سوڭعى رەت قوڭىراۋ سوققانىمىزدا تۇتقانى شاكىرتى كوتەردى. «شاكىرت» دەيمىز-اۋ, ايتپەسە شاكىرتىنىڭ ءوزى – بۇگىنگى ءتىل عىلىمىنداعى شوقتىعى بيىك تۇلعالاردىڭ ءبىرى, فيلولوگيا عىلىمدارىنىڭ دوكتورى, پروفەسسور. بۇيىمتايىمىزدى تىڭداپ الدى دا: «سۇراقتارىڭىزدى الدىن الا دايارلاپ, قاعازعا جازىپ بەرسەڭىز دۇرىس بولار ەدى. مەن اپايدىڭ قولىنا تابىستايمىن», دەدى. دايىندىقپەن جاسالاتىن سۇحباتتىڭ ءدامسىز, قۇرعاق بولاتىنىن ايتىپ, بەتپە-بەت جۇزدەسىپ, تىكەلەي اڭگىمەلەسۋدىڭ ءجونى بولەك ەكەنىن تۇسىندىرۋگە تىرىسىپ جاتىرمىز. «جوق!» دەگەن سوزىنەن تانبادى شاكىرتى. ء«تۇسىنىڭىز, اپايدىڭ جاسى توقساننان اسىپ, جۇزگە تايادى, ابدەن قارتايدى. ساناسى ءالى دە ساعات سەكىلدى سارتىلداپ تۇرعانىمەن, اڭگىمە ەكپىنىمەن, ەت قىزۋىمەن ابايسىزدا ءبىر ءسوزى ءسال قيسىق ايتىلىپ قالسا, ول ەرتەڭ باسپاسوزدە جاريالانسا, بۇكىل قوعام عىلىمعا سىڭىرگەن ەڭبەگىن بىلاي ىسىرىپ قويىپ, سول ءسوزدىڭ تونىن تەرىس اينالدىرىپ, بۇرمالاپ, عالىمنىڭ وزىنە تارپا باس سالادى. جەكە باسىنا ءوتىپ, جۇندەي تۇتەدى. ەندى قارتايعان شاعىندا ۇستازىمىزدىڭ ءازيز باسىن الەكەدەي جالانىپ پالە ىزدەگەندەردىڭ قولجاۋلىعىنا اينالدىرا المايمىز!»
اياۋلى ۇستازىنىڭ ابىرويىن قوعامنىڭ قورقاۋلىعىنان قىزعىشتاي قورىعان شاكىرتتىڭ ادالدىعى ءسۇيسىنتتى. 80-جىلدارى كەڭەستىڭ قاھارىنان قورىقپاي, قاناتىمەن سۋ بۇرىككەن قارلىعاش سياقتى ارالدىڭ قاسىرەتىن ايتىپ شىرىلداعانىن, جەلتوقساندا ۇستانىمىن اشىق ايتقان ازاماتتىق بەلسەندىلىگىن, جالپى ونەرگە سىڭىرگەن ەڭبەگىن تۇتاس تارك ەتىپ, تەك «اق پاتشا» دەگەن اڭگىمەنى الدىعا شىعاراتىنداردىڭ روزا باعلانوۆاعا جاساعان قياناتى ەسكە ءتۇستى. بالا سەكىلدى كوڭىلى تازا, جانى نازىك اپامىز سۇحبات سۇراعانداردىڭ بەتىن قايتارماي, سوڭىرا ءوزى سىننىڭ استىندا قالاتىن.
