بۇگىن تاشكەنتتە شانحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ ءماجىلىسى بولادى. ونىڭ قورىتىندىسىندا شىۇ-عا توراعالىق قازاقستانعا وتەدى.
اقتاۋدا جۇمىس ساپارىمەن بولعان قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ كەشە شانحاي ىنتىماقتاستىق ۇيىمىنا (شىۇ) مۇشە مەملەكەتتەر باسشىلارى كەڭەسىنىڭ ءماجىلىسىنە قاتىسۋ ءۇشىن وزبەكستان استاناسى – تاشكەنت قالاسىنا كەلدى.
شانحاي ىنتىماقتاستىق ۇيىمى – 2001 جىلدىڭ 15 ماۋسىمىندا شانحايدا قازاقستان, قىتاي, قىرعىزستان, رەسەي, تاجىكستان جانە وزبەكستان مەملەكەتتەرىنىڭ اراسىندا قۇرىلعان حالىقارالىق ۇيىم. ۇيىمنىڭ نەگىزگى ماقساتى وعان قاتىسۋشى ەلدەر اراسىنداعى ءوزارا سەنىم مەن تاتۋ كورشىلىك قاتىناستاردى نىعايتۋ, ساياسي, ساۋدا-ەكونوميكالىق, عىلىمي-تەحنيكالىق جانە مادەني شارالار بويىنشا ءتيىمدى ىنتىماقتاستىققا ىقپال ەتۋ, سونداي-اق وڭىردە قاۋىپسىزدىك پەن تۇراقتىلىقتى بىرلەسىپ قامتاماسىز ەتۋ بولىپ تابىلادى.
ۇيىمنىڭ تۇراقتى قىزمەت ەتەتىن ەكى ورگانى: پەكيندە ورنالاسقان حاتشىلىعى جانە وڭىرلىك انتيتەررورلىق قۇرىلىمنىڭ اتقارۋشى كوميتەتى بار. قازىرگى كەزدە ۇيىمعا وزبەكستان توراعالىق ەتەدى.
قازاقستان پرەزيدەنتى نۇرسۇلتان نازارباەۆ كەشە كەشكىسىن حالىقارالىق فورۋمدار سارايىندا شىۇ-عا مۇشە مەملەكەتتەر جانە بايقاۋشى مەملەكەتتەر باسشىلارىمەن, حالىقارالىق ۇيىمدار جەتەكشىلەرىمەن بىرگە وزبەكستان ونەر شەبەرلەرىنىڭ مەرەكەلىك كونتسەرتىن تاماشالادى.
قازاقستان باسشىسى نۇرسۇلتان نازارباەۆ كەشە سونداي-اق شانحاي ىنتىماقتاستىق ۇيىمى اياسىندا الدىمەن وزبەكستان رەسپۋبليكاسىنىڭ پرەزيدەنتى يسلام كاريموۆپەن, ودان كەيىن رەسەي فەدەراتسياسىنىڭ پرەزيدەنتى دميتري مەدۆەدەۆپەن ەكىجاقتى كەزدەسۋ وتكىزىپ, جيىنعا قاتىستى ماسەلەلەر ءجونىندە پىكىر الماستى.
شانحاي ىنتىماقتاستىق ۇيىمىنا مۇشە مەملەكەتتەر باسشىلارى كەڭەسىنىڭ وتىرىسى بۇگىن بولادى. الدىمەن ۇيىمعا قاتىسۋشى مەملەكەتتەر باسشىلارىنىڭ شاعىن قۇرامداعى وتىرىسى وتەدى, ودان سوڭ كەڭەس وتىرىسى كەڭەيتىلگەن قۇرامدا جالعاسادى. كەڭەس وتىرىسىنان سوڭ قورىتىندى قۇجاتتارعا قول قويىلادى دەپ كۇتىلۋدە. سونداي-اق كەڭەستىڭ وسى ماجىلىسىندە شانحاي ىنتىماقتاستىق ۇيىمىنا توراعالىق ەتۋ قازاقستانعا وتەدى.
ءاليسۇلتان قۇلانباي – تاشكەنتتەن.
