۋعا 3 سپورتشى مەن 1 جاتتىقتىرۋشى بارادى. ءدۇبىرلى دوداعا الەمنىڭ تۇكپىر-تۇكپىرىنەن ەڭ مىقتى سپورتشىلار قاتىسادى. شىمكەنتتەگى تۋرنيردە «تايتۇياق» جۇلدەسىنە 600 مىڭ تەڭگە تىگىلىپ وتىر. بۇعان دەيىن بۇل جۇلدەنى 16 جاستاعى قاراعاندى تۋماسى نۇراسىل ورالحان ۇتىپ العان.
– بۇگىنگى تاڭدا «Alageum Electric» حولدينگى ۇلتتىق سپورت تۇرلەرىنىڭ دامۋىنا 180 ملن تەڭگە ءبولىپ وتىر. ەلىمىزدىڭ ۇلتتىق قۇندىلىقتارىن قولداۋ, دامىتۋ ءبىزدىڭ حولدينگتىڭ قۇندىلىقتارىمەن سايكەس كەلەدى. جامبى اتۋ – مەملەكەتىمىزدىڭ اسىل مۇراسى. سوندىقتان وسى سپورت ءتۇرىن دامىتۋ ەلدىگىمىزدى ساقتاۋعا ىقپال ەتەدى, – دەيدى ە.يلياسوۆ.
سونداي-اق جامبى اتۋ فەدەراتسياسىنىڭ پرەزيدەنتى ەركەبۇلان سايدۋللا ۇلى ۇلتتىق ناقىشتاعى سپورتتىق كيىمدەردىڭ ديزاينىنا كونكۋرس جاريالادى. كونكۋرسقا ەلىمىزدىڭ كەز كەلگەن ديزاينەرى قاتىسا الادى. ۇلتتىق قۇراما سپورتشىلارىنا, باپكەرلەر مەن تورەشىلەرگە جانە فەدەراتسيا وكىلدەرىنە ارنالعان كيىمدەر بولۋعا ءتيىس. جۇلدەگە 1 ملن 800 مىڭ تەڭگە تىگىلىپ وتىر.
