زارداپ شەككەندەر – تۇرعىن ءۇيدىڭ ءبىرىنشى قاباتىندا ورنالاسقان «Almaty Hostel» جاتاقجايىنىڭ قوناقتارى. الماتى قالالىق پوليتسيا دەپارتامەنتىنىڭ حابارلاۋىنشا, قايتىس بولعان 13 ادامنىڭ تورتەۋى شەتەلدىك, قالعان 9 ادام – قازاقستان رەسپۋبليكاسىنىڭ ازاماتتارى. الدىن الا مالىمەت بويىنشا ولار كومىرتەگى توتىعىنان ۋلانىپ قايتىس بولعان. ال اۋرۋحاناعا جەتكىزىلگەندەردىڭ ومىرىنە قاۋىپ ءتونىپ تۇرعان جوق.
قالالىق دەنساۋلىق ساقتاۋ باسقارماسىنىڭ مالىمەتىنە سايكەس, ناۋقاستىڭ بىرىنە كومىرقىشقىل گازىنان ۋلانۋ دياگنوزى قويىلدى. «ونىڭ جاعدايى ورتاشا اۋىر تۇراقتى دەپ باعالانىپ وتىر. قالعان ءتورت ناۋقاس بارلىق تەكسەرۋدەن كەيىن ۇسىنىستارمەن امبۋلاتورلىق ەمدەلۋگە جىبەرىلدى», دەپ حابارلادى سالا وكىلدەرى.
الماتى قالالىق توتەنشە جاعدايلار دەپارتامەنتىنىڭ مالىمەتىنشە, وقىس وقيعا تۋرالى حابار جەدەل جەلىگە تاڭعى ساعات 05:33-تە كەلىپ تۇسكەن. وقيعا ورنىنا جەتى مينۋتتا جەتكەن ءورت سوندىرۋشىلەر كولەمى 30 شارشى مەتر اۋماقتى شارپىعان قىزىل جالىندى 06:22-دە تولىق اۋىزدىقتاعان.
جەرگىلىكتى اكىمدىك ەۆاكۋاتسيالانعانداردى جاقىن ماڭداعى مەكتەپتەردىڭ بىرىنە ۋاقىتشا ورنالاستىرىپ, ازاماتتارعا قاجەتتى مەديتسينالىق جانە پسيحولوگيالىق كومەك كورسەتىلدى. توسىن جاعدايعا بايلانىستى پرەمەر-مينيستر ءاليحان سمايىلوۆتىڭ وكىمىمەن حوستەلدە بولعان ءورتتىڭ سەبەپتەرىن تەكسەرۋ جانە ونىڭ سالدارىن جويۋ جونىندەگى ۇكىمەتتىك كوميسسيا قۇرىلدى. كەيىنىرەك ءورت فاكتىسى بويىنشا قىلمىستىق كودەكستىڭ 292-بابىنا سايكەس قىلمىستىق ءىس قوزعالدى.
توتەنشە جاعدايلار ءمينيسترى سىرىم ءشارىپحانوۆتىڭ باسشىلىعىمەن تجم-نىڭ جەدەل توبى وقيعا ورنىنا ارنايى كەلىپ, ءورتتىڭ شىعۋ سەبەپتەرىن تەكسەردى. الدىن الا دەرەكتەر بويىنشا ءورت وشاعى جەرتولەنىڭ دالىزىندە باستالعان بولۋى مۇمكىن. الماتى قالاسى تجد ءورت سىناۋ زەرتحاناسىنىڭ انىقتاۋشىلارى مەن ماماندارى جان-جاقتى تەكسەرۋ جۇمىستارىن جۇرگىزىپ جاتىر.
جەلى قولدانۋشىلارى ءورت بولعان جاتاقجاي باسشىلىعىن سىنعا العان. ولاردىڭ پىكىرىنشە, اياداي بولمەگە ونداعان ادامدى ورنالاستىرۋ قاۋىپسىزدىك تالاپتارىنا قايشى. دەگەنمەن بۇعان دەيىن جاريالانعان پىكىرلەردە حوستەلدىڭ رەيتينگى جوعارى كورسەتكىشپەن باعالانىپتى. جارنامالىق حابارلاندىرۋدا ءبىر كىسىلىك ورىننىڭ قۇنى ايىنا 25 مىڭ تەڭگە دەپ كورسەتىلگەن. ءبىر جارىم اي بۇرىن حوستەل رەتىندە قايتا جابدىقتالعان نىسان «حالىق بانكتىڭ» يەلىگىندە. ۇيىم ونى كەپىلم ۇلىك رەتىندە جالعا بەرگەن.
