باسىرە - سۇندەت تويىنىڭ الدىندا ۇل بالاعا ارناپ تاي نەمەسە ق ۇلىن اتاپ قويۋ ءراسىمى. باسىرە اتاعاندا كىشىگىرىم توي جاسالعان. قازاق ىشىندە كىرعىزدارمەن ەتنومادەني بايلانىس بارىسىندا باسىرە مال, بالانىڭ باسىرەسى دەپ اتالاتىن ۇعىمنان اۋىسقان دەۋگە نەگىز بار. ورتا ءجۇز بەن كىشى جۇزدە «بالاعا مال اتادىق», «بالاعا ات بولسىن» دەپ بەرەر مالىنا ەن سالادى. كوبىنەسە, باسىرەنى بالا ات جالىن تارتىپ مىنە باستاعان 7-8 جاس كەزىندە, مۇمكىندىگىنە قاراي, جۇيرىك, جورعا شىققان تۇقىمنان ق ۇلىن تاڭدايدى. باسىرە نەگىزىنەن, جىلقى مالىنان اتالعانىمەن, كەيبىر كەزدە قوزىنى دا اتاعان. باسىرە مالعا ەن سالىپ, ۇنەمى قاداعالاپ جۇرەدى. باسىرە مالدىڭ باسىنا تۇسكەن اۋىرتپالىعى (اۋرۋى, اقساۋى, تاۋ-تاستان قۇلاۋى) ارقىلى بالانىڭ ىلگەرىدە باقىتتى, باقىتسىز بولارىن جورامالداپ ىرىم ەتكەن.
نانىم بويىنشا, بالانىڭ بولاشاعى ونىڭ باسىرە تايىمەن تىعىز بايلانىستى. سوندىقتان ونداي تايدى مىنبەيدى, جەكپەيدى, سويمايدى, ساتپايدى. قايتا بالامەن بىرگە بۇلا ەتىپ وسىرەدى. ءوزىنىڭ اتاۋلى مالىمەن بىرگە وسكەن بالا ەركىن بولىپ, كىشكەنتايىنان مال قادىرىن ءبىلىپ, شارۋاعا يكەمدى كەلەدى.
سونداي-اق ۇزاتىلعان قىز 2-3 جىلدان سوڭ بالاسىن, كوبىنەسە تۇڭعىشىن ەرتىپ توركىنىنە بارعاندا, العاش تابالدىرىعىن اتتاپ كىرگەن جيەن ناعاشىسىنان باسىرە الماسا, ونى وسكەننەن كەيىن وسىمىمەن قوسا الۋعا قۇقى بولعان.
