جاعدايدى جاقسارتاتىن جەتى داعدى

JOLTAP جوباسى مەملەكەت باسشى­سىنىڭ ءونىمدى جۇمىس ورىندارىن قۇرۋعا باسا نازار اۋدارا وتىرىپ, بەلسەندى الەۋمەتتىك ساياساتتىڭ قاجەتتىلىگى تۋرالى تاپسىرمالارىن ورىنداۋ ماقساتىندا باستالعان. بۇل باستاما ەلوردا اكىمدىگى مەن بىرقاتار مۇددەلى مەملەكەتتىك ور­گان­نىڭ قولداۋىمەن ىسكە اسىرىلىپ وتىر. جوبانىڭ بىرلەسكەن سەرىكتەسى – «جاڭا مۇمكىندىك» قوعامدىق قورى, ال مودۋلدىك پۋنكتتەرگە «حالىق» قورى قولداۋ كورسەتكەن.

جوبانىڭ «Freelance مۇمكىندىك» وقىتۋ جۇيەسى ءبىر ايدى قامتيدى. باعدارلاما ۇيىمداستىرۋشىلارىنىڭ ايتۋىنشا, ءبىلىم الۋعا ءوتىنىش بىلدىرگەندەردىڭ 60 پايىزدان استامى – ەلوردانىڭ 35 جاسقا دەيىنگى جۇمىسسىز تۇرعىندارى. استانا اكىمدىگىنىڭ مالىمەتىنشە, ەكىنشى لەكتىڭ 215 قاتىسۋشىسى 7 تسيفرلىق داعدى بو­يىنشا وقۋعا كىرىسكەن. ماسەلەن, SMM (وقۋ مەرزىمى – 2 اپتا), تارگەتولوگ (وقۋ كەزەڭى – 1 اي), بەينوگراف (وقۋ كەزەڭى – 1,5 اي), ماركەتپلەيس (وقۋ مەرزىمى – 2 اپتا), موبيلوگراف (وقۋ كەزەڭى – 1 اي), گرافيكالىق ديزاينەر (وقۋ مەرزىمى – 1,5 اي), ۆەب-ديزاينەر/سايتتاردى ازىرلەۋ (وقۋ مەرزىمى – 1,5 اي). باعدارلاما اياسىندا جىل سوڭىنا دەيىن 500 ازاماتتى 7 وزەكتى ماماندىق بويىنشا ۇيرەتۋ جوسپارلانعان.

– استانا تۇرعىندارىنىڭ دامۋعا ءارى كاسىبي وسۋگە تالپىنىسى جوعارى. ازاماتتار وقۋعا, داعدىلاردى ۇيرەنۋگە, بيزنەس اشۋعا قىزىعۋشىلىق تانىتىپ وتىر. JOLTAP جوباسى ارقىلى 10 مىڭ استانا تۇرعىنى جۇمىسشى جانە تسيفر­لىق ماماندىقتارى بويىنشا وقىپ, سەرتيفيكاتتالعان مامان اتانادى. جوبا – مەملەكەت, بيزنەس جانە قوعامنىڭ بىر­ل­ەسىپ باستاعان ءتيىمدى جۇيەسى. ءبىز جاڭا سەرىكتەستىكتەر مەن ارىپتەستىككە اشىق­پىز, – دەيدى جوبا جەتەكشىسى دانا ءجۇنىسوۆا.

قىسقامەرزىمدى وقىتۋعا جازىلۋ «بارشاعا مۇمكىندىك» مودۋلدىك پۋنكت­تەرىندە وتەدى. بۇل پۋنكتتەردە ەلوردا تۇرعىندارى جۇمىس جانە تسيفرلىق داعدىلاردى يگەرۋ بويىنشا تەگىن كەڭەس الادى, سونداي-اق مەملەكەتتىك قولداۋ شارالارى مەن جۇمىسقا ورنالاسۋ مۇم­كىندىكتەرى تۋرالى اقپارات الا الادى. مودۋلدىك پۋنكتتەردىڭ كەڭەسشىلەرى تۇر­عىن ءۇي باعدارلامالارى, بيزنەستى قولداۋ, اتاۋلى الەۋمەتتىك كومەك, وقىتۋ جانە ەڭبەكپەن قامتۋ ماسەلەلەرى بويىنشا جان-جاقتى اقپارات بەرەدى. «بارشاعا مۇمكىندىك» مودۋلدىك پۋنكتتەرى ارقىلى ازاماتتار 52 مەملەكەتتىك قولداۋ شاراسى بويىنشا كومەك الىپ جاتىر. ونىڭ ىشىندە بيزنەس اشۋ ءۇشىن گرانت پەن شاعىن نەسيە بەرۋ باعدارلامالارىنا قاتىسۋعا 720 ادام ءوتىنىش بەرگەن.

جاستار ءۇشىن تسيفرلىق داعدىلاردى مەڭگەرۋ تابىستى مانساپتىڭ اجىرا­ماس بولىگىنە اينالدى. تسيفرلىق داع­دى­لار جاڭا مۇمكىندىكتەر الەمىنە جول اشادى جانە ەڭبەك نارىعىندا ارتىق­شىلىق بەرەدى. وقۋ اياقتالعاننان كەيىن قاتىسۋشىلار سەرتيفيكات الادى, ال ولار­دىڭ كانديداتۋرالارى JUMYS TAP Telegram-بوتىندا جاريالانادى. بۇگىن­گە دەيىن جوبا اياسىندا 3 مىڭنان اسا ازا­ماتقا كەڭەس بەرىلىپتى.

