جاستاردىڭ شىعارماشىلىق قابىلەتىن ۇشتاۋعا باعىتتالعان جوبا ەركىن فورماتتا وتۋىمەن ەرەكشەلەندى. ستۋدەنتتەر «دومبىرا پاتي» باعدارلاماسىندا اباي قۇنانباي ۇلى, ماحامبەت وتەمىس ۇلى, ءبىرجان سال دومبىرالارىنىڭ كوشىرمەلەرىندە ويناۋ مۇمكىندىگىنە يە بولسا, «ويشىلدار الاڭى» عىلىمي-تانىمدىق ويىنىندا تاپقىرلىقتارىن ورتاعا سالدى. كەشتىڭ كوركىن قىزدىرۋ ءۇشىن جوعارى وقۋ ورىندارى ستۋدەنتتەرىنەن قۇرالعان كۆن كوماندالارى «مۋزەي كۋبوگىن» ساراپقا سالىپ, قوعامداعى كەلەڭسىزدىكتەردى استارلى ازىلمەن سىنعا العان قىز-جىگىتتەر جينالعانداردى ءتانتى ەتتى. ال جوبانىڭ باس سەرىكتەسى – تەمىربەك جۇرگەنوۆ اتىنداعى قازاق ۇلتتىق ونەر اكادەمياسىنىڭ تالانتتى ستۋدەنتتەرىنىڭ شىعارماشىلىق كونتسەرتى كەش مازمۇنىن بايىتا ءتۇستى.
تاعىلىمدى شارا ءارى قاراي بىرنەشە جىلى جۇزدەسۋگە ۇلاستى. قازاق ونەرىنىڭ مايتالماندارى بولات ءابدىلمانوۆ, ەسەنگەلدى تۇياقوۆ, تانىمال بىلعارى قولعاپ شەبەرى قانات يسلام ستۋدەنتتەرگە ءوز ءومىر بەلەستەرى تۋرالى جارقىن ەستەلىكتەرمەن ءبولىسىپ, شەبەرلىك ساباقتارىن وتكىزدى.
– ستۋدەنتتىك شاق – ادام ءومىرىنىڭ ەڭ ءبىر شۋاقتى كەزەڭى. ونىڭ ۇستىنە الماتى – شىعارماشىل جاستاردىڭ قايناعان ورتاسى. تالانتتى ستۋدەنتتەردى ءبىر الاڭدا توعىستىرۋ, سول ارقىلى ولاردىڭ شىعارماشىلىق الەۋەتىن ارتتىرىپ, شابىتتاندىرۋ كوپتەن ويعا العان ءىسىمىز بولاتىن. جوبانىڭ ۇلت تاريحى مەن مادەنيەتىنىڭ ەڭ مايەكتى مۇرالارى ساقتالعان مۋزەيدە ءوتۋىنىڭ دە سيمۆوليكالىق ءمانى زور. جاستاردى حالقىنىڭ رۋحاني مۇراسىن تانىپ بىلۋگە, مۋزەي قىزمەتكەرىنىڭ كاسىبىنە دەگەن قىزىعۋشىلىقتارىن وياتۋعا سەپ بولعىمىز كەلدى. رۋحاني تانىمى بەرىك ۇرپاق – تاريحىمىز بەن مادەنيەتىمىزدىڭ ەرتەڭگى جاناشىرى. سول سەبەپتى دە قازاق ونەرىنە, سپورتىنا, مادەنيەتىنە قالتقىسىز قىزمەت ەتىپ كەلە جاتقان اعا-اپالارىن ارنايى شاقىرىپ, ستۋدەنتتەرگە موتيۆاتسيا بەرۋدى كوزدەدىك, – دەيدى مەملەكەتتىك ورتالىق مۋزەي ديرەكتورى راشيدا حاريپوۆا.
مۋزەيدىڭ بارلىق زالىن ەركىن ارالاعان قوناقتار اسەم ايشىقتارمەن بەدەرلەنگەن فوتوايماقتا سۋرەتكە ءتۇستى. ءىس-شارانىڭ ارنايى حەشتەگىن جەلىگە جۇكتەپ كوپ پىكىر مەن قارالىم جيناعان جاستارعا مۇراجايدىڭ «اشىق قور» جانە «انتروپولوگيا» زالدارىنا تەگىن بيلەت ۇسىنىلدى. تانىم ورداسىنا العاش اياق باسقان ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى الينا عالىمجانقىزى مۋزەيدەگى قىلقالام شەبەرلەرىنىڭ كلاسسيكالىق تۋىندىلارىن ءوز كوزىمەن كورگەنىنە ءدان ريزا. ول بۇدان بىلاي مۋزەيگە ايىنا ءبىر مارتە كەلىپ تۇرۋدى ادەتكە اينالدىرعىسى كەلەتىنىن ايتادى.
الماتى
