ال كەشە ەۆاكۋاتسيانىڭ ءبىرىنشى كەزەڭى جۇزەگە اسىرىلىپ, ناتيجەسىندە «رافاح» باقىلاۋ-وتكىزۋ پۋنكتى ارقىلى گازا سەكتورىنان مىسىر اۋماعىنا 92 قازاقستان ازاماتى مەن ولاردىڭ وتباسى مۇشەلەرى ءوتتى.
قازاقستان ديپلوماتتارى وتانداستارىمىزعا بارلىق قاجەتتى كونسۋلدىق-قۇقىقتىق جانە پسيحولوگيالىق كومەك كورسەتتى. شەكاراداعى راسىمدەردەن كەيىن ازاماتتارىمىز كولوننا قۇرامىندا جولعا شىقتى, ولار جاقىن ارادا كاير قالاسىنا جەتەدى.
ايتا كەتەتىن جايت, قازاقستان ازاماتتارىن گازا سەكتورىنان ەۆاكۋاتسيالاۋ كەزەڭ-كەزەڭمەن جۇرگىزىلىپ جاتىر. وسى ورايدا قازاقستان وكىلدەرى يزرايل, مىسىر, پالەستينا ۇلتتىق اكىمشىلىگىنىڭ قۇزىرەتتى ورگاندارىمەن جانە باسقا دا حالىقارالىق ۇيىمدارمەن قالعان وتانداستارىمىزدى انكلاۆتان ەۆاكۋاتسيالاۋ بويىنشا جۇمىستى جالعاستىرادى.
ءبىزدىڭ بارلىق ازاماتىمىز گازا سەكتورىنان كايرگە امان-ەسەن جەتكىزىلگەننەن كەيىن قازاقستان ۇكىمەتى ولاردى ەلگە جەتكىزۋ ءۇشىن ەۆاكۋاتسيالىق بورت جولدايدى.
«شەتەلدە قازاقستان ازاماتتارىنىڭ قۇقىقتارى مەن مۇددەلەرىن قورعاۋ – سىرتقى ىستەر مينيسترلىگى مەن ەلشىلىكتەرىنىڭ نەگىزگى مىندەتتەرىنىڭ ءبىرى. الدىن الۋ شارالارىن قابىلداۋ ءۇشىن ءبىز تاياۋ شىعىس وڭىرىندەگى جاعدايدى باقىلاپ وتىرمىز. وكىنىشكە قاراي, شيەلەنىس كۇشەيىپ كەلەدى», دەدى ا.سمادياروۆ.
سونداي-اق سالا وكىلى پالەستيناعا گۋمانيتارلىق كومەك كورسەتۋ ماسەلەسى تۋرالى اڭگىمەلەپ بەردى. وزدەرىڭىزگە ءمالىم, 7 قازاندا باستالعان قارۋلى قاقتىعىس تاياۋ شىعىس ونسىز دا كۇردەلى جاعدايدى ۋشىقتىرىپ, گازا سەكتورىندا گۋمانيتارلىق داعدارىس تۋدىردى.
«سوڭعى مالىمەتتەر بويىنشا قاقتىعىس سالدارىنان گازا سەكتورىندا 10 مىڭعا جۋىق ادام قازا تاۋىپ, 20 مىڭنان استام ادام جاراقات العان. قۇربانداردىڭ ۇشتەن ەكىسى – ايەلدەر مەن بالالار. پالەستينالىق بوسقىندارعا كومەكتەسۋ جانە جۇمىستاردى ۇيىمداستىراتىن بۇۇ تاياۋ شىعىس اگەنتتىگىنىڭ اقپاراتىنا سايكەس گازا سەكتورىنداعى حالىقتىڭ جاعدايى وتە كۇردەلى جانە 2 ميلليوننان استام ادام ازىق-ت ۇلىك كومەگىنە مۇقتاج.
باتىس, ازيا, افريكا جانە تاياۋ شىعىس ەلدەرى, اتاپ ايتقاندا پارسى شىعاناعى اراب مەملەكەتتەرىنىڭ ىنتىماقتاستىق كەڭەسى مەملەكەتتەرى, اقش, ەۋروپالىق وداق, كانادا, ۇلىبريتانيا, جاپونيا, رەسەي, قىتاي, تۇركيا جانە باسقالارى گازا سەكتورىندا جانە يوردان وزەنىنىڭ باتىس جاعالاۋىندا زارداپ شەككەن پالەستينا حالقىنا قارجىلىق جانە ماتەريالدىق گۋمانيتارلىق كومەك كورسەتۋ تۋرالى شەشىم قابىلدادى», دەدى ا.سمادياروۆ.
گازا سەكتورىنداعى اپاتتى گۋمانيتارلىق جاعدايدى ەسكەرە وتىرىپ, قازاقستان دا كومەك قولىن سوزدى. پالەستينا حالقىنا 1 ملن دوللار كولەمىندە گۋمانيتارلىق كومەك كورسەتۋگە شەشىم قابىلداندى. ەستەرىڭىزدە بولسا, بۇل شەشىمدى تۇركى مەملەكەتتەرى ۇيىمىنىڭ ح ءسامميتى اياسىندا قازاقستان پرەزيدەنتى قاسىم-جومارت توقاەۆ ايتتى.
