– بيىل Ballet Globe حالىقارالىق بي فەستيۆالى تۇجىرىمداماسىن وزگەرتىپ, قالا تۇرعىندارى مەن بالەت ونەرىن سۇيەتىن قاۋىمنىڭ نازارىن كونتەمپوري ستيلىنە اۋدارۋدى ۇيعاردى. بۇل ەۋروپا, امەريكا مەن ازيادا قارقىندى دامىپ كەلە جاتقان بەلگىلى بي يندۋسترياسى. وسى فەستيۆالدا الەمدىك ساحنانىڭ ەڭ عاجايىپ قويىلىمدارىن بي ساڭلاقتارىنىڭ ءوز ورىنداۋىندا ۇسىندىق. Ballet Globe فەستيۆالىنىڭ بىرەگەيلىگى – كورەرمەنگە ءبيدىڭ كلاسسيكالىق تۇرلەرىن راحاتتانا وتىرىپ تاماشالاۋدى عانا ەمەس, سونىمەن بىرگە, ورىنداۋشىلىق ونەردى قابىلداۋدىڭ جاڭا كوكجيەكتەرىن اشىپ, سانانى كەڭەيتۋدى ۇسىنادى. ايتپاعىم, ساحناداعى كورىنىستى تاماشالاعان ادام ويعا شومىپ, بالكىم, ءوزىن مازالاعان سۇراقتىڭ جاۋابىن تاپقان شىعار. زاماناۋي بي ونەرىنىڭ ماقساتى دا وسى, – دەدى Ballet Globe كومپانياسىنىڭ ۇيىمداستىرۋشىسى ءارى جوبا اۆتورى ەرلان انداعۇلوۆ.
ماۋسىم سايىن بالەت الەمىندەگى اتى اڭىزعا اينالعان دۇلدۇلدەرمەن تانىستىراتىن فەستيۆالعا ۇلىبريتانيا, نيدەرلاند, شۆەيتساريا, اقش, قازاقستان حورەوگرافتارىنىڭ 20 ۇزدىك قويىلىمى مەن زاماناۋي بي ونەرىنىڭ 12 جۇلدىزى قاتىستى. جاھاندىق بالەت ونەرىندە بىرەگەي ءبيشى سانالاتىن نيدەرلاند بي تەاترىنىڭ جەتەكشى ارتىستەرى حلويا البارەت, رودجەر ۆان دەر پوەل جانە وليۆە كوففارد پەن پيتەر چۋدىڭ, كورولدىك بالەتتىڭ تالانتتى بيشىلەرى مورگان كاپەللاري, كلاۋديو كانيالوزي ورىنداۋىنداعى جاڭا قويىلىمنىڭ پرەمەراسى – بيىلعى فەستيۆالدىڭ باستى جاڭالىعى. ال جەنەۆاداعى ۇلكەن تەاتر ساحناسىنىڭ ەڭ جارقىن وكىلدەرى ساشا ريۆا مەن سيمونە رەپەلە, جاپون ءبيشىسى يۋمي ايزاۆا الماتىعا وسىمەن ەكىنشى رەت كەلىپ وتىر.
اstana Opera تەاترىنىڭ ءسوليسى سۇلتانبەك عۇماردىڭ ورىنداۋىنداعى پاتريك دە بانا حورەگورافياسىمەن «تۇران» ەتنو-فولكلورلىق ءانسامبلىنىڭ مۋزىكاسىنا نەگىزدەلگەن «قيلى زامان» كورىنىسى زاماناۋي بي جاۋھارلارىمەن تەڭ تۇسپەسە, كەم تۇسپەيتىن ورنەگىمەن ساحنا سالتاناتىن بيىكتەتە ءتۇستى. كەش باعدارلاماسىندا فرانتس شۋبەرتتىڭ «Jeune Fille et Morts» مۋزىكاسىنا, گاۆين برايەرستىڭ «Sinking», كومپوزيتور جانە پيانيست ەتسيو بوسسونىڭ «What If», ارماند اماردىڭ «Playground», اندرە بارروستىڭ «Conscious Shift» شىعارماسىنا نەگىزدەلگەن قويىلىمداردى الماتىلىق كورەرمەن جىلى قابىلدادى. حورەوگرافتار ءار تۋىندىنىڭ وزەگىن بۇگىنگى كۇننىڭ وقيعاسىمەن, ءمان-مازمۇنىمەن تولتىرعان, سوندىقتان بولار, بي يشاراسىن كورەرمەن جاقسى ءتۇسىندى. بيشىلەردىڭ جۇرەگىندە وت جانىپ تۇرعانداي, سول وتتىڭ جالىنىمەن كورەرمەندى جىلىتقىسى كەلگەندەي, تىلمەن ايتىپ جەتكىزە المايتىن سەزىمدى دەنەنىڭ قوزعالىسىمەن, ءتاننىڭ تۇسپالىمەن باياندادى. «شىعارمادا يدەيا مەن كورەرمەن اراسىندا كوزگە كورىنبەيتىن, تەك جانمەن سەزىنەتىن بايلانىس ورنايدى. كونتەمپوري ءستيلى كورەرمەنمەن ونىڭ تىلىندە سويلەسەدى. اركىم ءوزىنىڭ حيكاياسىن, باسىنان وتكەنىن, سەزىمىن, مۇڭىن كورەدى, ءوز باسىنداعى جاعدايدى جاڭا قىرىنان باعالاپ, وي تولعاۋىنا جول اشادى. كورەرمەن ساحنادا كورگەنىن, ءوز-وزىنە كوزقاراسىن, ومىرمەن قارىم-قاتىناسىن تالدايدى, بۇل ءوزىن تەرەڭنەن تانىپ بىلۋگە, تۇسىنۋگە, ءوزىن قۇرمەتتەۋگە ىقپال ەتەدى», دەيدى حلويا البارەت.
بالەت فەستيۆالى تاماشا توسىنسىيمەن تۇيىندەلدى. ساحنادا DJ Dianella ونەر كورسەتىپ, لازەر شوۋى قويىلدى. الماتى كورەرمەندەرى ءبىر ساحنادا سامساپ كورىنگەن الەمنىڭ ايگىلى ارتىستەرىنىڭ سيقىرلى ونەرىنە اربالعانداي, لاززاتقا تولى سەزىمىن قول سوعۋمەن, كەمەرىنەن اسىپ بۋىرقانعان كوڭىل كۇيىن «براۆو» دەگەن ىلتيپاتپەن ءبىلدىرىپ, تالايعا دەيىن تاپجىلماي تۇرىپ الدى.
الماتى
