ەلىمىزدەگى تۇڭعىش جوعارى وقۋ ورنى – اباي اتىنداعى قازاق ۇلتتىق پەداگوگيكالىق ۋنيۆەرسيتەتى جوعارى جانە جوعارى وقۋ ورنىنان كەيىنگى ءبىلىم بەرۋ سالاسىنداعى ءىرى عىلىمي جانە پەداگوگيكالىق ءبىلىم بەرۋ ورتالىعى بولىپ تابىلادى.
باستاۋىندا احمەت بايتۇرسىن ۇلى, تەمىربەك جۇرگەنوۆ, حالەل دوسمۇحامەدوۆ, ساكەن سەيفۋللينداي زيالىلار, قوعام قايراتكەرلەرى تۇرعان وقۋ ورنى كۇنى بۇگىنگە دەيىن ەلىمىزدە بىلىكتى مۇعالىم كادرلاردى دايارلاۋدا كوشباسشى بولىپ كەلەدى. وقۋ ورداسىنان عاسىرعا جۋىق مەرزىمدە 200 مىڭعا جۋىق پەداگوگ, 4 مىڭنان اسا عىلىمي كادرلار قاناتتاندى.
اباي اتىنداعى وپەرا جانە بالەت تەاترىندا وتكەن سالتاناتتى شارادا مارتەبەلى ۇستازدار قاۋىمىن عىلىم جانە جوعارى ءبىلىم ءمينيسترى ساياسات نۇربەك قۇتتىقتادى. «ۇستازدار ۇستاحاناسى, ءبىلىم مەن عىلىمنىڭ التىن ورداسى اتالعان قارت قازپي-ءدىڭ اتاۋلى داتاسى ەلىمىزدەگى ءبىلىم بەرۋ جۇيەسىنە ورتاق مەرەكە. ءبىلىم ورداسىنىڭ جەتكەن جەتىستىگىندە قازاق حالقىنىڭ اياۋلى تۇلعالارى, الاش قايراتكەرلەرىنىڭ ەڭبەگى جاتىر. بۇگىندە ءبىلىم بيىگىندە تۇرعان وقۋ ورداسىنىڭ پروفەسسورلىق-وقىتۋشىلار قۇرامىنىڭ جەمىستى ەڭبەگىن ەرەكشە اتاپ ءوتۋ كەرەك», دەپ اتاپ ءوتتى ول.
ۋنيۆەرسيتەت رەكتورى بولات تىلەپ ۇلت زيالىلارى باستاۋىندا تۇرعان «ۇستاز» اتتى اتتى ۇلىق ماماندىقتىڭ رۋحاني ورداسى اباي ۋنيۆەرسيتەتى وسى جىلداردا ەلىمىزدەگى ءبىلىم وشاقتارىنا كوپتەگەن بىلىكتى كادرلار دايارلاعاندىعىن جەتكىزدى. رەكتوردىڭ ايتۋىنشا, كەزىندە 9 وقىتۋشى عانا بولعان وقۋ ورداسىندا بۇگىندە 5 اكادەميك, 6 ۇعا كوررەسپوندەنت-مۇشەسى, 220 عىلىم دوكتورى مەن phd, 260-تان استام عىلىم كانديداتى, بارلىعى 900-دەن استام پروفەسسورلىق-وقىتۋشىلىق قۇرام 16 مىڭنان استام ستۋدەنتكە زاماناۋي ءبىلىم بەرىپ كەلەدى.
ايتۋلى جيىن بارىسىندا الماتى قالاسى اكىمىنىڭ اپپارات باسشىسى بەيبىت شاحانوۆ قالا اكىمىنىڭ قۇتتىقتاۋىن وقىسا, ۇعا ۆيتسە-پرەزيدەنتى اقىلبەك كۇرىشباەۆ مۇعالىم كادرلاردى دايارلاۋدا كوش باستاپ تۇرعان وقۋ ورنىنىڭ مەرەيتويىنا ۇلتتىق عىلىم اكادەمياسى جولداعان قۇتتىقتاۋدى جەتكىزدى.
ۋنيۆەرسيتەتتىڭ الەمدىك ءبىلىم كەڭىستىگىندە جەتىستىككە جەتۋىنە زور ۇلەس قوسىپ جۇرگەن وقىتۋشىلار قاۋىمى وسى جيىندا ارنايى ماراپاتقا يە بولدى. وقىتۋشى-ۇستازدارعا مەدال, توسبەلگىلەردى عىلىم جانە جوعارى ءبىلىم ۆيتسە-ءمينيسترى تالعات ەشەنقۇلوۆ تابىستاپ, ايتۋلى مەرەكەمەن قۇتتىقتاپ ءسوز سويلەدى.
بۇگىندە ۋنيۆەرسيتەت الەمنىڭ 25 مەملەكەتىنىڭ 138 جوعارى وقۋ ورىندارىمەن ارىپتەستىك بايلانىستا جۇمىس ىستەيدى. QS World University Rankings الەمدىك رەيتينگىندە بيىلعى جىلدىڭ قورىتىندىسى بويىنشا 681-690 ورىندى يەلەنىپ, الەمدەگى ۇزدىك 700 ۋنيۆەرسيتتەر قاتارىنا ەندى. ورتالىق ازيا ايماعىندا 147 ورىنمەن توپ-200 ۇزدىك ۋنيۆەرسيتەتتەر قاتارىندا. تۇراقتى دامۋ ماقساتتارىن باسشىلىققا العان THE Impact Rankings رەيتينگىندە ۋنيۆەرسيتەت 601-800 پوزيتسيادان كورىنىپ, قازاقستاندىق ۋنيۆەرسيتەتتەردىڭ اراسىندا كوش باستاپ تۇر.
مەرەكەلىك ءىس-شارادا قازاقستان ەتنيكالىق ديزاينەرلەر وداعى قولونەر شەبەرلەرىنىڭ كورمەسىن وتكىزىپ, ۋنيۆەرسيتەتتىڭ تاريحى مەن بۇگىنگى تىنىس-تىرشىلىگى تۋرالى دەرەكتى فيلم كورسەتىلدى. ءارى قاراي مەرەكەلىك جيىن ونەر مايتالماندارىنىڭ كونتسەرتىنە ۇلاستى.
الماتى