بەس-التى جىل ىلگەرىدە شاكىرتپەن بولعان سول اڭگىمە بۇگىنگىمەن سالىستىرعاندا ءالى دە بولسا «يمان-تارازى» ەكەن. باسقانى قويعاندا, ابايدىڭ ءوزىن ايامايتىندارعا قالعان قازاق بۇيىم بولىپ پا؟ «بۇگىندە كىم تۋرالى نە ايتىلماي جاتىر» دەپ نازار اۋدارماۋعا تىرىسقانمەن, قاريا جاسىنا جەتكەن كورنەكتى تۇلعالاردى ستۋديالارىنا شاقىرىپ الىپ, شەتىنەن ورعا يتەرىپ, جارعا جىعىپ جاتقانىن قاي ادامدىققا جاتقىزۋعا بولادى؟
اقساقال تۇلعالار از قالدى. دەنىن حالىقتىڭ ءوز ماحابباتى قورعاپ تۇر. قالعانى ءوزىن-ءوزى قورعاماسا, قايران جوق. قاتارداعى قاراپايىم ەڭبەك ادامىنا كەشىرىلەتىن قاتەلىك ەل الدىنداعى زيالى مەن مەملەكەت تۇتقاسىن ۇستاعان قايراتكەرگە كەشىرىلمەيدى. اۋزىنا تاۋبە ۇيالاعان اقساقالعا اسا بەلسەندىلىك جاراسپايدى, قولقا سالعانعا قولق ەتىپ, شاقىرعانعا شابا جونەلمەي, سابىر ساقتاعانى دا دۇرىس-اۋ. كوپتى كورگەنى دە راس, كوپ بىلەتىنىنە دە سەنەمىز, كەڭەسى دە ماڭىزدى, اقىلى دا قونىمدى. بىراق بەتىنە قاراپ تەلمىرتىپ, اياعىنا باس ۇرعىزىپ قويعان الەۋمەتتىك جەلىدە اۋىزدان شىققان ءسوزدى دوپشا دومالاتىپ, ءسوز ويناتۋعا قۇمار قوعامداستار سول اقىلدى قاجەتسىنە مە ءوزى؟
ماحامبەتتىڭ «ارعىماق, سەنى ساقتادىم, قۇلاعىڭ سەنىڭ سەرەك دەپ. ازامات, سەنى ساقتادىم, ءبىر كۇنىمە كەرەك دەپ...» دەگەن ايگىلى ولەڭى ويعا ورالادى وسىندايدا. ەسكى قازاقتىڭ دۇنيەتانىمىندا تۇرعان «جاقسىنىڭ قادىرىنە جەتۋ» دەگەن ۇعىمدى, بۇگىنگى تىلمەن ايتقاندا, وتكەن عاسىردا ءومىر سۇرگەن الداسپان اقىن «ازامات» دەپ زيالىلاردى, ءسۇتتىڭ بەتىنە شىعار قايماقتى, جاقسى مەن جايساڭدى مەڭزەپ تۇر. ازامات – مەملەكەتشىل تۇلعا, ەلدىڭ ابىرويى. جاقسىلار ءبىزدىڭ ءار كۇنىمىزگە كەرەك, كەيىنگى جۇزجىلدىقتارعا كەرەك.
امەريكانىڭ قازىرگى ۇلتتىق بايلىعى – كينوسى دەسەك, سول كينونى تۋدىرعان سۋرەتكەر رەجيسسەرلەردى, قوعامىنىڭ شىندىعىن كورسەتە العان تاريحي, مادەني ماڭىزى بار, بۇگىنگى امەريكا كينوسىنىڭ قۋاتىن كورسەتە الاتىن فيلمدەردى, ءتىپتى شوۋ-ءانشى مادوننانى, «Queen» توبىنىڭ مۋزىكاسىن اقش كونگرەسى «ۇلتتىق بايلىق» دەپ جاريالاپتى. اعىلشىندار ايگىلى جازۋشى اگاتا كريستيدى «ۇلتتىڭ بايلىعى» ەليزاۆەتا پاتشايىممەن تەڭ ساناپ, قالامگەردىڭ اتى مەن ادەبي مۇراسىن مەملەكەت زاڭىمەن قورعاپ وتىر. بۇل ادامدار ەلگە ۇلكەن قارجى, مارتەبە, بەدەل اكەلەدى. بىزدە ءدال قازىر ەلگە بەدەل اكەلگەن, مارتەبە سىيلاعان ديماش بولىپ تۇر. ديماشتاي كورنەكتى ازاماتىمىزدى دا كورە الماي, كۇڭكىل سوزبەن كۇندەپ وتىراتىندار جەتەدى.
قازاقتىڭ تالاي ازاماتى قۋعىن-سۇرگىنگە ۇشىرادى. جوسپارلى-جوسپارسىز اجال قۇشقاندار قانشاما. ءتىرىسى ءتىپتى كوپ ەمەس, جاماندىعىن تەرگىشتەمەي, كەسەك دۇنيەسىن كۇندە ايتىپ, ولاردى ونلاين-اگرەسسيادان قورعاپ وتىرۋ سانالىلاردىڭ ءبىر مىندەتىنە اينالسا قانەكي...
