اتباسار قالاسىنداعى №5 ورتا مەكتەپتى بىتىرگەننەن كەيىن قاراعاندى قالاسىنداعى ە.بوكەتوۆ اتىنداعى مەملەكەتتىك ۋنيۆەرسيتەتتى ءتامامداپ, دەفەكتولوگيا ماماندىعى بويىنشا ديپلوم الدى. وقي ءجۇرىپ «التىن بەسىك» بوبەكجايىندا تاجىريبەدەن ءوتتى. ءوزىنىڭ ايتۋىنا قاراعاندا, العاشقىدا وتە قيىن بولعانعا ۇقسايدى. مۇنداي بالالارمەن جۇمىس ىستەۋ وڭاي ەمەس قوي.
– سابيلەر ەس بىلە كەلە ءارتۇرلى دىبىستاردى قۇلاقتارى شالادى ەمەس پە؟ بىرتە-بىرتە سول دىبىستاردى وزدەرى دە ايتىپ جەتكىزگىلەرى كەلەدى. دۇرىس سويلەي بىلسە, ءبىر ءجون. مۇنداي جاعدايدا وزدەرىنىڭ جاتىق, انىق سويلەيتىندەرىنە سەنىمى مولايماق. ال ەگەر كەيبىر دىبىستاردى ايتا الماي جاتسا, قاتتى قىسىلادى. مىنە, وسى كەزدە بالانىڭ جانىن الدەبىر نازىك سەزىممەن قابىلداي ءبىلۋ كەرەك. سوندا عانا ەڭبەگىڭ ناتيجەلى بولىپ, ءتالىم-تاربيەڭدى كورگەن ءبۇلدىرشىن كەمشىلىكتەن ارىلادى, – دەيدى اتباسار قالاسىنداعى «ەركەجان» بوبەكجايىنىڭ لوگوپەدى مارينا ەدۋاردوۆنا.
تاجىريبەلى ماماننىڭ ايتۋىنشا, كەيىنگى جىلدارى مۇنداي كەمىستىك بەلەڭ الىپ كەتتى. عالىمداردىڭ دايەكتى زەرتتەۋلەرىنە قاراعاندا, دامۋىندا ءتۇرلى كەمىستىگى بار بالالاردىڭ سانى ۋاقىت وتكەن سايىن كوبەيىپ كەلەدى.
– مارينا ەدۋاردوۆنا – ءوز ءىسىنىڭ شىنايى شەبەرى. تەوريالىق جانە تاجىريبەلىك دايىندىعى مول, ءوز ءبىلىمىن ساراپقا سالىپ ءجۇر. وبلىس ورتالىعىندا وتەتىن سەمينارلارعا قاتىسىپ, وسى ماسەلەنى ىندەتە زەرتتەپ, اۆتورلىق باعدارلاماسىن دايىندادى. رەسپۋبليكالىق باسىلىمداردا زەرتتەۋ ەڭبەكتەرى جارىق كوردى. رەسپۋبليكالىق پەداگوگيكالىق كونكۋرستا ءبىرىنشى دارەجەلى ديپلومعا يە بولدى, ودان وزگە دە ماراپاتتارى از ەمەس. ەڭ باستىسى, اتا-انالاردىڭ العىسىنا يە بولىپ ءجۇر, – دەيدى «ەركەجان» بوبەكجايىنىڭ مەڭگەرۋشىسى گۇلدەن قاسىموۆا.
تىلىندە مۇكىستىگى بار بالالارمەن مامىراجاي وتىرىپ, ەمىن-ەركىن كوبىرەك اڭگىمەلەسۋ كەرەك ەكەن. ولاردىڭ بويىنداعى كىشكەنتاي كەمشىلىكتى نۇسقاپ كورسەتۋ دە قاجەتسىز. بۇل ارادا قامىردان قىل سۋىرعانداي ەپتىلىك كەرەك. وكىنىشكە قاراي, تىرشىلىك قامىمەن جۇرگەن اتا-انالار باۋىر ەتى بالالارىنىڭ بۇل كەمشىلىگىنە كوڭىل بولە بەرمەيدى. ىلكى زاماندا بالالارمەن ءتىل ۇستارتۋ تاقىرىبىندا ادەيىلەپ جۇمىس ىستەمەسە دە, جانىن باۋرايتىن ادەمى ەرتەگىلەر ايتقىزاتىن. ال اقيقاتىندا ەكى جاسقا دەيىنگى بالانىڭ بال كۇلكىسى, الدەنەنى بىلدىرلاپ ايتقانى قۇلاققا جاعىمدى ەستىلەدى. ەكى جاستان اسقان سوڭ بالا ءالى دە بىلدىرلاپ جۇرسە, وندا لوگوپەدتىڭ كومەگىنە جۇگىنگەن ءجون.
– بالانىڭ قاتارىنان قالماي دامىعانى كەز كەلگەن اتا-انا ءۇشىن – ۇلكەن قۋانىش. ءبىز ءوز پەرزەنتىمىزدى «ەركەجان» بوبەكجايىنا بەرگەن كەزدە مارينا ەدۋاردوۆنانىڭ جۇمىس ىستەيتىنىن بىلدىك. ول بالالارمەن دە, اتا-انالارىمەن دە ءتىل تابىسا بىلەدى. ءاربىر بالامەن جەكە-جەكە جۇمىس ىستەيدى. ءبىز ۇنەمى باقىلاپ جۇرەمىز. سوندىقتان دا ماماننىڭ ءاربىر تابىسى ءبىز ءۇشىن, ءبىزدىڭ بالالارىمىز ءۇشىن جاسالىپ جاتقان جاناشىرلىق دەپ قابىلدايمىز, – دەيدى اتا-انانىڭ ءبىرى يۋليا مولچانوۆا.
ءسوز اراسىندا تۇيگەنىمىز, مارينا ەدۋاردوۆنانىڭ ءوزى ۇستازدار اۋلەتىنىڭ وكىلى ەكەن. اجەسى قىرىق جىل بويى ورىس ءتىلى مەن ادەبيەتىنەن ساباق بەرسە, اناسى بار عۇمىرىن مەكتەپكە دەيىن مەكەمەدە تاربيەشى بولىپ وتكەرگەن. ىلكىدەن جالعاسقان ىلكىمدى جۇمىس وسىلايشا كوكتەپ, كوگەرىپ كەلەدى. بار جاقسىلىق شاراپاتى ەل ەرتەڭى بالالارعا تيۋدە.
اقمولا وبلىسى,
اتباسار قالاسى
