فوتو: almaty.tv
اۋەجايداعى بارلىق مىندەتتى راسىمنەن وتكەننەن كەيىن ازاماتتارعا ۋاقىتشا باسپانا بەرىلىپ, ولارعا قاجەتتى قۇقىقتىق, مەديتسينالىق جانە وزگە دە كومەك كورسەتىلدى. اسا اۋىر مىندەتتى قازاقستاننىڭ يزرايلدەگى, يوردانياداعى جانە مىسىرداعى ەلشىلىكتەرى ابىرويمەن ورىنداپ, اتالعان مەملەكەتتەردەگى ۋاكىلەتتى ورگاندارىمەن جانە حالىقارالىق ۇيىمدارمەن بىرلەسە ۇيلەسىمدى جۇمىس ىستەدى.
تاياۋ شىعىس ءوڭىرىنىڭ سىرتقى ساياسي ۆەدومستۆولارىنىڭ باسشىلىعىمەن كەلىسسوزدەر قورىتىندىسى بويىنشا ءسىم ازاماتتارىمىزدىڭ گازا سەكتورىنان قاۋىپسىز جانە ەش كەدەرگىسىز شىعۋى تۋرالى ۋاعدالاستىققا قول جەتكىزدى.
ايتا كەتەرلىگى, 15 قاراشادا ەۆاكۋاتسيانىڭ ءبىرىنشى كەزەڭى جۇزەگە اسىرىلعان-دى. ناتيجەسىندە, «رافاح» باقىلاۋ-وتكىزۋ پۋنكتى ارقىلى گازا سەكتورىنان مىسىر اۋماعىنا 92 قازاقستان ازاماتى مەن ولاردىڭ وتباسى مۇشەلەرى ءوتتى.
قازاقستان ديپلوماتتارى وتانداستارىمىزعا بارلىق قاجەتتى كونسۋلدىق-قۇقىقتىق جانە پسيحولوگيالىق كومەك كورسەتتى. شەكاراداعى راسىمدەردەن كەيىن ازاماتتارىمىز كولوننا قۇرامىندا جولعا شىعىپ, جاقىن ماڭداعى كاير قالاسىنا جەتكىزىلدى.
وسى ورايدا وتكەن اپتادا پرەمەر-ءمينيستردىڭ ورىنباسارى – سىرتقى ىستەر ءمينيسترى مۇرات نۇرتىلەۋ يزرايل سىرتقى ىستەر ءمينيسترى ەلي كوەنمەن تەلەفون ارقىلى سويلەسىپ, ەۆاكۋاتسيالاۋ ماسەلەسىن تالقىلاعان-تۇعىن.
سۇحبات بارىسىندا تاراپتار ساۋدا-ەكونوميكالىق, ينۆەستيتسيالىق جانە مادەني-گۋمانيتارلىق سالالارداعى ەكىجاقتى قارىم-قاتىناستاردىڭ ۇدەمەلى سيپاتىن اتاپ ءوتتى. يزرايل سىرتقى ىستەر ءمينيسترى تاياۋ شىعىستاعى يزرايل مەن پالەستينالىق حاماس قوزعالىسى اراسىنداعى قاقتىعىس اياسىنداعى قازىرگى جاعدايمەن تانىستىردى.
م.نۇرتىلەۋ قاقتىعىستىڭ شيەلەنىسۋىنە جانە اسكەري ءىس-قيمىل ايماعىنداعى جاعدايدىڭ ورشۋىنە الاڭداۋشىلىق ءبىلدىردى. ءسىم باسشىسى قازىرگى قاقتىعىسقا قاتىستى قازاقستاننىڭ ۇستانىمىن جەتكىزدى. مينيستر قاقتىعىسۋشى تاراپتاردى تاياۋ شىعىستا بەيبىتشىلىك پەن تۇراقتىلىقتىڭ جولدارىن ىزدەۋگە شاقىردى. بۇل ماسەلەنىڭ بۇكىل الەم قاۋىمداستىعى ءۇشىن جاھاندىق ماڭىزى بار ەكەنىنە نازار اۋداردى.
وسى تۇرعىدا قازاقستان ديپلوماتى پرەزيدەنت قاسىم-جومارت توقاەۆتىڭ تمد سامميتىندەگى مالىمدەمەسىن اتاپ ءوتىپ, جاعدايدىڭ شيەلەنىسۋى تاياۋ شىعىستا عانا ەمەس, جالپى الەمدە اۋىر زارداپتارعا اكەلۋى مۇمكىن ەكەنىن باسا ايتتى. وسىعان بايلانىستى قازاقستان يزرايل-پالەستينا شيەلەنىسىن بەيبىت كەلىسسوزدەر مەن ديپلوماتيالىق ديالوگ ارقىلى شەشۋگە بەيىلدى.
م.نۇرتىلەۋ يزرايلدىك ارىپتەسىنە گازا سەكتورىنداعى قازاقستان ازاماتتارىن ەۆاكۋاتسيالاۋعا جاردەمدەسۋ تۋرالى ءوتىنىش ءبىلدىرىپ, بۇل مىندەتتىڭ ەلىمىز ءۇشىن ءبىرىنشى كەزەكتەگى باسىمدىق ەكەنىن اتاپ ءوتتى. ول سونداي-اق ە.كوەندى قازاقستاندىقتاردىڭ وتانىمىزعا تەزىرەك ورالۋى بويىنشا مىسىر بيلىگىمەن جۇرگىزىلىپ جاتقان جۇمىس بارىسى تۋرالى حاباردار ەتتى. مينيستر ە.كوەن بەرىلگەن اقپارات ءۇشىن ارىپتەسىنە العىس ايتىپ, يزرايل تاراپى قازاقستان ازاماتتارىن ەۆاكۋاتسيالاۋ ماسەلەسىن شەشۋگە بار كۇش-جىگەرىن سالاتىنىن جانە بۇل ماسەلەنى ءوزىنىڭ جەكە باقىلاۋىنا الاتىنىن جەتكىزدى.
قازاقستاندىق ديپلوماتتار قاقتىعىس ايماعىندا قالىپ قويعان قازاقستان ازاماتتارىنا كومەك كورسەتۋ جانە ەۆاكۋاتسيالىق ءىس-شارالاردى ۇيىمداستىرۋ جونىندەگى جۇمىستى جالعاستىرادى.
