بيىلعى 26 ماۋسىمدا «ەگەمەندە» جاريالانعان «ۇلت ۇستازىن قالاي ارداقتاپ ءجۇرمىز؟» اتتى ماقالادا اقاڭنىڭ 150 جىلدىق مەرەيتويىنا وراي قابىلدانعان يگى شەشىمدەردىڭ ورىندالۋى كەشەۋىلدەپ كەتكەنىن جازعان ەدىك.
ماقالادا احمەت بايتۇرسىن ۇلى اتىنداعى اۋەجايعا كەلىپ-كەتىپ جاتقان ۇشاقتاردىڭ ۇشار-قونار حابارلامالارىندا اقاڭ ەسىمىنىڭ مۇلدە اتالمايتىنى, اۋەجايدىڭ رەسمي سايتىنداعى اقپاراتتىڭ ءبارى تەك ورىس تىلىندە عانا بەرىلگەنى, اۋەجاي عيماراتىنا ءالى كۇنگە دەيىن ۇلت ۇستازىنىڭ ەسىمى ىلىنبەگەنى, سونداي-اق وڭىرلىك ۋنيۆەرسيتەتتىڭ باس عيماراتىنىڭ ماڭدايىنداعى بايتۇرسىن ۇلى «بايتۇرسىنوۆ» بولىپ تۇرعانى, قالاداعى توعىز قابات ءزاۋلىم ۇيگە ىلىنگەن مۇرالدىڭ ۇلت ۇستازىن مازاق ەتكەندەي اسەر قالدىراتىنى تۋراسىنداعى ەلدىڭ وكپە-رەنىشى ايتىلعان.
ارتىنشا ماقالادا كوتەرىلگەن ماسەلەلەردىڭ شەشىم تابۋىنا «Amanat» پارتياسىنىڭ جانىنداعى «ميراس» قوعامدىق كەڭەسىنىڭ ءتورايىمى, وبلىستىق ءماسليحاتتىڭ دەپۋتاتى قىرمىزى جاڭبىرشينا ارالاسىپ, ءبىراز شارۋانى ىلگەرىلەتىپ تاستاعانىن ريزاشىلىقپەن اتاپ وتكەن ءجون. وبلىستىق جولاۋشىلار كولىگى جانە اۆتوموبيل جولدارى باسقارماسىنا ساۋال جولداعان قازاقتىڭ نامىسقوي قىزى باسقارما باسشىسى ولجاس نۇرعاليەۆتەن «ەل ۇكىمەتىنىڭ «قوستاناي» حالىقارالىق اۋەجايى» اق-عا
احمەت بايتۇرسىن ۇلى ەسىمىن بەرۋ تۋرالى 2022 جىلدىڭ 24 ماۋسىمىنداعى №424 قاۋلىسىنا سايكەس, اۋەجايدىڭ جارعىسى, مەملەكەتتىك تىركەۋ تۋرالى كۋالىگى, ءمورى, ت.ب. قۇقىقتىق قۇجاتتارىنىڭ ءبارى رەتتەلدى. اۋەجايدىڭ جاڭا اتاۋى اەروپورت تەرمينالىن قايتا جاڭعىرتۋ جۇمىستارى اياقتالعان سوڭ ىلىنەدى», دەگەن جاۋاپ الىپتى.
– اۋەجاي باسشىسى «جوندەۋ جۇمىستارى كۇزگە قاراي اياقتالادى. سونى كۇتىپ وتىرمىز. ال ۇشاق ىشىندەگى حابارلامانى دۇرىستاۋ تۋرالى بارلىق باعىتتاعى اۋە كومپانياسىنا حات جولدادىق. بۇدان بىلاي قونعان ۇشاقتىڭ ءبارى «احمەت بايتۇرسىن ۇلى اتىنداعى قوستاناي حالىقارالىق اۋەجايىنا كەلىپ قوندىق» دەپ حابارلايتىن بولادى» دەگەن. ودان كەيىن اۋەجاي باسشىسى اۋىسىپ كەتتى عوي. جاڭا باسشىعا دا بىرنەشە رەت حات جازىپ, سىزدەر «FlyArystan», «Air Astana», «Qazag Air» سياقتى اۋە كومپانيالارىنىڭ بارىنە قايتادان رەسمي حات جولداپ, ۇشىپ بارا جاتقاندا, قونعاندا احمەت اتامىزدىڭ اتى ايتىلسىن دەپ قايتادان ەسكەرتىڭىزدەر دەگەنمىن. سودان كەيىن ءبىراز ادامداردان سۇراستىرىپ ءبىلدىم, قازىر كەلىمدى-كەتىمدى ۇشاقتىڭ ءبارى اۋەجاي اتاۋىن دۇرىس ايتىپ جاتىر. مۇنى تاياۋدا استانادان كەلگەن قىزىم دا ايتىپ كەلدى. اۋەجاي باسشىسى ۋادەسىندە تۇردى. اۋەجايدىڭ جارقىراپ تۇرعان جاڭا اتاۋىن ءوز كوزىمىزبەن كورىپ, قۋانىپ جاتىرمىز. وبلىس بيۋدجەتىنەن ارنايى قاراجات بولگىزىپ, وسى ءىستى اياعىنا دەيىن جەتكىزگەن اكىمگە دە, اۋەجاي باسشىسى اسقار قۇرال ۇلىنا دا راقمەت, – دەدى ءماسليحات دەپۋتاتى.
