جەڭىس پەن ءۇمىت سىيلاعان كۇن

ويىن بارىسىندا تورەشى ىسقىرىعى ەستىلگەن بەتتە سان-مارينو ويىنشىلارى شابۋىلعا بىردەن لاپ قويدى. مۇندايدى كۇتپەگەن الاڭ قوجايىندارى بىرەسە دوپتى اۋتقا تەپسە, بىرەسە ءجاي عانا قارسىلاستار الاڭىنا اسىرۋمەن بولدى. الايدا فۋتبولشىلارىمىز تەز ارادا ەسىن جيىپ, شابۋىلعا كوشتى.

ابات ايىمبەتوۆ باستاعان ويىن­شىلار بىرنەشە رەت شابۋىلداعانىمەن بارلىعى دا ناتيجەسىز اياق­تالدى. ايت­كەنمەن, 19-مينۋتتا ەل فۋت­بول­شىلارى دەگەندەرىنە جەتتى. الەك­­ساندر زۋەۆ (قازاقستان) ايىپ الا­ڭىنىڭ بۇرىشىنان جويقىن سوققى جاساپ ەدى, سانمارينولىق قاقپاشى ەليا بەنەدەتتيني «سەيۆ» جاساپ, دوپتى ايىپ الاڭىنىڭ سىرتىنا شىعارىپ جىبەردى. الايدا دوپ يسلام چەسنوكوۆتىڭ اياعىنان تابىلا كەتتى. يسلام كوپ ويلانباي سول اياقپەن شىرەنە تەۋىپ, قازاقستاندى العا شىعاردى. وسى گولدان كەيىن ءبىرىنشى تايمدا ماگومەد اديەۆ شاكىرتتەرى قانشا شابۋىلداعانىمەن, ەسەپ وزگەرىسسىز قالدى. تايمنىڭ سوڭىندا ا.زۋەۆ جويقىن سوققى جاساعان, بۇل جەردە سان-مارينو قاقپاشىسى كەرەمەت «سەيۆ» جاسادى.

ەكىنشى تايمدا جەر­لەستەرىمىز شابۋىلدى ۇدەتتى. سونداي ۇرىمتال ساتتەردىڭ بىرىندە يسلام چەسنوكوۆ قاقپاعا تاعى دا الىستان سوققى جاساپ, گول سوقتى. وسى گولدان كەيىن ماگومەد اديەۆ ءۇش بىردەي ويىنشىنى الماستىرىپ, ەسەپتى ۇستاپ تۇرعىسى كەلدى. الايدا سيمونە فرانچوسي قورعاۋشىلارىمىز مەن قاقپاشىمىز جىبەرگەن قاتەلىكتى پايدالانىپ, ەسەپتى قىسقارتىپ ۇلگەردى – 2:1.

وسى ءدال سوققىدان كەيىن كاپيتان ابزال بەيسەبەكوۆ باستاعان فۋتبولشىلار بىردەن وزدەرىنە كەلە الماي, الاڭدا كوپ قاتەلەستى. شەشىم قابىلداۋعا اسىقپاي ءجۇرىپ الدى. ءتىپتى سان-مارينو دەڭگەيىنە ءتۇسىپ كەتكەندەي كورىندى بىزگە. ابىروي بولعاندا, ويىن سوڭىندا اۋستريالىق حارالد لەحنەر VAR جۇيەسى ارقىلى پەنالتي تاعايىنداپ, ونى ابات ايىمبەتوۆ ءساتتى ورىنداپ شىقتى. ەسەپ – 3:1, قازاق­ستان قۇراماسى ەۋرو-2024-كە شىعۋ جولىنداعى باسەكەنى جالعاستىرۋ مۇمكىندىگىنە يە بولدى.

ءدال وسى كۇنى ن توبىندا ونەر كور­سەتەتىن دانيا قۇراماسى كوپەن­گاگەندە سلوۆەنيا قۇراماسىن 2:1 ەسە­بىمەن جەڭىپ, ەۋرو-2024 دوداسى جول­داماسىنا يە بولدى. ەندى توپتاعى ەكىنشى جولداما ءۇشىن 20 قاراشادا سلوۆەنيا استاناسى ليۋبليانادا سلو­ۆەنيا (19 ۇپاي) مەن ­­­­­قازاقستان (18 ۇپاي) قۇرامالارى باق سىنايدى. بىزگە تەك جەڭىس كەرەك. سلوۆەنيانى تەڭ ويىن دا قاناعاتتاندىرادى.

ماگومەد اديەۆ, قازاقستان قۇراماسىنىڭ باس جاتتىقتىرۋشىسى:

– جانكۇيەرلەرگە العىسىمىز شەكسىز. بۇل – شىنىمەن ۇلكەن قولداۋ. ۇلتتار ليگاسىنان باستاعان جولىمىز ءالى ەسىمدە. قارسىلاسىمىز ازەربايجان بولىپ ەدى. سول كەزدە ستاديون مەنىڭ شاشىم سياقتى بولعان (كۇلەدى – رەد.). قاراۋ-قاراۋ كورەرمەن وتىرىپ ەدى. ال قازىر ەڭ ۇلكەن قۇراما كوماندانىڭ بىرىمەن ويناماساق تا, ەكى تاۋلىك ىشىندە بيلەتتىڭ ءبارى ساتىلىپ كەتكەن. ونىڭ ۇستىنە تاعى بيلەت سۇراپ جاتىر. «تىم بولماعاندا ءبىر بيلەت بەرىڭدەرشى» دەپ سۇراۋشىلار دا كوبەيگەن. مۇنىڭ بارلىعى – ءبىز ءۇشىن قىمبات دۇنيە, – دەدى ول.

