ء«ال-اكي» ءانسامبلىنىڭ ماسكەۋدە وتكەن مەرەكەلىك ءىس-شاراعا شاقىرتۋ الۋى كەزدەيسوق ەمەس. بيىل قۇرىلعانىنا 30 جىل تولىپ وتىرعان ونەر ۇجىمى رەسەيلىك جەرگىلىكتى شىعارماشىلىق ۇجىمدارمەن بەرىك قارىم-قاتىناس ورناتىپ ۇلگەرگەن. رەسەيلىك ونەرپازدار قاتىسقان تالاي فولكلورلىق فەستيۆالداردا ونەر كورسەتىپ, كوپشىلىكتىڭ ىستىق ىقىلاسىنا بولەنگەن. ەرتىس-بايان دالاسىن ءان-جىرعا قوسقان دومبىراشىلار ماسكەۋ تورىندەگى ءىس-شارادا شابىتتارىن شالقىتىپ, ەرەكشە كۇش-قۋاتپەن شارىقتادى.
«وسىناۋ سالتاناتتى كەشتە ەلوردادان بارعان «شابىت» دومبىراشىلار انسامبلىمەن بىرگە ساحنادا ونەر كورسەتىپ, شىعارماشىلىق قارىم-قاتىناسىمىزدى نىعايتا تۇسۋگە نەگىز بولدى. ءبىزدىڭ ۇجىم رەسەي جەرىندە دومبىرانىڭ قوڭىر ءۇنىن قاشان پاش ەتەدى ەكەن دەگەن ءۇمىت بار ەدى. سول ماقساتىمىز ورىندالعانداي. سالتاناتتى قابىلداۋدا بىرنەشە مەملەكەتتىڭ رەسەيدەگى ەلشىلىكتەرىنىڭ وكىلدەرى بولدى. ولار ءبىزدىڭ دومبىراشىلار مەن انشىلەرىمىزدىڭ ونەرىنە ءتانتى بولدى», دەيدى پاۆلودارداعى ەستاي اتىنداعى مادەنيەت سارايىنىڭ باسشىسى ساپار شايحيموۆ.
ايتىپ وتەيىك, ء«ال-اكي» فولكلورلىق-ەتنوگرافيالىق ءانسامبلىنىڭ كوركەمدىك جەتەكشىسى – مادەنيەت قايراتكەرى جاسقايرات ورىنباەۆ. مەرەكەلىك كەشتە دومبىراشىلار قۇرمانعازىنىڭ «بالبىراۋىنى» مەن ن.تىلەنديەۆتىڭ «القيسساسىن», وزگە دە تانىمال كۇيلەردى سىلقىلداتا تارتىپ, قازاقتىڭ بەلگىلى اندەرىن ورىندادى.
ماسكەۋگە شىعارماشىلىق ساپارى بارىسىندا ء«ال-اكي» حالىقتىق-فولكلورلىق ءانسامبلى ونداعى اباي ەسكەرتكىشىنە بارىپ, اقىننىڭ رۋحىنا تاعزىم ەتتى. ابايدىڭ بۇل ەسكەرتكىشى 2006 جىلى رەسەيدەگى اباي جىلى اياسىندا, قازاقستان ەلشىلىگىنە جاقىن جەردە اشىلعان ەدى.
ماسكەۋ
