فوتو: Turizm_jane_sport_ministrligi
قىتايدىڭ حانچجوۋ قالاسىندا وتكەن جازعى ازيا ويىندارىنداعى كورسەتكىشكە بايلانىستى ەسكەك ەسۋ, جەڭىل اتلەتيكا جانە ساداق اتۋ فەدەراتسيالارىنىڭ باسشىلارى ەسەپ بەردى.
ازيا قۇرلىعىنىڭ ءتورت جىلدىق الامانىندا اكادەميالىق ەسكەك ەسۋدەن سپورتشىلارىمىزعا مەدال بۇيىرعان جوق. بىراق بايداركا مەن كانوەدە ەسكەك ەسۋ سايىسىندا 1 التىن, 4 كۇمىس, 3 قولا جۇلدە ەنشىمىزگە ءتيدى.
تۋريزم جانە سپورت ءمينيسترى اكادەميالىق ەسكەك ەسۋ بويىنشا ۇلتتىق قۇرامانىڭ ازياداداعى ناتيجەسى كوڭىل كونشىتپەيتىنىن ايتتى. ەسكەك ەسۋشىلەردى ازيا ويىندارىنا اتتاندىرعاندا زور سەنىم ارتىلىپ, التىن مەدال ولجالايدى دەگەن ءۇمىت تە باسىم بولدى. قىتايداعى الاماندى ارنايى بارىپ تاماشالاعان مينيستر ە.مارجىقپاەۆ قۇرامانىڭ ىشكى تارتىبىنە باعىنعىسى كەلمەيتىندەردى تەزگە سالۋ جونىندە ەسكەرتىپ, سپورتشىلاردىڭ فۋنكتسيونالدىق ءھام دەنە دايارلىعى دا ماردىمسىز ەكەنىن ايتتى. جەڭىل اتلەتيكا فەدەراتسياسىنىڭ باسشىلىعى دا ماقتاۋ ەستىگەن جوق. حانچجوۋداعى جازعى ازيا ويىندارىنان اتلەتتەر 4 قولا مەدالدى مىسە تۇتىپ, جالپىكوماندالىق ەسەپتە 16-ورىنعا ورنىقتى. 2018 جىلى يندونەزيا ەلى وتكىزگەن جازعى ازيا ويىندارىندا جەڭىل اتلەتتەر كوماندالىق ەسەپتە 8-ساتىعا تۇراقتاعان ەدى.
«پاريجدەگى ءتورت جىلدىقتىڭ باستى دوداسىنا نەبارى 8 اي قالدى. قازىر بىزگە ناقتى جوسپار مەن ىنتىماقتاستىقتا جۇمىس ىستەۋ قاجەت. فەدەراتسيالارعا ۇلتتىق قۇرامانىڭ رەزەرۆىن قالىپتاستىرۋ جونىندە جۇمىستى كۇشەيتۋدى تاپسىرامىن. باس جاتتىقتىرۋشىلارمەن بىرلەسىپ پاريج وليمپياداسىنا دەيىن كوماندا كوشباسشىلارىن جەكە دايارلاۋدىڭ جوسپارىن دايىنداۋ كەرەك», دەدى مينيستر.
ساداق اتۋ فەدەراتسياسى باسشىسىنىڭ دا بايانداماسىنداعى ايتىلعان مالىمەت ءماز ەمەس. ءتىپتى بىردە-ءبىر باعدارلامادا مەدال بۇيىرمادى. كۇيىنگەن ە.مارجىقپاەۆ ساداق اتۋشىلاردىڭ جۇمىسىنا قاناعاتتانبايتىنىن ايتتى. مينيستر قىر استىندا تۇرعان پاريج جازعى وليمپياداسىنا تىڭعىلىقتى دايارلىق ءتۇزۋ ءۇشىن, جەكەلەگەن سپورتشىلاردى شاربولاتتاي شىڭداۋدا وتاندىق مامانداردىڭ بىلىكتىلىگى كوتەرمەسە, سىرتتان باپكەر شاقىرۋ قاجەتتىگىن دە ەسكەرتتى.