باس جاتتىقتىرۋشى جانكۇيەرلەردىڭ ادالدىعىنا دا ريزا ەكەنىن اتاپ ءوتتى.

– كورەرمەندەردىڭ قارسىلاس كوماندالاردىڭ جۇلدىزدارىن كورۋگە ەمەس, ءوز قۇراماسىن قولداۋعا كەلە باستاعانىن كورىپ ءجۇرمىن. بۇل – ۇلكەن جەتىستىك. وسىنداي مارتەبەنى ۇستاپ تۇرۋ ءبىز ءۇشىن شىنىمەن دە ابىروي. سىزدەرگە كوپ راحمەت, – دەدى ماگومەد اديەۆ.

سونداي-اق ول كوماندا كوشباسشىلارىنىڭ ءبىرى اسحات تاعىبەرگەننىڭ ويىنعا ارالاسپاسا دا قۇراما ساپىندا جۇرگەنىنە بايلانىستى پىكىر ءبىلدىردى.

– مەن اسحاتقا ءبىزدىڭ قاسىمىزدا ءجۇر دەپ ايتتىم. سلوۆەنياعا دا الىپ بارامىز. ويتكەنى بىزگە ونىڭ الاڭدا عانا ەمەس, ونىڭ سىرتىندا دا بىرگە بولعانى ماڭىزدى. باحامەن (باقتيەر زاينۋتدينوۆ – رەد.) دە وسىنداي اڭگىمە بولدى. ول وسى ويىنعا كەلمەك بولعان. بىراق دارىگەرلەر جاراقاتى اۋىر بولعاندىقتان, ۇشپاۋعا كەڭەس بەرىپتى. سلوۆەنياعا ۇشىپ كەلەتىن شىعار دەپ ۇمىتتەنەمىز. وسىلايشا, بىرلىگىمىزدى پاش ەتكىمىز كەلەدى, – دەدى جاتتىقتىرۋشى.

ماگومەد اديەۆ ۇلتتىق قۇرامانىڭ وسىعان دەيىنگى جەڭىستەرىندە بۇكىل ۇجىمنىڭ ەڭبەگى جاتقانىن ايتتى.

– سان-مارينو كومانداسىنان قانداي ەسەپپەن باسىم تۇسكەنىمىز ماڭىزدى ەمەس. ماڭىزدىسى – 3 ۇپاي. بۇل – جالعىز اديەۆتىڭ نەمەسە جەكەلەگەن ويىنشىلاردىڭ فەنومەنى ەمەس. بۇل – بۇكىل قۇرامانىڭ فەنومەنى. ونىڭ سىرتىندا فەدەراتسيانىڭ ەڭبەگى بار, – دەدى ول.

دەرەكناما:

• قازاقستان مەن سان-مارينو ويىنىن الەمنىڭ 36 ەلىندە اقش, قىتاي, مەكسيكا, يسپانيا, فرانتسيا, يندونەزيا, سينگاپۋر, رەسەي, تۇركيا سىندى مەملەكەتتە تىكەلەي ەفيردە كورسەتتى.
• قازاقستان مەن سان-مارينو كەزدەسۋىنە باس تورەشى قىزمەتىن اۋس­تريالىق حارالد لەحنەر ات­قاردى. وعان وتانداستارى اندرەاس حاي­دەنرايح پەن ستەفان پيحلەر كومەك­شىلىك جاسايدى. قوسالقى تورەشى دە – اۋستريالىق سەباستيان گيشامەر.
• قازاقستان مەن سان-مارينو ويىنىن 30 100 ادام جانكۇيەرلىك تانىتتى. بۇعان دەيىن جانكۇيەر ەڭ كوپ جينالعان ويىن قازاقستان – فينليانديا كەزدەسۋىندە تىركەلىپ, سول جولى 30 019 جانكۇيەر ۇلتتىق قۇراماعا قولداۋ بىلدىرگەن ەدى.
• ماگومەد اديەۆ قازاقستان قۇراماسى تىزگىنىن ۇستاعالى ونىنشى جەڭىسىنە قول جەتكىزدى. رەسەيلىك مامان قازاقستان قۇراماسىنىڭ باس باپكەرى رەتىندە العاشقى ويىنىن 2022 جىلى 3 ماۋسىمدا استانادا, ۇلتتار ليگاسى ويىنى اياسىندا ازەربايجان قۇراماسىنا قارسى (2:0) وتكىزدى.
• قازاقستان قۇراماسىنىڭ جە­ڭىستەرى بويىنشا رەكوردقا قول جەت­كىزگەن باپكەرلەر: 1. ماگومەد اديەۆ – 10 جەڭىس (17 ماتچ); 2. ارنو پايپەرس – 7 جەڭىس (36 ماتچ); 3. سەرىك بەردالين – 6 جەڭىس (20 ماتچ); 4. ۆويت تالگاەۆ – 5 جەڭىس (9 ماتچ); 5. ميحال بيلەك – 5 جەڭىس (18 ماتچ); 6. ميروسلاۆ بەرانەك – 5 جەڭىس (24 ماتچ).