قازىر استانا جانە الماتى قالالارىنان قاناتقاقتى جوباعا 441 ادام قاتىسىپ جاتىر. مينيسترلىك اكىمدىكتەرمەن بىرلەسىپ قولعا العان بۇل باستامانىڭ تيىمدىلىگى بۇگىننىڭ وزىندە بايقالادى.
بۇعان دەيىن ينۆاتاكسيدىڭ قىزمەتىنە جۇگىنۋ ءۇشىن ازاماتتار ءبىر كۇن بۇرىن تەلەفون ارقىلى جازىلۋى قاجەت ەدى. بۇل ساپاردى الدىن الا جوسپارلاۋعا, كولىكتى ءبىراز كۇتۋگە ماجبۇرلەيتىن. بۇعان قوسا ينۆاتاكسي قىزمەتىن ۇسىناتىن كولىك قۇرالدارىنىڭ جەتىسپەۋشىلىگى ماسەلەسى دە بار. وسىنداي قولبايلاۋ بولاتىن كەدەرگىلەردى رەتتەۋ ءۇشىن ارناۋلى شارتتاردى ءبىرشاما جەڭىلدەتىپ, بۇل قىزمەتكە تاكسي اگرەگاتورلارىن تارتۋعا مۇمكىندىك تۋدى.
ادەتتە اگرەگاتور جاسالعان ساپارلاردىڭ تولەم اقىسىنان پلاتفورمالارىنىڭ پايداسىنا بەلگىلى مولشەردە پايىز اۋداراتىن بولسا, مۇنداعى باستى شارت – سول پايىزدىڭ بولماۋى. وسى جۇمىستى قولداعان ياندەكس كومپانياسى قاناتقاقتى جوباعا وتەۋسىز نەگىزدە قاتىسۋعا نيەت ءبىلدىردى.
ەندى ينۆاتاكسي قىزمەتىن ازاماتتار وسى اتالعان جوبا اياسىندا ياندەكس Go ءموبيلدى قوسىمشاسى ارقىلى قولدانا باستادى. جوبانىڭ ەرەكشەلىگى – قىزمەتتى الۋشى ءۇشىن كولىكتى تەزىرەك تاڭداۋ, ونلاين رەجىمدە تاپسىرىس مارتەبەسىن قاداعالاۋ جانە ساپارلاردى باقىلاۋدىڭ قاراپايىم جۇيەسى. بۇل قوسىمشادا مۇگەدەكتىگى بار ادامدار جۇرگىزۋشىگە ساپارداعى ەرەكشە قاجەتتىلىكتەرى تۋرالى ەسكەرتۋى ءۇشىن ارنايى مۇمكىندىكتەر ەكرانى ىسكە قوسىلدى. ءوز كەزەگىندە جۇرگىزۋشىلەر ادامدى كولىككە وتىرعىزۋ جانە ودان تۇسەردە قالاي كومەك كورسەتۋگە بولاتىنى سەكىلدى قاجەتتى نۇسقاۋلاردى الادى.
جوباعا العاشقى كەزەڭدە استانا جانە الماتى قالالارىنان مۇگەدەكتىگى بار ادامداردىڭ فوكۋس-توبى قاتىسادى. قىزمەت كورسەتۋدىڭ وڭ ناتيجەسى بولعان جاعدايدا جاڭا فورماتتا مۇگەدەكتىگى بار ادامداردىڭ باسقا توپتارىنا جانە ەلىمىزدىڭ بارلىق وڭىرىندە جۇزەگە اسپاق.
