gov.kz
مونيتورينگ جۇرگىزگەن تەرەكتى اۋدانىنىڭ پروكۋراتۋراسى وقۋشىلاردىڭ سۋيتسيد پەن زورلىق-زومبىلىقتى ناسيحاتتايتىن سايتتارعا ەركىن كىرۋ مۇمكىندىگى بولعانىن اشكەرەلەدى. وسىلايشا, جول بەرىلگەن بۇزۋشىلىقتار ءۇشىن وبلىستىڭ ءبىلىم سالاسىنداعى ساپانى قامتاماسىز ەتۋ دەپارتامەنتىنە پروكۋرورلىق قاداعالاۋ اكتىسى ەنگىزىلدى. سونىڭ ناتيجەسىندە اكىمشىلىك قۇقىق بۇزۋشىلىق تۋرالى كودەكستىڭ 409-بابىنىڭ 7-2-بولىگى بويىنشا 14 مەكتەپتىڭ ديرەكتورى اكىمشىلىك جاۋاپكەرشىلىككە تارتىلدى. پروكۋرورلىق قاداعالاۋ اكتىسىمەن اۋداننىڭ بارلىق ءبىلىم بەرۋ مەكەمەلەرىندە وسىنداي ينتەرنەت-سايتتارعا كىرۋگە شەكتەۋلەر قويىلدى.
