التى بالانىڭ اناسى ءمولدىر تولەگەنوۆانىڭ ايتۋىنشا, پاتەرىنىڭ ءىشى ازىناپ تۇر. وتباسى مۇشەلەرى ءبىر بولمەگە جينالىپ, قۋات كوزىنە قوسىلعان جىلىتقىشپەن جان ساقتاپ وتىرعان كورىنەدى.
«مامەتوۆا كوشەسى, 54/1-ۇيدە تۇرامىز. پاتەرىمىز – ءۇش بولمەلى. قالادا وتكەن جىلدىڭ سوڭىندا اپات ورىن العالى ىستىق سۋ دەگەندى ۇمىتتىق. ەندى مىنە, تاعى كۇن ىزعارلانىپ, قاراشانىڭ قارا سۋىعى جاقىنداپ قالدى. اكىمدىكتەگىلەر مەن جىلۋ بەرۋ مەكەمەسىنىڭ ماماندارى ۋادەنى ءۇيىپ-توككەنىمەن, جىلۋ ءالى كۇنگە بەرىلمەي تۇر. ەلەكتر جارىعى ءۇشىن وتكەن ايدا 8 مىڭ تەڭگە تولەسەم, وسى ايدا تۇبىرتەكتەگى سوما ودان دا زور شىعاتىنىن ءبىلىپ وتىرمىز. باسقا امالىمىز جوق. بالالارىمنىڭ بارلىعى اۋىرىپ جاتىر. بارىنەن بۇرىن كىشى قىزىما قيىن, جەرگە ءتۇسىپ ەڭبەكتەگىسى كەلەدى. الايدا ەدەن مۇزداي, اياق شىداتپايدى. ءبىزدىڭ ۇيدە پيك دەگەن اتىمەن جوق. جاڭا ءۇي دەگەن اتى بولماسا, تەرەزەلەرىنەن جەر ۇرلەپ, پاتەرىمىز ازىناپ تۇر», دەپ مۇڭىن شاقتى تۇرعىن.
مامەتوۆا كوشەسى, 54/4-ۇيدە تۇراتىن تاعى ءبىر كوپبالالى انا اسەم قۋانىشەۆا دا ونىڭ ءسوزىن قۋاتتاپ وتىر. ايتۋىنشا, تۇرعىن ءۇي-كوممۋنالدىق شارۋاشىلىق ءبولىمى, تۇرعىن ءۇي ينسپەكتسياسىنداعىلار ەش ارەكەت ەتە الماي جاتىر ەكەن. بۇل وتباسى جىلىتقىشتاردى كوپ پايدالانىپ, اي سايىن جارىق ءۇشىن 13 مىڭ تەڭگە تولەپ وتىرمىز دەپ مۇڭىن شاقتى. ءۇش بولمەلى پاتەر بولا تۇرا وتباسى مۇشەلەرى ءبىر بولمەگە قامالىپ وتىرعان جايى بار.
انىقتاعانىمىزداي, مامەتوۆا كوشەسىندەگى الگى ءتورت ءۇيدىڭ ارقايسىسىندا 80 پاتەردەن بار ەكەن. سوندا بۇگىندە تەك ءبىر شاعىن اۋداندا 320 پاتەر جىلۋسىز وتىر دەگەن ءسوز. قالالىق ءماسليحاتتىڭ دەپۋتاتى ەركىن قۇسان مامەتوۆا كوشەسى, 54/2-ءۇيدىڭ جانىنداعى جىلۋ ماگيسترالىندە اقاۋ شىققانىن, جوندەۋشىلەر قازىر ونى قالپىنا كەلتىرۋ جۇمىستارىمەن شۇعىلدانىپ جاتقانىن جەتكىزدى. بۇگىندە جىلۋ-ەنەرگيا ورتالىعى دا جىلۋ پارامەترلەرىن كوتەرە قويماعان. بۇعان دەيىن بەركىمباەۆ كوشەسى, 99-ءۇيدىڭ تۇرعىندارى دا جىلۋعا قوسىلماي جاتقانىنا شاعىمدانىپ, ول جەردەگى ماسەلە ەندى شەشىلىپتى.
ال ەكىباستۇز قالاسىنىڭ اكىمى ايان بەيسەكين شاھاردىڭ ءبىراز بولىگىندە جىلۋعا تولىق قوسىلماعان ۇيلەردىڭ بار ەكەنىن جاسىرمادى. بۇلاردى وسى ءبىر-ەكى كۇندە جىلۋمەن تولىق قامتيمىز دەپ سەندىرىپ وتىر. ونىڭ دەرەگىنشە, جەكە ۇيلەر سەكتورىندا 100-گە جۋىق باسپاناعا جىلۋ ازىرگە ەنبەگەن. بيىل الا جازداي شاھار كوشەلەرىندە جەلىلەردى جوندەۋ جۇرگىزىلگەنى ءمالىم. جاڭادان شىعىپ جاتقان اقاۋلاردىڭ كوبى ەسكى قۇبىرلارعا تيەسىلى كورىنەدى. ايتسە دە, بۇعان دەيىنگى سىناۋ جۇمىستارىندا ارنايى بريگادالار ولاردى قالاي اڭعارماي قالعانى تاڭعالدىرادى.
وبلىس اكىمىنىڭ ءباسپاسوز قىزمەتى تاراتقان مالىمەتكە سۇيەنسەك, وتكەن اپتادا عانا وبلىس باسشىسى اسايىن بايحانوۆ ەكىباستۇزداعى جەو-دا جەدەل شتابتىڭ وتىرىسىن وتكىزىپتى. قازىر مۇندا ءتورت قازاندىق ىسكە قوسىلىپ, بىرەۋى رەزەرۆكە الىنعان. قالعان بەس قازاندىقتاعى جوندەۋ جۇمىستارىن ماماندار قازان ايىنىڭ سوڭىنا دەيىن اياقتاماق. ءوڭىر باسشىسى اپتا سايىن پاۆلودار مەن ەكىباستۇز اراسىنا شاپقىلاپ ءجۇر. الايدا 24 قازانعا دەيىن شاھارداعى باسپانالار جىلۋمەن تولىق قامتىلادى دەگەن ۋادە ورىندالماي قالاتىنداي. سەبەبى جوعارىدا اتالعان مەكەنجايلاردان بولەك, جىلۋعا جارىماي وتىرعان كوپپاتەرلى تۇرعىن ۇيلەر ءالى دە بارشىلىق. پروبلەمالى ۇيلەردىڭ دەنى اباي, بەركىمباەۆ, بوگەنباي باتىر, كوشەرباەۆ, ماتروسوۆ, مولداعۇلوۆا, ءماشھۇر ءجۇسىپ, ساتباەۆ, تورايعىروۆ, شەشەمبەكوۆ, ەنەرگەتيكتەر كوشەلەرىندە ورنالاسقان. قارا كۇز تۇسپەي جاتىپ جىلۋعا جارىماعان كومىرلى شاھاردىڭ جۇرتى ارقانىڭ ساقىرلاعان سارى ايازىندا ۇيىمىزدە ءۇسىپ قالمايمىز با دەپ الاڭداپ وتىر.
پاۆلودار وبلىسى,
ەكىباستۇز قالاسى
