سولتۇستىك وڭىرگە بوكس كەرەك ەمەس
مىنا قىزىقتى قاراڭىز. بوكس فەدەراتسياسىنىڭ مالىمەتىنشە, بۇعان دەيىن قازاقستان چەمپيوناتىنا 17 وبلىس پەن 3 مەگاپوليستەن بوكسشىلار ۇنەمى باقتارىن سىنايتىن ەدى. وكىنىشكە قاراي, بۇل جولى سولتۇستىك قازاقستان وبلىسىنان سپورتشىلار دا, باپكەرلەر دە كەلمەدى. سەبەپ – بىرەۋ. قازاقستان چەمپيوناتى دەڭگەيىندە سىنعا تۇسەتىن وبلىستا بىردە-ءبىر بوكسشى جوق ەكەن. سوندا ءوڭىردىڭ سپورت باسقارماسى باسشىلارى قايدا قاراپ وتىر؟ بۇل ماسەلەنى الداعى ۋاقىتتا ساراپتاۋ قاجەت. بوكستان مەملەكەتتىك جاتتىقتىرۋشى مەرەي اقشالوۆتىڭ ايتۋىنشا, بۇعان دەيىن مۇنداي ولقىلىق بولماعان جانە سولتۇستىكقازاقستاندىق سپورت سالاسىنىڭ باسشىلارى جۇمىس ىستەمەي وتىر.
جالپى, چەمپيوناتقا تەك ءۇش ءوڭىر – تۇركىستان مەن جامبىل وبلىسى جانە الماتى قالاسى عانا تولىق قۇراممەن كەلگەن. بوكس دەرجاۆاسىمىز دەپ قۇر كەۋدە كەرە بەرمەي, اتالعان ماسەلەنى جەرگىلىكتى سپورت باسقارماسىنىڭ باسشىلارى شەشۋ كەرەك دەپ ويلايمىز.
سپارتاكياداعا 177 بوكسشى قاتىسىپ جاتقانىن ايتتىق. ال سالىستىرمالى تۇردە ايتساق, وزبەكستاننىڭ بوكس فەدەراتسياسىنىڭ ۆيتسە-پرەزيدەنتى, قانداسىمىز ساكەن بولاتوۆتىڭ ايتۋىنشا, 2022 جىلى وزبەكستان چەمپيوناتىنا 300 بوكسشى قاتىسسا, 2023 جىلعى چەمپيوناتقا 450 بوكسشى قاتىسادى دەپ كۇتىلىپ وتىر.
جارىستان كىمدەر بوساتىلدى؟
ال ۇلتتىق قۇرامادان 63,5 كگ سالماقتاعى ەرتۋعان زەينۋللينوۆ قاباعىن جارىپ الۋىنا بايلانىستى تۋرنيردەن شەت قالۋىنا تۋرا كەلگەن. پاريج وليمپياداسىنىڭ ليتسەنزياسىن العان اسا اۋىر سالماقتاعى قامشىبەك قوڭقاباەۆقا, 71 كگ سالماقتا باق سىنايتىن, كوماندا كاپيتانى اسلانبەك شىمبەرگەنوۆكە ەشكىمنىڭ ارتىق ءسوزى جوق. سوندىقتان ولار جارىستان بوساتىلىپتى.
بوكستان ەلىمىزدىڭ ۇلتتىق قۇراماسىنىڭ باس باپكەرى مىرزاعالي ايتجانوۆتىڭ ايتۋىنشا, بەس سالماق بويىنشا (51 كگ, 57 كگ, 63,5 كگ, 80 كگ, 92 كگ) چەمپيون اتانعاندار كەلەر جىلدىڭ اقپان ايىندا يتاليادا وتەتىن وليمپياداعا جولداما ۇيلەستىرەتىن تۋرنيرگە قاتىسادى.
– ءتورت جىلدا ءبىر رەت وتەتىن جازعى سپارتاكيادا ويىندارى بۇعان دەيىن 2019 جىلى قىزىلوردا قالاسىندا ۇيىمداستىرىلعان ەدى. بيىل بۇل سايىستى استانا قابىلداپ وتىر. جالپى, سپارتاكيادادا 27 سپورت ءتۇرى قامتىلادى. الەم چەمپيوناتى, حانچجوۋداعى ازيا ويىندارىنا بايلانىستى بوكس سايىسى كۇزدىڭ سوڭعى ايىندا وتكىزىلىپ وتىر, – دەپ اڭگىمەسىن باستاعان مىرزاعالي قۇلان ۇلى سپارتاكياداعا كىل مىقتىلار جينالعانىن ايتتى. – بوكستان بيىلعى VI جازعى سپارتاكيادا ويىندارى قىزىقتى وتەتىنىنە سەنىمدىمىن. سەبەبى بىرىنشىدەن, 2020 جىلدان بەرى ۇلتتىق قۇرامانىڭ بەلدى سپورتشىلارى ەل چەمپيوناتىنا قاتىسپاي كەلدى. ويتكەنى 2021 جىلى توكيو وليمپياداسى مەن الەم چەمپيوناتى قاتار بولسا, 2022 جىلى ازيا بىرىنشىلىگى ۇيىمداستىرىلدى. ول جەردە جۇلدە العان سپورتشىلار اۆتوماتتى تۇردە قازاقستان چەمپيوناتىنان بوساتىلدى. بيىل دا بوكسشىلار الەم چەمپيوناتى جانە ازيا ويىندارىنا قاتىسقانىمەن, ليتسەنزيا الا الماعان بوكسشىلار قايتا وزدەرىن دالەلدەۋگە ءتيىس. ەكىنشىدەن, كاسىپقوي رينگتە جۇرگەن بەكزات نۇرداۋلەتوۆ, تۇرسىنباي قۇلاحمەت, نۇرسۇلتان امانجولوۆ سەكىلدى بوكسشىلار اۋەسقويدا قايتا ءوز مۇمكىندىكتەرىن بايقاپ كورۋگە بەل بۋىپ وتىر. بۇل دا سپارتاكيادانىڭ شىرايىن كەلتىرەدى دەپ ويلايمىن.
