مىقتىنىڭ اتى – مىقتى
ويىن استانا ۋاقىتىمەن تۇنگى ساعات 01.45-تە باستالعانىنا قاراماستان كوپشىلىك ۇيىقتاماي, ۇلتتىق قۇراما ءۇشىن تەلەديدار الدىندا تاقىم قىسىپ, جانكۇيەر بولعانى انىق. فۋتبولشىلارىمىز جەڭىسكە جەتكەن جاعدايدا ءوز تاريحىندا تۇڭعىش رەت ەۋروپا چەمپيوناتىنىڭ فينالدىق ساتىسىنا جولداما الاتىن ەدى. اتتەگەنى-ايى, سول ارمان-ماقسات ورىندالماي قالدى. ايتكەنمەن بۇل تۇندە فۋتبولشىلارىمىز ءوز ويىنى ارقىلى ەستەن كەتپەس ەرەكشە اسەر, ەموتسيا سىيلادى.
باس جاتتىقتىرۋشى ماگومەد اديەۆ العاشقى مينۋتتان يگور شاتسكي, يان ۆوروگوۆسكي, ءنۇرالى ءالىپ, الەكساندر ماروچكين, سەرگەي مالىي, مارات بىستروۆ, رامازان ورازوۆ, يسلامبەك قۋات, ابزال بەيسەبەكوۆ, يسلام چەسنوكوۆ پەن ماكسيم سامورودوۆقا سەنىم ارتتى.
پولشالىق تورەشى شيمون مارچينياكتىڭ ىسقىرىعى ەستىلە سالىسىمەن ەۋروپانىڭ مىقتى دەگەن كلۋبتارىندا دوپ تەبەتىن سلوۆەنيالىق فۋتبولشىلاردىڭ باسىمدىعى بايقالىپ تۇردى. دەسە دە 16 مىڭ جانكۇيەر الدىندا قۇراما جىگىتتەرى لايىقتى قارسىلىق كورسەتتى. ايتپاقشى, قۇرامامىزدى قولداۋ ءۇشىن ەل استاناسى ليۋبليانا قالاسىندا ورنالاسقان «ستوجيتسە» ستاديونىنا مىڭعا جۋىق وتانداسىمىز بارىپتى.
ويىننىڭ 41-مينۋتىندا يگور شاتسكيدىڭ قاقپاسىنا بەلگىلەنگەن پەنالتيدەن سلوۆەنيالىق بەنيامين شەشكو ءمۇلت كەتكەن جوق. ال 47-مينۋتتا رامازان ورازوۆ تارازى باسىن تەڭەستىردى. بۇدان كەيىن فۋتبولشىلارىمىز بىرنەشە شابۋىل ۇيىمداستىرعانىمەن, گول سوعاتىن مۇمكىندىكتەرىن دۇرىس پايدالانا المادى. ەسەسىنە, 86-مينۋتتا سلوۆەنيالىق بەنيامين ۆەربيچ قورىتىندى ەسەپتى بەلگىلەدى. وسىلايشا, قازاقستان قارسىلاسىنا 1:2 ەسەبىمەن ەسە جىبەرىپ, جولدامادان قۇر قالدى.
جالپى, بۇل جەردە مىقتىنىڭ مىقتىلىعىن ايتىپ, مويىنداۋ كەرەك. بيىل سلوۆەنيا بىزدەن ەكى ويىندا دا باسىم بولدى. الايدا توپتاعى سوڭعى ماتچتا, سوڭعى تايمدا تارتىسىپ قارسىلاسقا جول بەرۋدىڭ ءوزى قۇراما فۋتبولشىلارىنا ەش رەنىش قالدىرمايدى.
ەكىنشى مۇمكىندىكتى ءمۇلت جىبەرمەۋ ماڭىزدى
ستاتيستيكاعا ۇڭىلسەك, قۇرلىقتىق دودا ىرىكتەۋ ساتىسىندا وتاندىق فۋتبولشىلار دانيا (3:2) مەن فينليانديا (1:0) قۇرامالارىن ءبىر مارتە تىزە بۇكتىرسە, Cولتۇستىك يرلانديا (1:0, 1:0) مەن سان-مارينو (3:0, 3:1) قۇرامالارىن ەكى مارتە جەڭدى. ال دانيا (1:3), سلوۆەنيا (1:2), فينلياندياعا (0:1) ەسە جىبەردى.