وقيعا ورنىنا جەتكەن قالا اكىمى ەربولات دوساەۆ قۇجاتتاردىڭ تەكسەرىلەتىنىن, اپاتتىڭ ءمان-جايى انىقتالىپ, زارداپ شەككەندەرگە قالا بيلىگى تاراپىنان جان-جاقتى كومەك كورسەتىلەتىنىن جەتكىزدى.
«جالپى, جەرتولەنى سانيتارلىق تالاپتارعا سايكەس جابدىقتاۋعا بولادى. بىراق وسىنشاما كوپ ادامدى ورنالاستىرۋعا رۇقسات بار ما؟ زاڭ شەڭبەرىندە انىقتايمىز, ارنايى تەرگەۋ جۇرەدى», دەدى ە.دوساەۆ.
الماتى اكىمىنىڭ ءباسپاسوز قىزمەتى تۇستەن كەيىن تاراتقان اقپاراتتا بۇل حوستەل سانيتارلىق-ەپيدەميولوگيالىق, قۇرىلىس تالاپتارى مەن ءورت قاۋىپسىزدىگى ەرەجەلەرىن بۇزا وتىرىپ, زاڭسىز ورنالاسقاندىعى حابارلاندى.
«جەر ۋچاسكەسىنىڭ نىسانالى ماقساتى – دۇكەندى پايدالانۋ جانە قىزمەت كورسەتۋگە ارنالعان. بۇل نىسان ءبىر جارىم اي بۇرىن حوستەلگە اينالدى. حوستەل الاڭى 457 شارشى مەتردى قۇرايدى. ايتا كەتەرلىگى, «قازاقستان رەسپۋبليكاسىنداعى ساۋلەت, قالا قۇرىلىسى جانە قۇرىلىس قىزمەتى تۋرالى» زاڭعا سايكەس ءۇي-جايلاردى قايتا جابدىقتاۋ كەزىندە رۇقسات قۇجاتتارىن الۋ كەرەك. ونىڭ ۇستىنە الماتىنىڭ قالالىق جوسپارلاۋ جانە ۋربانيستيكا باسقارماسى قايتا جابدىقتاۋعا ارنالعان باستاپقى رۇقسات قۇجاتتارىن (اپز, شەشىم) بەرمەگەن. دۇكەننىڭ حوستەل بولىپ فۋنكتسيونالدىق ماقساتى وزگەرگەن كەزدە سانيتارلىق-ەپيدەميولوگيالىق, قۇرىلىس تالاپتارى مەن ءورت قاۋىپسىزدىگى ەرەجەلەرى ورىندالۋى قاجەت. حوستەلدى جەرتولە جانە جەرتولە قاباتتارىندا ورنالاستىرۋعا سانيتارلىق-ەپيدەميولوگيالىق تالاپتاردىڭ 23-تارماعىنا سايكەس تىيىم سالىنادى», دەپ حابارلادى الماتى قالاسى اكىمىنىڭ ءباسپاسوز قىزمەتى.
«قاۋىپ تونگەندە قاربالاسپاي, قالا قۇرىلىسىنداعى قاۋىپسىزدىك تالاپتارىن تەكسەرۋ جاي كەزدە نەگە جۇزەگە اسپاعان؟» دەگەن ساۋال تۋىندايدى. مەگاپوليستە ەكى كۇننىڭ بىرىندە ءورت فاكتىسى تىركەلىپ جاتادى. تامىز ايىندا سالعىرتتىقتىڭ سالدارىنان «اقكەنت» تۇرعىن ءۇي كەشەنىندە ادام شىعىنىمەن اياقتالعان وقيعانى ساراپشىلار سىنعا العان ەدى. توتەننەن تونگەن ءتىلسىز جاۋ زاڭ تالاپتارى مەن قاراپايىم ەرەجەلەردى ەسكەرۋگە, قۇزىرلى ورىندار تاراپىنان ولاردى تەكسەرۋگە لايىقتى ءمان بەرىلمەيتىنىن تاعى دا ءبىر كورسەتىپ وتىر. بۇل وقيعادان دا الماتىنىڭ ءورت قاۋىپسىزدىگىن قاداعالاۋ ىسىنە كەشەندى كوزقاراس قاجەت ەكەنىن بايقايمىز.
الماتى