التى بىردەي الەم چەمپيونى
ءيا, راسىندا دا بيىلعى سپارتاكيادانىڭ دەڭگەيى جوعارى وتەتىنىنە سەنىم مول. سەبەبى التى بىردەي الەم چەمپيونى مىقتى ەكەندەرىن وسى سپارتاكيادادا دالەلدەۋى كەرەك.
اسىرەسە ءبىر عانا 80 كگ سالماقتىڭ وزىندە الەم, ازيا چەمپيوناتىندا اتوي سالعاندار تولىپ جاتىر. باس باپكەر ايتقانداي, تۇرسىنباي قۇلاحمەت 2019 جىلى الەم چەمپيوناتىنىڭ قولا جۇلدەگەرى بولسا, بەكزات نۇرداۋلەتوۆ – 2019 جىلعى الەم چەمپيونى. سوندىقتان بۇل بوكسشىلاردىڭ كاسىپقوي رينگتە جۇرگەنىمەن, ءالى دە ايتارى بار. سونداي-اق 2023 جىلعى الەم چەمپيونى نۇربەك ورالباي – وسى سالماقتىڭ باستى ءفاۆوريتى. 2022 جىلعى قازاقستان چەمپيونى, 22 جاسقا دەيىنگى جاستار اراسىندا ازيا چەمپيوناتىنىڭ قولا جۇلدەگەرى ەراسىل جاقپەكوۆ تە قارا جاياۋ ەمەس. سپارتاكيادا دا جانكۇيەرلەر ءدال وسى 80 كيلوداعى جەكپە-جەكتەردى كۇتەتىنى انىق.
تاعى ءبىر جانكۇيەرلەر تاعاتسىزدانا كۇتىپ وتىرعان سالماق ول – 51 كگ. بۇل سالماقتا الەم چەم-پيوندارى – ساكەن بيبوسىنوۆ پەن سانجار تاشكەنباي, ازيانىڭ كۇمىس جۇلدەگەرى دانيال ءسابيت بار. ازيا ويىندارىندا ءساتسىز ونەر كورسەتكەننەن كەيىن جانكۇيەرلەر تاراپىنان «ساكەننىڭ ورنىنا سانجار بارۋى كەرەك ەدى» دەگەن كوپتەگەن سىن ايتىلعان ەدى. سول ايتىلعان سىنعا جانكۇيەرلەر سپارتاكيادا جاۋابىن تابادى.
ونىڭ سىرتىندا الەم چەمپيوندارى – تەمىرتاس ءجۇسىپوۆ (49 كگ) پەن سابىرحان ماحمۇت (57 كگ), الەم چەمپيوناتىنىڭ كۇمىس جۇلدەگەرلەرى سەرىك تەمىرجانوۆ (63,5 كگ) پەن دۋلات بەكباۋوۆ (67 كگ) سەكىلدى جاھان جارىسىندا اتوي سالعانداردا استانادا وزدەرىنىڭ مىقتى ەكەندىكتەرىن تاعى ءبىر دالەلدەۋى كەرەك.
نەشە بوكسشى باق سىنايدى؟
ءتۋرنيردىڭ قىزىقتى ءوتىپ جاتقانىن جارىستىڭ ءبىرىنشى كۇنىنە-اق بايقادىق. سەبەبى سايىسقا قوسىلعان جاستار وزدەرىن ەرەسەكتەردەن ەش كەم ەمەس ەكەندىكتەرىن دالەلدەۋدە. سولاردىڭ ءبىرى جاستار اراسىندا ازيا چەمپيونى باقبەرگەن الياسقاروۆ 75 كگ سالماقتا ۇزاق جىلدار بويى قۇرامادا جۇرگەن اياتوللا تاكىجانوۆتى 4:1 ەسەبىمەن جەڭىپ, ءارى قاراي جارىستى جالعاستىرۋعا مۇمكىندىك الدى. ودان باسقا فاۆوريت سانالعان بوكسشىلار جارىستان شىعىپ قالعان جوق.
جوعارىدا 177 بوكسشى باق سىناپ جاتقانىن ايتتىق. قاي سالماقتا نەشە بوكسشى باق سىناپ جاتقانىنا توقتالساق, 48 كگ – 13, 51 كگ – 11, 54 كگ – 16, 57 كگ – 14, 60 كگ – 16, 63,5 كگ – 16, 67 كگ – 18, 71 كگ – 15, 75 كگ – 15, 80 كگ – 14, 86 كگ – 10, 92 كگ – 10, +92 كگ-دا 9 بوكسشى رينگكە شىعادى.
جارىستىڭ 1/8 جانە شيرەك فينالدىق كەزدەسۋلەرىن الداعى نومىردە تولىققاندى جاريالايمىز.
