س.ءتاشىموۆانىڭ تۋىندىلارى قازاقستان, اقش, گەرمانيا, رەسەي جانە جاڭا زەلانديانىڭ جەكە كوللەكتسيالارىندا ساقتالعان. سالتانات مودەل جانە اكتريسا رەتىندە دە كوپشىلىككە تانىمال. كورمەدە پورترەتتەر, ناتيۋرمورتتار, قالا كورىنىستەرى مەن سۋرەتشىنىڭ جارتىلاي ابستراكتىلى كەسكىندەمە ستيلىندە ورىنداعان وزگە دە كارتينالارى كوپشىلىك نازارىنا ۇسىنىلدى. ءوز شىعارمالارىندا تابيعاتتىڭ تەرەڭ قۇپياسىن اشۋعا تالپىناتىن سۋرەتشى وي مەن سەزىمنىڭ كەڭ سپەكترىن جەتكىزەتىن كۇردەلى ءتۇس كومپوزيتسيالارىن بەينەلەيدى. سالتانات ء«دارۋىش ءبيى», «سازسىرناي ءۇنى», «ازيا يىرىمدەرى» اتتى تۋىندىلارىندا دالا سارىندارىن سيقىرلى بوياۋ تۇستەرىمەن نازىك ۇندەستىرەدى. قورشاعان ورتامەن تىعىز بىرلىكتە ءومىر سۇرگەن اتا-بابا دۇنيەتانىمىنىڭ قاينار كوزى تابيعاتپەن بايلانىستى قالىپتاسقانى بەلگىلى. ۇلى جاراتۋشىنى ء«تاڭىرى» دەپ تانىپ, تابيعاتتى ونىڭ تاماشا تۋىندىسى دەپ تۇسىنگەن قازاق حالقى تابيعاتتى ايالاۋ ارقىلى وعان ۇلكەن قۇرمەت كورسەتكەن. سوندىقتان دا تابيعاتقا بايلانىستى قالىپتاسقان ۇردىستەردىڭ بۇگىنگى كۇنگە دەيىن ساقتالىپ, سالت-ءداستۇرىمىز بەن مادەنيەتىمىزدە كورىنىس تاۋىپ جاتاتىنى زاڭدى قۇبىلىس.
كورمە جەتەكشىسى گ.جۇبانوۆانىڭ سۋرەتشى شىعارمالارىنا جاساعان تالداۋى تىم تەرەڭ. ونەر زەرتتەۋشىسىنىڭ ايتۋىنشا, سالتانات ءتاشىموۆانى سۋرەتشى رەتىندە ءومىردىڭ فيلوسوفيالىق ونەگەسى مەن قورشاعان ورتا كوبىرەك تولعاندىرادى. وسى تاقىرىپ سۋرەتشىنىڭ «رۋحتىڭ سامالى», «الەمنىڭ توعىسۋى», «ايدىڭ قارسى بەتى», «الەمدەردىڭ تۋىلۋى» اتتى ەڭبەكتەرىندە تەك كۇشتى مەن ءالسىزدىڭ عانا ەمەس, جان مەن ءتاننىڭ دە تاڭداۋ بوستاندىعى جولىنداعى كۇرەسى سۋرەتتەلەدى. ولار انىق بەينەلەنبەگەن – قاراپايىم سىزىقتاردان قۇرالعان, الۋان تۇستەردىڭ استاسۋىمەن كەسكىندەلگەن. پولوتنولارداعى ءپىشىننىڭ ماڭىزىن جوققا شىعارا وتىرىپ, ونى قيال الەمىنەن بوساتىپ, بوياۋلار گامماسى بۋىرقانعان جازيرا جازىقتارعا قاراي جەتەلەيدى. جىلدام ويلاۋ, تۇيسىكتەگى دىبىستى كەنەپكە سيقىرلى بوياۋلارمەن قۇبىلتىپ جازۋ س.ءتاشىموۆانىڭ شىعارماشىلىعىنا ءتان. ونىڭ باستى يدەياسى – ەركىندىك, شىعارماشىلىق مۇمكىندىگىن تولىق اشۋ, دۇنيە كەڭىستىگىن تانىپ-ءبىلۋدىڭ جاڭا فورمالارى مەن تانىم كاتەگوريالارىن ىزدەۋ. ادام تابيعاتىنىڭ وزگەرمەيتىن, تۇراقتى ءارى ارقيلى باستاۋىنا باعىتتاپ وتىراتىن ميفولوگيالىق سارىن ونىڭ قىلقالامىنا بايلاۋلى. س.ءتاشىموۆانىڭ جۇرەك تۇڭعيىعىنان شىققان جارقىن دا جىلى, شاتتىققا تولى كوركەم الەمى سۋرەتكەر مەن ونىڭ شىعارمالارىنا ۇڭىلگەن ادام اراسىن تۇتاستىرىپ جىبەرەدى. سۋرەتشىنىڭ توسىن پىشىندەرى مەن تىڭ بوياۋلارمەن بايلانىسقان كومپوزيتسيالارى, تابيعات جاراتىلىسىنىڭ ۇيلەسىمدىلىگى مەن اسەمدىگىن ايقىنداپ, قازىرگى كۇردەلى كەزەڭنىڭ قايعى-مۇڭىنا قارسى تۇرادى.
الماتى