قازاقستان قۇراماسى ەۋروپا چەمپيوناتى فينالدىق ساتىسىنا ۇلتتار ليگاسى ارقىلى شىعۋىنا مۇمكىندىگى بار. بۇل جولى فۋتبولشىلار 2024 جىلدىڭ ناۋرىز ايىندا گرەكيامەن شەبەرلىك بايقاسادى. ەندى ەكىنشى مۇمكىندىكتەن ءمۇلت كەتپەۋ كەرەك.
قازاقستان قۇراماسى ەۋروپا چەمپيوناتى ىرىكتەۋ ساتىسىندا بەسىنشى مارتە باق سىناپ وتىر. 2008, 2012 جىلداردا توپتان – 6, 2016, 2020 جىلداردا 5-ورىن الدى.
قۇرلىقتىق دودانىڭ فينالدىق ساتىسىنا فرانتسيا, پورتۋگاليا, بەلگيا, يسپانيا, شوتلانديا, تۇركيا, انگليا, اۋستريا, ماجارستان, سلوۆاكيا, البانيا, دانيا, نيدەرلاند, شۆەيتساريا, رۋمىنيا, سەربيا قۇرامالارى شىقتى. ال گەرمانيا ۇيىمداستىرۋشى ەل رەتىندە ىرىكتەۋسىز قاتىسادى.
ەل قۇراماسى H توبىندا 10 ويىننان كەيىن 18 ۇپاي جيناپ, ءۇشىنشى ورىندا قالىپ قويدى. بۇل توپتا دانيا 22 ۇپاي جيناپ, قۇرلىقتىق دودانىڭ فينالدىق ساتىسىنا ءبىر تۋر بۇرىن جولداما السا, ال سلوۆەنيا قۇراماسىنىڭ ەنشىسىنە قازاقستان قۇراماسىنان باسىم تۇسكەننەن كەيىن 22 ۇپاي جازىلعان.
قۇراماعا قوشەمەت كورسەتتى
كەشە فۋتبولشىلاردى ن.نازارباەۆ حالىقارالىق اۋەجايىنان سالتاناتتى قارسى الۋ راسىمىنە تۋريزم جانە سپورت ءمينيسترى ەرمەك مارجىقپاەۆ, استانا قالاسىنىڭ اكىمى جەڭىس قاسىمبەك, فۋتبولشىلاردىڭ تۋعان-تۋىستارى, دوستارى جانە جانكۇيەرلەر قاتىستى.
ءىس-شارا بارىسىندا ەرمەك مارجىقپاەۆ قۇتتىقتاۋ ءسوز سويلەپ, بۇكىل كومانداعا جاسىل الاڭداعى جانكەشتى ويىنى ءۇشىن العىسىن ءبىلدىردى.
– سىزدەر بۇكىل قازاق حالقىنا, ءتىپتى فۋتبولدان, جالپى سپورتتان الىس جاندارعا ەستەن كەتپەس ەرەكشە اسەر, ەموتسيا سىيلادىڭىزدار. ءوز ويىندارىڭىز ارقىلى جانكۇيەرلەردىڭ وتاندىق فۋتبولعا دەگەن سەنىمىن قايتارىپ, ەلىمىزدىڭ حالىقارالىق ارەناداعى ءيميدجىن كوتەردىڭىزدەر. كەشە تۇندە بۇكىل ەل ۇيىقتاماي, سىزدەر ءۇشىن تەلەديدار الدىندا تاقىم قىسىپ, جانكۇيەر بولدى. سىزدەر بۇل دودادا ۇلكەن ەرلىك جاساپ, قازاق حالقىن ءبىر ماقسات اياسىنا ۇيىستىرا الدىڭىزدار. بۇل ەرلىكتەرىڭىز كوپكە ۇلگى, مىڭداعان جاس بالا سىزدەر سياقتى بولۋدى, بولاشاقتا ۇلتتىق قۇراما ساپىندا ويناۋدى ارماندايدى. قازاق حالقىنا ۇلكەن قۋانىش سىيلاعاندارىڭىزعا كوپ راحمەت, جىگىتتەر! – دەدى مينيستر.
