دودانىڭ العاشقى كۇنىندە رينگ تورىنە 48, 54, 67, 75, 86 كگ سالماقتاعى سپورتشىلار 1/8 فينالدىڭ جەكپە-جەكتەرىن وتكىزدى.
تۋرنير بارىسىندا ەل چەمپيونى نۇرسۇلتان التىنبەك (54 كگ), «Elorda Cup» باسەكەسىنىڭ جەڭىمپازى تيمۋر قابدەش (54 كگ), جاستار اراسىندا قازاقستان چەمپيونى ارمات ارمان ۇلى (75 كگ), تيمۋر نۇرسەيىتوۆ (75 كگ), امانبەك قازانعاپوۆ (86 كگ) سىندى تاجىريبەلى بوكسشىلار جارىستى ءساتتى باستادى. ال 75 كيلو سالماقتا فاۆوريتتەردىڭ قاتارىنان سانالعان اياتۋللا تاكىجانوۆ تارتىستى ايقاستا جاستار اراسىنداعى ازيا چەمپيونى باقبەرگەن الياسقاروۆقا 1:4 ەسەبىمەن جول بەردى.
جارىستىڭ ەكىنشى كۇنىندە 51, 57, 60 جانە 71 كگ سالماق دارەجەسىندەگى بوكسشىلارىمىز سىنعا ءتۇستى. ەندى 51 كگ سالماقتا الەم چەمپيونى ساكەن بيبوسىنوۆ شيرەك فينالدا 20 جاستاعى پاۆلودار بوكسشىسى عابباس ديۋسەكەنوۆپەن جۇدىرىقتاسادى. تاعى ءبىر الەم چەمپيونى سانجار تاشكەنباي دا بىلتىرعى قازاقستان چەمپيوناتىنىڭ ءفيناليسى (54 كگ) بەكزات الدامجاروۆپەن جولىعادى. سەبەبى ع.ديۋسەكەنوۆ پەن ب.الدامجاروۆ العاشقى جەكپە-جەكتەرىندە قارسىلاستارىنان ايلاسىن اسىردى. 57 كگ سالماقتا الىشەر نۇرتازيننەن باسىم تۇسكەن دۋلات تۇرلىبەك ۇلىنىڭ ەندىگى قارسىلاسى الەم چەمپيونى ماحمۇد سابىرحان بولماق.
ال 60 كگ سالماقتا قازاقستان چەمپيونى ادىلەت قۇرمەتوۆ پەن 19 جاستاعى المات ءابدۋالي اراسىنداعى ايقاستا كۇتپەگەن ناتيجە تىركەلدى. شوقىر بولتەك ۇلى ءتۋرنيرىنىڭ جەڭىمپازى المات تاجىريبەلى قارسىلاسىنان باسىم ءتۇسىپ, جۇلدەدەن دامەلى جاستاردىڭ بار ەكەنىن تاعى ءبىر دالەلدەدى.
سونداي-اق 71 كگ سالماقتا 2021 جىلعى قازاقستان چەمپيوناتىنىڭ ءفيناليسى قۋان قۋاتوۆ ەكى جىل قاتارىنان ەل بىرىنشىلىگىنىڭ قولا جۇلدەگەرى فاررۋح توقتاسىنوۆقا جول بەرىپ, جارىستى ەرتە اياقتادى.
جالپى, بۇرناعى كۇنى فاۆوريتتەردىڭ قاتارىنان سانالعان ەربولات سابىر, اسىلجان سەرىكباي, تالعات سىرىمبەتوۆ, دارحان دۇيسەنباي, تالعات شايكەن كەلەسى كەزەڭگە سۇرىنبەي ءوتتى.
كەشە 63,5, 67, 80, 92, +92 كگ سالماقتاعى ءساناتالى تولتاەۆ, سەرىك تەمىرجانوۆ, مۇحاممەدسابىر بازارباي ۇلى, دۋلات بەكباۋوۆ, بەكزات نۇرداۋلەتوۆ, تۇرسىنباي قۇلاحمەت, بەكبولات ابدىكەرىم سىندى الەمدە, ازيادا, قازاقستان چەمپيوناتىندا جۇلدە الىپ جۇرگەن تانىمال بوكسشىلار رينگ تورىنە كوتەرىلدى.
63,5 كگ سالماقتاعى قازاقستاننىڭ بىرنەشە دۇركىن چەمپيونى, الەم چەمپيوناتىندا ەكى رەت قاتىسقان س.تولتاەۆ الداعى ۋاقىتتا باپكەرلەردىڭ كوزىنە ءتۇسۋ ءۇشىن تاجىريبەسىن شىڭداماسا بولمايتىن سەكىلدى. سەبەبى ول سپارتاكياداعى العاشقى ايقاستا الماتىلىق جاندوس قىدىراليەۆتەن ايلاسىن اسىرا الماي, جارىستى ەرتە اياقتادى.
ال الەم جانە ازيا چەمپيوناتىنىڭ كۇمىس جۇلدەگەرى سەرىك تەمىرجانوۆ استانا تورىندەگى دودادا 57 كگ-دان 63,5 كگ سالماققا اۋىسىپ, العاشقى كەزدەسۋىن وتكىزدى. اياقالىسى دا جامان ەمەس. جامبىلدىق سپورت شەبەرى الماس دۇيسەنقۇلعا قارسى وتكىزگەن سەرىك ءۇش راۋند بويى بەلسەندى بولدى. بىرەسە وڭ قولمەن, بىرەسە سول قولمەن ءدال سوققى جاساپ تورەشىلەردىڭ كوزىنە تۇسسە, ەكىنشى راۋندتا جاقىن قاشىقتا ءجۇرىپ, ا.دۇيسەنقۇلدىڭ بەتىن قىزاناقتاي قىزىل ەتتى. بىراق جاڭا سالماققا اۋىسقان سەرىككە الەمدىك دەڭگەيدە ونەر كورسەتۋ ءۇشىن ءالى دە تاجىريبەسىن شىڭداي ءتۇسۋ كەرەك سەكىلدى كورىندى, بىزگە.
كەشكى سەسسيادا وتكەن قالعان بىرنەشە ماڭىزدى جەكپە-جەكتىڭ ناتيجەسىن گازەتىمىزدىڭ كەلەسى نومىرىندە جاريالايتىن بولامىز.
