فوتو: اشىق دەرەككوز
«اۋرۋ جۇقتىرۋدىڭ جەرگىلىكتى جاعدايى انىقتالدى. جەكە اۋلادا قوجايىندارى 8 ايلىق بۇقانى سويماقشى بولعان. يەسىنىڭ ايتۋىنشا, مال اۋىرعان. بىراق ەتىن ساتۋدى جوسپارلاماعان. سول اۋلاداعى ءۇش ادامنان ءسىبىر جاراسى انىقتالدى, تاعى ەكى ادام دارىگەرلەردىڭ باقىلاۋىندا. سونداي-اق ولارمەن بايلانىستا بولعان 30 ادام انىقتالىپ, پروفيلاكتيكالىق ءىس-شارالار تۋرالى تۇسىندىرمە اڭگىمە جۇرگىزىلىپ, مەديتسينالىق باقىلاۋ ورناتىلدى», دەلىنگەن وبلىس اكىمدىگى تاراتقان حابارلامادا.
«بارلىق تەكسەرىلگەن وشاقتاردا دەزينفەكتسيا جۇرگىزىلدى, ۆەتەريناريا ماماندارى ۇيلەردى ارالاپ, مالداردى كلينيكالىق تەكسەرۋ جانە تەرمومەتريا وتكىزىپ, ەگۋ جۇمىستارىن جۇرگىزىپ جاتىر. اۋىل شارۋاشىلىعى مينيسترلىگى ۆەتەريناريالىق باقىلاۋ جانە قاداعالاۋ كوميتەتى ارقىلى ۆەتەريناريالىق پرەپاراتتاردىڭ رەسپۋبليكالىق قورىنان ۆاكتسينالار مەن دەزينفەكتسيالىق قۇرالدارعا قاجەتتىلىك تولىق قامتاماسىز ەتىلدى», دەيدى اۋماقتىق ۆەتينسپەكتسيا باسشىلىعى.
ەندى, ەلدى مەكەننەن مال جانە ءسۇت ونىمدەرىن الۋعا جانە كىرگىزۋگە قاتاك تىيىم سالىندى. مال سويۋعا دا, اتالعان اۋماقتان جەم-ءشوپ تاسۋعا دا رۇقسات جوق.
«قاراسان» جۇقتىرعان دەگەن دياگنوزبەن وبلىستىق كلينيكالىق اۋرۋحاناعا تۇسكەن ءتورت ناۋقاس تۇسكەن.
– ءبىزدىڭ ورتالىققا «قاراسان» دەگەن دياگنوزبەن ءتورت ادام ءتۇستى. ونىڭ ۇشەۋىنەن «قاراسان» انىقتالدى. بىرەۋىنىڭ اناليز قورىتىندىسىن كۇتىپ وتىرمىز. ونىڭ ۇشەۋى دە ءبىر وتباسىنىڭ ادامدارى. ناۋقاستىڭ بىرەۋى جانساقتاۋ بولىمىندە. جاعدايى اۋىر. ناۋقاستىڭ جاعدايىنا بايلانىستى وڭىردەگى بىلىكتى دارىگەرلەردىڭ قاتىسۋىمەن رەسپۋبليكالىق كونسيليۋم ءوتتى. ال, ەكى ناۋقاس باسقا بولىمدە. جاعدايلارى – ورتاشا. قازىر ءتيىستى ەم-شارالار قولدانىلىپ جاتىر, – دەدى وبلىستىق كلينيكالىق اۋرۋحانانىڭ ينفەكتسيالىق ورتالىعىنىڭ جەتەكشىسى, قاراعاندى مەديتسينا ۋنيۆەرسيتەتىنىڭ ينفەكتسيالىق اۋرۋلار كافەدراسىنىڭ قاۋىمداستىرىلعان پروفەسسورى ەرجان ءجۇنىسوۆ.
پروفەسسور الگىندە عانا ايتقان ءتورتىنشى پاتسيەنتتىڭ تالداۋ ناتيجەلەرى اۋرۋ بەلگىلەرى انىقتالماعانىن ايعاقتادى. دەگەنمەن, ناۋقاس پروفيلاكتيكالىق ەم الۋ ءۇشىن ينفەكتسيالىق بولىمدە تاعى 5 كۇن بولادى.
قاراعاندى وبلىسى