فۋتبولشىلاردى قارسى الۋعا جانكۇيەرلەر دە ەرەكشە دايىندىقپەن كەلدى. ولار جىگىتتەرگە جىگەر بەرەتىن سوزدەر جازىلعان باننەرلەردى ۇستاپ, قۇرمەت رەتىندە جاندى ءدالىز جاساپ, ساپ تۇزەدى.
سونىمەن قاتار فۋتبولشىلار مەن جاتتىقتىرۋشىلار شتابى بارلىق جانكۇيەرگە ىرىكتەۋ كەزەڭىندەگى ويىندار بويى قولداۋ بىلدىرگەنى ءۇشىن العىس ءبىلدىردى. كوماندا توپتاعى شەشۋشى ماتچتى سىرت الاڭدا وتكىزگەنىنە قاراماستان, فۋتبولشىلار وسى ءتۇنى بۇكىل ەلدىڭ قولداۋىن سەزگەنىن اتاپ ءوتتى.
ءبىزدىڭ قۇراما ەۋروپا چەمپيوناتىنىڭ فينالدىق كەزەڭىنە ىرىكتەۋ سايىستارى ارقىلى تىكەلەي جولداما الا الماسا دا, قارت قۇرلىق دوداسىنا شىعۋ مۇمكىندىگىن ساقتاپ قالدى. ەندى جەرلەستەرىمىز ۇلتتار ليگاسىنىڭ پلەي-وفف كەزەڭى ارقىلى ەۋروعا شىعۋ ءۇشىن تاعى ءبىر مارتە تالپىنىپ كورەدى. بۇل سىندا ءبىزدىڭ جىگىتتەردى 2004 جىلعى ەۋروپا چەمپيوندارى – گرەكيا قۇراماسى كۇتىپ تۇر. ماتچ 2024 جىلدىڭ 21 ناۋرىزىندا افينادا وتەدى. گرەكتەردى جەڭسەك, ليۋكسەمبۋرگ نەمەسە گرۋزيا قۇرامالارىنىڭ كىم جەڭگەنى الماتىعا كەلەدى.
ەۋرو-2024-گى ەل قۇراماسىنىڭ جەتىستىگى
- رامازان ورازوۆ ۇلتتىق قۇراما ساپىندا ءبىرىنشى گولىن سوقتى.
- قازاقستان قۇراماسى ۋەفا قاۋىمداستىعىنداعى ەۋروپا جانە الەم چەمپيوناتىنا ىرىكتەۋ كەزەڭىندە ەڭ از 12 گول جىبەردى.
- ىرىكتەۋ كەزەڭىندەگى 10 ويىندا قارسىلاستار قازاقستانعا 124 مارتە شابۋىل جاساپ, قاقپاشى يگور شاتسكي 25 مارتە سەيۆ جاسادى.
- ۋەفا قاۋىمداستىعى ساپىندا ەل قۇراماسى العاش رەت ەۋرو جانە الەم چەمپيوناتىنا ىرىكتەۋ كەزەڭى اياسىندا ەڭ كوپ 16 گول سوقتى.
- ىرىكتەۋ كەزەڭىندەگى 10 ويىندا ەل قۇراماسى قارسىلاستارعا 40 مارتە تۋرا سوققى باعىتتادى.
- باحتيەر زاينۋتدينوۆ 4 گول سوعىپ, وسى ىرىكتەۋ كەزەڭىندە «ەڭ ۇزدىك سۇرمەرگەنى» اتاندى.
- 6 جەڭىسى ارقىلى قازاقستان توپ-100 قاتارىنا قايتا كىردى.
- ۇلتتىق قۇرامانىڭ جارقىن ويىنىنا جانكۇيەرلەردىڭ كوڭىلى تولىپ سان-مارينوعا قارسى ويىندى ستاديوندا رەكوردتىق 30 100 ادام تاماشالادى.
