سۋرەتتى تۇسىرگەن – تامارا داۋلەتباەۆا
الماتى وبلىسىنا قاراستى تالعار اۋدانىنىڭ پانفيلوۆ اۋىلىندا قاپىدا قازا تاپقان شەكاراشىلاردىڭ ەسىمىن ۇرپاق جادىندا جاڭعىرتۋعا ارنالعان تاعىلىمدى ءىس-شارا ءوتتى. شەكارا قىزمەتىنىڭ ديرەكتورى بولعان تۇرعانبەك ستامبەكوۆتىڭ ەسىمى كوشەگە بەرىلىپ, اللەيا اشىلدى. الاڭقايدىڭ كىرە بەرىسىندەگى 27 اسكەري قىزمەتشىنىڭ ەسىمى قاشاپ جازىلعان مەموريالدى تاقتا ولاردىڭ ەل جۇرەگىندەگى ەكىنشى ءومىرى باستالعانىن ايشىقتاپ تۇر.
تاعزىم ءىس-شاراسىنىڭ شىمىلدىعىن اشقان گەنەرال-مايور توقتاسىن بۇزىباەۆ جۇلدىزى ەندى جارقىراپ كەلە جاتقان شاعىندا اعىپ تۇسكەن ت.ستامبەكوۆ تۋرالى اسەرلى ەستەلىك ايتىپ, ءىس-شارانىڭ وتۋىنە مۇرىندىق بولعان جاقىندارىنا العىس ءبىلدىردى.
– ساردار شەكاراشىلاردىڭ ءبىلىم ۇستاحاناسىندا باسشىلىق قىزمەت اتقاردى. تاجىك-اۋعان شەكاراسىن كىرپىك قاقپاي كۇزەتكەن باتالوننىڭ كومانديرى بولدى. ەلىمىزدىڭ شىعىستاعى, وڭتۇستىكتەگى وڭىرلىك باسقارمالارىن باسقارىپ, مەملەكەتتىك شەكارا بۇزۋشىلار مەن كونترابانداشىلارمەن ىمىراسىز كۇرەسكەنىن ونىمەن بىرگە قويان-قولتىق قىزمەت اتقارعان اعا بۋىن شەكاراشىلار جاقسى بىلەدى. 2012 جىلدىڭ ماۋسىمىندا پرەزيدەنت جارلىعىمەن شەكارا قىزمەتى ديرەكتورىنىڭ مىندەتىن ۋاقىتشا اتقارۋشى بولىپ تاعايىندالعان ت.ستامبەكوۆ ءوزىنىڭ كۇش-جىگەرىن «قازاقستان رەسپۋبليكاسىنىڭ مەملەكەتتىك شەكاراسى تۋرالى» جاڭا زاڭ جوباسىن ازىرلەۋگە باعىتتادى. 2013 جىلدىڭ 15 قاڭتارىندا زاڭ كۇشىنە ەندى. قازىرگى زاماننىڭ تالاپتارىن ەسكەرە وتىرىپ, ۆەدومستۆو باسشىسى شەكارا قىزمەتىنىڭ تۇبەگەيلى رەفورماسىن جۇزەگە اسىرۋدى كوزدەدى. بۇل, ەڭ الدىمەن, مەرزىمدى ساربازداردى كەلىسىمشارتتىڭ اسكەري قىزمەتشىلەرى كونتينگەنتىمەن الماستىرۋعا, جاڭا ۇلگىدەگى اسكەري قالاشىقتار سالۋ سەكىلدى اۋقىمدى شارالارعا قاتىستى بولدى, – دەپ اتاپ ءوتتى ت.بۇزىباەۆ.
تۇرعانبەك مۇحامەتقالي ۇلى 1961 جىلى الماتى وبلىسىندا دۇنيەگە كەلگەن. الماتىداعى جوعارى شەكارا كوماندالىق ۋچيليششەسىن 1983 جىلى ءبىتىرىپ, العاشقى كاسىپتىك ەڭبەك جولىن قازىرگى پانفيلوۆ اۋدانى بويىنشا شەكارا باسقارماسىنىڭ الىستاعى شەكارا بولىمشەلەرىنىڭ بىرىندە باستادى. وسى كەزەڭنەن تاباندى, تالاپتى وفيتسەر رەتىندە تانىلىپ, قولىنان قارۋىن تاستاماي, ەلىمىزدىڭ شەكاراسىن كىرپىك قاقپاي كۇزەتتى. پولكوۆنيك شەنىن مەرزىمىنەن بۇرىن العان شەكاراشى وفيتسەر ءىى دارەجەلى «ايبىن» وردەنىمەن, 25 ۇكىمەتتىك ناگرادامەن ماراپاتتالدى, «قۇرمەتتى شەكاراشى» اتاندى. پرەزيدەنت جارلىعىمەن, پولكوۆنيك ت.ستامبەكوۆكە (قازا بولعاننان كەيىن)
ء ى دارەجەلى «ايبىن» وردەنى بەرىلدى.
ءىس-شارادا تۇرعانبەك مۇحامەتقالي ۇلىنىڭ باۋىرى گۇلنار ستامبەكوۆا, ۇقك شەكارا قىزمەتى الماتى وبلىسى بويىنشا دەپارتامەنتىنىڭ باستىعى, پولكوۆنيك الىبەك كايۋپوۆ باستاعان ارىپتەستەرى ايبىندى ازاماتتى ەسكە الدى.
– مەن تۇرعانبەك مۇحامەتقالي ۇلىمەن ەكى مىڭىنشى جىلدارى ءۇشارال شەكارا جاساعىندا قويان-قولتىق قىزمەت اتقاردىم. شەكارا قىزمەتىندەگى وسى ءبىر وتە ىسكەر اسكەري باسشى شىن مانىندە شەكارا ءۇشىن تۋعان ناعىز پاتريوتتىڭ ءوزى ەدى. بۇدان كەيىن تاعدىر ءبىزدى شونجى شەكارا جاساعىندا كەزدەستىرىپ, ول اسكەري ءبولىمنىڭ كومانديرى, مەن ونىڭ ءبىرىنشى ورىنباسارى-شتاب باستىعى بولدىم. مەنىڭ جادىمدا وفيتسەر ءوزىنىڭ جيناقى, شيراق ءجۇرىس-تۇرىسىمەن, مادەنيەتتى, تاربيەلى سوزدەرىمەن, ناعىز قولباسشىعا عانا ءتان ەرەكشە قاسيەتتەرىمەن قالدى. ول ءىستىڭ ادامى ەدى. بويىنداعى ادالدىق, ءوز جۇمىسىنا شەكسىز بەرىلگەندىك, جاس كادرلارعا قامقورلىعى – وفيتسەردى باسقالاردان دارالاپ تۇراتىن, – دەدى ءا.كايۋپوۆ.
اۋە اپاتىنان قازا تاپقان اسكەري قىزمەتشىلەردىڭ تۋعان-تۋىستارى, شەكاراشى ارداگەرلەر مەن اسكەري قىزمەتشىلەر, قالاداعى «جاس شەكاراشى» اسكەري-پاتريوتتىق كلۋبىنىڭ مۇشەلەرى قاتىسقان ءراسىم پولكوۆنيك ستامبەكوۆ اتىنداعى اللەياعا 27 شىرشا وتىرعىزۋ شاراسىمەن تۇيىندەلدى.
الماتى
