«بايتاق» جاسىلدار پارتياسىنىڭ ۇيىمداستىرۋىمەن بولعان جيىندا ەلىمىزدەگى سۋارمالى جەرلەر مەن ترانسشەكارالىق سۋ ماسەلەلەرى تۋرالى ءسوز بولدى. سۋ رەسۋرستارى جانە يرريگاتسيا مينيسترلىگى شاردارا سۋ قويماسى عانا ەمەس, جاھاندىق پروبلەماعا اينالعان ارال تەڭىزىنىڭ دە ارناسىن سۋعا تولتىرامىز دەپ وتىر. بۇل جوسپار كەلەسى جىلدىڭ ءساۋىر ايىنا دەيىن ورىندالادى دەيدى. سۋ مينيسترلىگى وزبەكستانمەن كەلىسسوز جۇرگىزىپ, 11,1 ملرد تەكشە مەتر سۋ الاتىن بولىپ كەلىسىپتى.
سۋ رەسۋرستارى جانە يرريگاتسيا مينيسترلىگىنىڭ دەپارتامەنت ديرەكتورىنىڭ ورىنباسارى دانيار ساعاديەۆ مۇنداي كەلىسسوزدەر قىرعىز ەلىمەن دە جاسالىپ جاتقانىن ايتادى.
«بىرنەشە كوزدەسۋ ءوتتى. قازىر ەڭ ۇلكەن سۋ قويماسى قىرعىز جەرىندە. وندا دا سۋ از. ەندى كەلەسى ۆەگەتاتسياعا دايىنداۋ ءۇشىن ءبىز قىرعىز اعايىندارعا ەلەكتر ەنەرگياسىن بەرەمىز. ولار توقتاعۇلعا سۋ جيناپ, جازدا بىزگە جونەلتەدى», دەيدى د. ساعاديەۆ.
الايدا ساراپشى مامان ەرلان باداشەۆ: «بۇل تۇك تە جاڭالىق ەمەس, ورتالىق ازيا ەلدەرىنىڭ ارال تەڭىزىنە قاتىستى ورتاق كەلىسىم اياسىندا جىلدا جاسالاتىن شارا», دەيدى.
«11,1 ملرد تەكشە مەتر سۋ كورشى ەلدەرمەن ۋاعدالاستىققا ساي شاردارا سۋ قويماسىنا جىبەرىلەدى. ونى تۇركىستان جانە قىزىلوردا وبلىسىنىڭ شارۋالارى الداعى ەگىن ناۋقانىندا قولدانادى. سونداي-اق كەلەر جىلدىڭ ءبىرىنشى ساۋىرىنە دەيىن ارال تەڭىزىنە 1,6 ملرد تەكشە مەتر سۋ جىبەرۋگە مۇمكىندىك تۋادى», دەيدى مينيسترلىكتىڭ وكىلى.
رەسمي دەرەكتەر بويىنشا ەلىمىزدەگى جالپى ەگىستىك القاپتاردىڭ 67%-ى – سۋارمالى جەرلەر. كەيىنگى كەزدەگى الەمدىك كليماتتىڭ وزگەرۋى ونسىز دا تاپشى بولعان سۋ ماسەلەسىمەن كەشەندى تۇردە اينالىسۋعا ماجبۇرلەپ وتىر. سالانى دامىتۋ ءۇشىن وسىدان ەكى اي بۇرىن سۋ رەسۋرستارى جانە يرريگاتسيا مينيسترلىگى قۇرىلعان ەدى. مينيسترلىك قازىر كورشىلەس ەلدەرمەن قاجەتتى تىرشىلىك ءنارىن الۋ ءۇشىن جان-جاقتى كەلىسسوز جۇرگىزىپ جاتىر.
«بايتاق» جاسىلدار پارتياسى پرەزيدەنت قاسىم-جومارت توقاەۆ ساياساتىنىڭ جولىندا ارەكەت ەتە وتىرىپ, بيلىك جۇرگىزىپ جاتقان رەفورمالاردى تولىقتىرادى. ءبىزدىڭ ماقسات – ەكولوگيا, سۋ مينيسترىلىكتەرىمەن بىرلەسە جۇمىس ىستەۋ جانە ونىڭ جۇمىسىن قاداعالاۋ. ويتكەنى حالىققا اسا قاجەت بولىپ وتىرعان مينيسترلىكتەردىڭ الدىندا اتقاراتىن جۇمىسى كوپ. ول وفيستە شىرەنىپ وتىرا بەرەتىن, تەك قاعازداعى عانا سانداردى ساپىرىستىرا بەرەتىن شەنەۋنىكتەردىڭ كلۋبى بولىپ كەتپەۋگە ءتيىس», دەدى «بايتاق» جاسىلدار پارتياسىنىڭ توراعاسى ازاماتحان امىرتاەۆ.
سۋعا قاتىستى كورشى ەلدەرمەن ۋاعدالاستىققا قول جەتكىزگەن سۋ رەسۋرستارى جانە يرريگاتسيا ءمينيسترى نۇرجان نۇرجىگىتوۆ: «بىرلەسكەن كۇش-جىگەرمەن عانا ءبىز ورتالىق ازياداعى سۋ رەسۋرستارىن ۇتىمدى پايدالانۋ جانە ۇنەمدەۋدى قامتاماسىز ەتە الامىز», دەيدى. تالقىلاۋلار 2023 جىلى 2 قاراشادا تاشكەنتتە مەملەكەتارالىق سۋ شارۋاشىلىعى ۇيلەستىرۋ كوميسسياسىنىڭ (مسشك) 85-وتىرىسىندا بولعان. سونىڭ اياسىندا قازاقستان, تاجىكستان, تۇرىكمەنستان, وزبەكستان سىرداريا جانە ءامۋداريا وزەندەرىنىڭ باسسەيندەرىندەگى سۋ قويمالارى كاسكادى جۇمىسىنىڭ بولجامدى رەجىمى تۋرالى حاتتاماعا قول قويدى. كەلەسى كەزەكتى مسشك-نىڭ 86-وتىرىسى ەلىمىزدە جىل باسىندا وتەدى دەپ جوسپارلانىپ وتىر.
«دوستىق» مەملەكەتارالىق كانالى بويىنشا سۋ الۋ – 487 ملن تەكشە مەتر. بۇل تۇركىستان جانە قىزىلوردا وبلىستارىندا 2024 جىلعى ۆەگەتاتسيالىق كەزەڭىنە قاجەتتى سۋ كولەمىن جيناقتاۋعا مۇمكىندىك بەرمەك.
