XXV قىسقى وليمپيا ويىندارى قارساڭىندا جاريالانعان تۋريزم جانە سپورت مينيسترلىگى دەرەكتەرى 2022 جىلدان بەرگى ءۇش جىلدا قىسقى سپورتپەن جۇيەلى تۇردە شۇعىلداناتىن وتانداستارىمىزدىڭ جالپى سانى ايتارلىقتاي وزگەرمەگەنىن كورسەتەدى. وليمپيادالىق 13 جانە ءبىر وليمپيادالىق ەمەس قىسقى سپورت تۇرىنە قاتىسۋشىلار سانى 158,4 مىڭ ادام دەڭگەيىندە قالعان. ءوسىم نەبارى 1,2 پايىز. بۇل جاڭا سپورتشىلاردىڭ جاپپاي كەلۋىنەن گورى, ءبىر سپورت تۇرىنەن ەكىنشىسىنە اۋىسۋ ءۇردىسىن اڭعارتادى.
ساندىق قۇرىلىم ەكى نەگىزگى تەندەنتسيانى ايقىندايدى. ءبىرىنشىسى – شاڭعى مەن سنوۋبوردقا بايلانىستى سپورت تۇرلەرىندەگى ايقىن تومەندەۋ. ءۇش جىل ىشىندە شاڭعى سپورتى مەن سنوۋبوردينگ سەكتسيالارىنان 9,5 مىڭ ادام كەتكەن. سوعان قاراماستان, شاڭعى جارىسى قىسقى سپورتپەن شۇعىلدانۋشىلاردىڭ شامامەن 46 پايىزىن قامتىپ وتىر. تەرىس ديناميكادان بياتلون مەن فريستايل عانا ءىشىنارا تىس قالعان.
قىسقى سپورتپەن شۇعىلدانۋ ءۇشىن بالالارعا بارلىق جاعداي جاسالعان با؟
ەكىنشى تەندەنتسيا – حوككەيدىڭ, اسىرەسە شايبالى حوككەي مەن وليمپيادالىق ەمەس دوپتى حوككەيدىڭ تانىمالدىعىنىڭ ارتۋى. بۇل سپورت تۇرلەرىندە سپورتشىلار سانى 5,8 مىڭ ادامعا نەمەسە 13,6 پايىزعا كوبەيگەن. ماماندار مۇنى سوڭعى جىلدارى حوككەيگە دەگەن جانكۇيەرلىك قىزىعۋشىلىقتىڭ وسۋىمەن جانە سونىڭ ناتيجەسىندە بالالاردى سەكتسيالارعا بەرۋ سۇرانىسىنىڭ ارتۋىمەن بايلانىستىرادى.
جەكەلەگەن سپورت تۇرلەرىندەگى ءوسىم ەرەكشە نازار اۋدارادى. بياتلونمەن اينالىسۋشىلار سانى 64,1 پايىزعا, كيورلينگتە 65,1 پايىزعا, دوپتى حوككەيدە 37,5 پايىزعا ارتقان. سونداي-اق مانەرلەپ سىرعاناۋ (25,4%), فريستايل (30%) جانە شورت-ترەك (11%) بويىنشا دا وڭ ديناميكا بايقالادى. بۇل كورسەتكىشتەر ەل ازاماتتارى اراسىندا قىسقى سپورتتىڭ كەيبىر تۇرلەرى بىرتىندەپ سۇرانىسقا يە بولا باستاعانىن اڭعارتادى.
ەل سپورتشىلارى قىسقى وليمپيادا ويىندارىندا قانداي كيىم ۇلگىسىمەن ونەر كورسەتەدى؟
سونىمەن بىرگە, ەلدە ءالى دە ماردىمسىز دامىپ كەلە جاتقان باعىتتار بار. سونىڭ ءبىرى – سكي-الپينيزم. تاۋعا شاڭعىمەن كوتەرىلۋ, جىلدام ءتۇسۋ جانە الپينيستىك داعدىلاردى بىرىكتىرەتىن بۇل سپورت تۇرىمەن ەلىمىزدە بار-جوعى التى ادام عانا اينالىسادى. رەسمي دەرەككە سۇيەنسەك, قازاقستاندا سكي-ءالپينيزمنىڭ ءبىر عانا سەكتسياسى بار, وندا جالعىز جاتتىقتىرۋشى جۇمىس ىستەيدى.
قازاقستان تەلەارنالارى قىسقى وليمپيادا ويىندارىن تىكەلەي ەفيردە كورسەتەدى
قورىتا ايتقاندا, وليمپيادا قارساڭىندا قازاقستانداعى قىسقى سپورتتىڭ دامۋى بىركەلكى ەمەس ەكەنىن بايقاۋعا بولادى. بىرقاتار باعىتتا ءوسىم بار, الايدا ينفراقۇرىلىم مەن بۇقارالىق تارتىلىس ءالسىز سپورت تۇرلەرى دە جەتكىلىكتى. جۇمسالعان ميللياردتاردىڭ ناقتى ناتيجەسى مەدال سانىمەن عانا ەمەس, وسى سالانىڭ ۇزاق مەرزىمدى دامۋىنا قوسقان ۇلەسىمەن ولشەنۋى ءتيىس.