«Freelance مۇمكىندىك» قىسقامەرزىمدى وقىتۋ باعدارلاماسى «تارگەت» كۋرسىنىڭ قاتىسۋشىسى داناگۇل الپىسبايقىزى – كوپبالالى انا. ول جوبا تۋرالى قۇربىسىنان ەستىپ, مەملەكەتتىك قولداۋ شارالارى بويىنشا كەڭەس الۋعا بارعان. ال قازىر تسيفرلىق داعدىلاردى يگەرۋ بويىنشا تەگىن ءبىلىم الىپ ءجۇر.

– ءوزىم – بەس بالانىڭ اناسىمىن. بۇرىن مەملەكەتتىك مەكەمەدە جۇمىس ىستەگەنمىن. قازىر ءۇش بالام بالاباقشاعا بارادى, ولاردى اپارىپ, اكەلەتىن ادام جوق. سوندىقتان جۇمىستان شىعۋىما تۋرا كەلدى. ۇيدە قاراپ وتىرمايىن دەپ ىلعي جاڭادان شىققان ونلاين كۋرستاردى ساتىپ الىپ ءجۇردىم. اقىلى تۇردە موبيلوگرافيا, SMM كۋرستارىن وقىدىم. JOLTAP جوباسى اياسىندا ماعان زامان اعىمىنا ساي «تارگەت» كۋرسى قىزىعىراق كورىندى. دوستارىمىزدىڭ دا كاسىبى بار, مۇمكىن ولارعا دا پايدام تيەر. كۋرستى جاقسى مەڭگەرىپ, تارگەتولوگ بولىپ جۇمىس ىستەگىم كەلەدى. بۇل قولىمنان كەلەدى دەپ ويلايمىن, – دەيدى قاتىسۋشى.

داناگۇلدىڭ ايتۋىنشا, تارگەتولوگ ماماندىعى بويىنشا وقۋ باسقا ماماندىقتارعا قاراعاندا قيىنعا ءتۇسىپ وتىر. الايدا باستاپقى 3 ساباقتىڭ وزىنەن كوپ مالىمەت العانىنا قۋانىشتى.

جوبانىڭ تاعى ءبىر قاتىسۋشىسى ناتاليا گۋبار كۋرس وتە ءتيىمدى ەكەنىن ايتادى.

– مەن موبيلوگرافيا كۋرسىندا وقيمىن. بىزگە ۆيدەولاردى مونتاجداۋ جانە ءارتۇرلى ەففەكتىلەردى قولدانۋ ۇيرەتىلدى. بۇل وقۋدى وتە جاقسى كورەمىن. ءوزىم ريەلتورمىن, الەۋمەتتىك جەلىلەردە ءوز قىزمەتىمدى تانىستىرۋ ءۇشىن موبيلوگرافيا قاجەت. مەنىڭ ويىمشا, بۇل كۋرس وتە پايدالى بولادى. كەيبىر ايەلدەر ءتىپتى بالالارمەن ساباققا كەلەدى, سول سياقتى جاقىندا زەينەتكە شىققاندار دا ارامىزدا بار», – دەيدى ول.

استانا قالاسى اكىمدىگىنىڭ ماماندارى JOLTAP جوباسى ارقىلى قالاداعى جۇمىسسىزدىق پروبلەماسىن شەشۋدە جاقسى مۇمكىندىكتەرگە جول اشىلادى دەپ وتىر.

JOLTAP جوباسىنىڭ ءباسپاسوز قىزمەتى بىرنەشە جەردە ورنالاسقان «بارشاعا مۇمكىندىك» مودۋلدىك پۋنكتتەرىندە ازاماتتاردىڭ مەملەكەتتىك قولداۋ شارالارى جونىندە كەڭەس الىپ, وقۋعا جازىلا الاتىنىن حابارلادى. مۇنداي ورىندار – Ailand ودو, قورعالجىن تاسجولى, 2; Magnum سۋپەرماركەتى, ەدىل كوشەسى, 26; جاستار سارايى, رەسپۋبليكا داڭعىلى, 34; «تۇلپار» سو, ش.ءۋاليحانوۆ كوشەسى, 24; Euromall ءسۇ, قوسشىعۇل ۇلى كوشەسى, 24; «ۆسترەچا» ءسۇ, ابىلاي حان داڭعىلى, 31; Mechta ءسۇ, سىعاناق كوشەسى, 3; «ازيا پارك» سوو, قابانباي باتىر داڭعىلى, 21; «سايانۇر» بازارى, تىلەنديەۆ داڭعىلى, 24/5; «Big شانحاي» بازارى, الاش تاسجولى, 32ا مەكەنجايلارىندا.

قىسقا مەرزىم ىشىندە زاماناۋي مامان­دىقتىڭ يەسى اتانىپ, جۇمىسقا ورنا­لاسۋعا مۇمكىندىك بەرەتىن جوبا ءا دەگەننەن-اق قالا تۇرعىندارىنىڭ سۇرا­نىسىنا يە بولىپ وتىر. جوبا كەلەسى جىلى دا جالعاسىن تاپپاق. ۇيىمداستىرۋشىلار باعدارلاما اياسىندا 2024 جىلى 3 مىڭداي ادامدى وقىتۋدى جوسپارلاپ وتىرعانىن ايتادى.