اتىراۋ وبلىسىندا جىل باسىنان بەرى 50 مىڭنان اسا ادام سكرينيگتىك تەكسەرۋدەن ءوتىپ ۇلگەرگەن. وبلىستىق كارديولوگيا ورتالىعىنىڭ دارىگەرى, كارديولوگ ايدانا ءىزمۇحانوۆانىڭ ايتۋىنشا, سكرينينگتىك تەكسەرۋگە 30-70 جاس ارالىعىنداعى تۇرعىندار جۇگىنگەن. تەكسەرۋدەن وتكەندەردىڭ اراسىندا 2 300-گە جۋىق ادام جۇرەك اۋرۋىمەن تىركەلگەن.
«كەيىنگى جىلدارى الەمنىڭ كوپتەگەن ەلىنىڭ دەنساۋلىق سالاسىندا جۇرەك-قان تامىرى اۋرۋلارى باستى ماسەلەنىڭ بىرىنە اينالدى. بۇل اۋرۋ ەرەسەك ادامداردى مۇگەدەكتىككە شالدىقتىرادى. دەر كەزىندە ەمدەلمەسە, ولىمگە اكەلىپ سوقتىرادى. ءولىم-ءجىتىمنىڭ 50 پايىزعا جۋىعى جۇرەك-قان تامىرى اۋرۋلارىنان بولاتىنى انىقتالدى. ويتكەنى دۇنيەجۇزىلىك دەنساۋلىق ساقتاۋ ۇيىمىنىڭ زەرتتەۋىنە سۇيەنسەك, جۇرەك-قان تامىرلارى اۋرۋلارىنىڭ ءورشۋى تاماقتانۋ راتسيونىنىڭ وزگەرۋىمەن تىكەلەي بايلانىستى بولىپ وتىر», دەپ ءتۇسىندىردى ا.ءىزمۇحانوۆا.
ونىڭ ايتۋىنا قاراعاندا, جۇرەك-قان تامىرلارى اۋرۋى وزدىگىنەن تۋىندامايدى. بۇل دەرتكە شالدىقتىراتىن بىرنەشە فاكتور بار.
«بىرىنشىدەن, قورشاعان ورتاداعى جاعىمسىز فاكتورلاردىڭ 80 پايىزدان استامى ادام اعزاسىنا تۇتىنعان تاماعى ارقىلى كەرى اسەر ەتەدى. ەكىنشىدەن, ارتىق سالماق پەن سەمىزدىك تە جۇرەك-قان تامىرلارى, قانت ديابەتى جانە باسقا دا كۇردەلى ساناتتاعى اۋرۋلاردىڭ قاۋىپتى فاكتورىنا اينالعان. سول سەبەپتەن تۇرعىندار جۇرەك-قان تامىرلارى اۋرۋىنا شالدىقپاۋى ءۇشىن تاماقتانۋ مادەنيەتىن ساقتاعانى ءجون. ءۇشىنشى فاكتور – تەمەكى تارتۋ. شىلىمقورلىق ادام ءومىرىنىڭ ۇزاقتىعىن 7-10 جىلعا دەيىن قىسقارۋىنا اسەر ەتەدى. تەمەكى تارتپايتىن ادامدارعا قاراعاندا, شىلىمقورلار اراسىندا ميوكارد ينفاركتىسىنە شالدىعۋ دەرەگى ەكى ەسە كوپ. ال وسى اۋرۋدان قايتىس بولاتىندار كورسەتكىشى 4 ەسەگە ارتىق», دەپ مالىمدەدى ا.ءىزمۇحانوۆا.
اتىراۋ وبلىسى
