كەزدەسۋدە «اۋىل» پارتياسىنىڭ توراعاسى, پارلامەنت ءماجىلىسىنىڭ دەپۋتاتى, پارتيا فراكتسياسىنىڭ جەتەكشىسى سەرىك ەگىزباەۆ پارلامەنتتە قابىلدانىپ جاتقان ماڭىزدى زاڭ جوبالارىنا توقتالىپ, ينكليۋزيۆتى قوعام مۇشەلەرىنىڭ كونستيتۋتسيالىق قۇقىن قورعاۋ ماسەلەسىندە جوعارعى زاڭ شىعارۋشى ورگاننىڭ اتقاراتىن قىزمەتى تۋرالى ايتتى.
ءماجىلىس دەپۋتاتى, «اۋىل» پارتياسى فراكتسياسىنىڭ مۇشەسى, مۇگەدەكتىگى بار ادامداردىڭ قۇقىعىن قورعاۋ جونىندەگى كوميسسيا توراعاسى تاڭساۋلە سەرىكوۆتىڭ ايتۋىنشا, ەندى مۇگەدەكتىگى بار ادامداردىڭ مۇمكىندىگى ارتا بەرەدى.
«كەيىنگى جىلدارى مەملەكەت باسشىسى قاسىم-جومارت توقاەۆتىڭ باستاماسىمەن ەلىمىزدە جۇرگىزىلىپ جاتقان ساياسي رەفورمالاردىڭ ماڭىزى زور. مىسالى, «قازاقستانداعى سايلاۋ تۋرالى» زاڭعا ەنگىزىلگەن وزگەرىستەر بويىنشا پارتيالاردان پارلامەنت ماجىلىسىنە وتكەن دەپۋتاتتاردىڭ ىشىندە 30 پايىزى ايەلدەر, جاستار جانە مۇگەدەكتىگى بار ازاماتتاردىڭ بولۋى زاڭ تۇرعىسىندا بەكىتىلدى. سونىڭ ناتيجەسىندە مۇگەدەكتىگى بار ازاماتتار زاڭ شىعارۋ ۇدەرىسىنە تىكەلەي ارالاسۋ مۇمكىندىگىنە يە بولدى. مۇنى پرەزيدەنت جۇرگىزگەن ساياسي رەفورمالاردىڭ جەمىسى دەپ باعالايمىز», دەدى ءماجىلىس دەپۋتاتى ت.سەرىكوۆ.
تاڭساۋلە عابدىماناپ ۇلى كوپ جىلدان بەرى تىرەك-قيمىل اپپاراتى بۇزىلعان مۇگەدەكتىگى بار جانداردىڭ قۇقىقتارىن قورعاۋ ماسەلەلەرىمەن اينالىسىپ جۇرگەنىن ايتادى.
«ينكليۋزيۆتى قوعام مۇشەلەرىنىڭ قۇقىن قورعاۋ جانە ولارعا كەدەرگىسىز ورتا قالىپتاستىرۋ – بۇل ەلدىك دامۋىنىڭ كورسەتكىشى. مىسالى, دامىعان ەلدەردە مۇگەدەكتىگى بار ادامدارعا قوعامدا ەشقانداي كەدەرگى بولمايدى. ءبىلىم الىپ, ەڭبەك ەتىپ, ەل قاتارلى ءومىر ءسۇرىپ جاتىر. ءبىز دە سول كۇنگە جەتۋىمىز قاجەت», دەيدى ماجىلىسمەن.
ءىس-شارا بارىسىندا دەپۋتاتتار پارلامەنت پەن ونىڭ قۇرىلىمى تۋرالى ايتىپ بەردى. موتيۆاتسيالىق لەكتسيا فورماتىندا وتكەن باسقوسۋدا جاستار قازىرگى قوعامداعى تۇيتكىلدى ماسەلەلەردى قوزعاپ, مۇگەدەكتىگى بار ادامداردىڭ الەۋمەتتەنۋى تۋرالى ويلارىن ورتاعا سالدى. ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ مۇگەدەكتىگى بار ستۋدەنتتەرى پارلامەنتتىڭ وتىرىس زالدارىن ارالاپ, زاڭ شىعارۋشى ورگان مەن دەپۋتاتتاردىڭ جۇمىس ۇدەرىسىمەن تانىستى. ءىس-شاراعا «اۋىل» پارتياسىنىڭ «جاستار قاناتى» باستاماشى بولدى.