قىرمىزى ساپارقىزى احمەت بايتۇرسىن ۇلى اتىنداعى حالىقارالىق اۋەجايدىڭ باسشىسى اسقار بەكبوسىنوۆقا اۋەجاي الدىنداعى اشىق الاڭعا ۇلت ۇستازىنىڭ ەسكەرتكىشىن ورناتىپ, اينالاسىن گۇلزار ەتۋ تۋرالى ۇسىنىس ايتىپتى. «ول كۇنگە دە جەتەرمىز, ۇلت ۇستازىنىڭ ەسىمى, ءتىپتى اۋەجاي ماڭىنداعى «اەروپورت» شاعىن اۋدانىنا بەرىلسە دە ارتىق بولمايدى. بۇل ەندى الداعى كۇننىڭ ەنشىسىندەگى شارۋا», دەدى قىرمىزى ساپارقىزى.
اۋەجايدىڭ رەسمي سايتى دا قازاقشالانىپتى. سايتتىڭ باس بەتىنە ءىرى ارىپتەرمەن ادىپتەلگەن «احمەت بايتۇرسىن ۇلى اتىنداعى «قوستاناي» حالىقارالىق اۋەجايى» اكتسيونەرلىك قوعامى» دەگەن جازۋ دا بىردەن كوزگە جىلى ۇشىراي كەتەدى.
وكىنىشكە قاراي, جاڭا وقۋ جىلىن رەسمي تۇردە «احمەت بايتۇرسىن ۇلى اتىنداعى قوستاناي وڭىرلىك ۋنيۆەرسيتەتى» بولىپ باستاعان ءبىلىم ورداسى ءالى كۇنگە دەيىن باس عيماراتىنىڭ ماڭدايشاسىنداعى «ا.بايتۇرسىنوۆ» دەگەن جازۋدى وزگەرتە الماي وتىر.
«اەروپورت» شاعىن اۋدانىنداعى 25-ءۇيدىڭ قابىرعاسىنا سالىنعان ۇلت ۇستازىنىڭ مۇرالى دا سول قالپىندا. قىرمىزى ساپارقىزىنىڭ ايتۋىنشا, قالا اكىمدىگى كوپ قاباتتى ءزاۋلىم ءۇيدى سالعان مەردىگەر كومپانيانىڭ باسشىسىمەن سويلەسىپ, مۇرالدى ۇستىنەن بوياپ تاستاۋدى نەمەسە احمەت بەينەسىن دۇرىستاپ قايتا سالۋدى سۇراعان ەكەن, الايدا كومپانيا باسشىسى بۇعان كونە قويماپتى.
مۇرالدى سالدىرعان KBS قۇرىلىس كومپانياسىنىڭ باس ديرەكتورى باۋىرجان ءسابيت ۇلىنا قوڭىراۋ شالىپ, ءوزىمىز دە سويلەسىپ كوردىك.
– مەن بۇل مۇرالدى الماتىدان ارنايى سۋرەتشى الدىرتىپ, 3 جارىم ملن تەڭگەگە سالدىردىم. سول كەزدەگى وبلىس باسشىسى ارحيمەد مۇحامبەتوۆ كەلىپ كورىپ, ۇناعانىن ايتىپ, ريزا بولىپ كەتكەن. احمەت اتامىزدىڭ بەينەسى جۇرتتىڭ كوز الدىندا جارقىراپ تۇرسىنشى دەگەن تازا نيەتپەن, شىنايى جۇرەكپەن سونشاما قارجى جۇمساپ جاسالعان دۇنيە ەدى. مىڭداعان ادام وسى مۇرالدىڭ الدىندا سۋرەتكە ءتۇسىپ, ماعان العىس ايتىپ جاتىر. سوندىقتان ءبىر-ەكى ادامعا ۇنامادى ەكەن دەپ, مەن بۇل مۇرالدى الىپ تاستاي المايمىن. راس, كوزىلدىرىگىندە كىشكەنە كەمشىلىك بار شىعار. بىراق ەڭ باستىسى, قاراپايىم حالىققا ۇنايدى. ەندى ماعان حابارلاسىپ اۋرە بولماڭىز. مەنىڭ جاۋابىم – وسى, – دەدى باۋىرجان ءسابيت ۇلى.
بۇدان كەيىن شاراداي بولعان شاقشا باسقا ەرىكسىزدەن-ەرىكسىز وسى ءبىز ءاپ-ادەمى سۋرەتكە قيانات جاساپ, جۇرتتى بوستان-بوس داۋرىقتىرىپ جۇرگەن جوقپىز با دەگەن كۇمان كەلەدى ەكەن. اقىرى الگى سۋرەتتى ءار نارسەگە ءادىل باعا بەرە الاتىن ازامات ءارى احمەتتى اكەم دەپ سويلەيتىن اتالاس ۇرپاعى عوي دەپ جۋرناليست داۋرەنبەك ابدىبەككە كورسەتتىك.
– سۋرەت وتە ساپاسىز سالىنعان. احمەت بايتۇرسىن ۇلىنا ۇقسامايدى. كادىمگى ءبىر مۋلتفيلم كەيىپكەرى سياقتى. كوزى اقيىپ كەتكەن. اۋزى بۇرتيىپ, ەرنى ءشۇرتيىپ تۇر. احمەت قازىر كوزى ءتىرى جۇرگەن تانىمال ارتىستەر سياقتى جەڭىل ءازىلدى كوتەرە بىلەتىن ادام بولسا – دۇرىس. ال ءوزىنىڭ حالقىنا ولشەۋسىز ەڭبەك ەتكەن, بار عۇمىرىن سول ۇلتقا قىزمەت ەتۋگە سارپ ەتكەن ادامنىڭ سۋرەتىن وسىنداي ەتىپ سالىپ, ونى كوپە-كورنەۋ ءىلىپ قويۋ – مەنىڭشە, دۇرىس ەمەس. قازاق ۇلتىنىڭ پەرزەنتتەرى ءۇشىن, جالپى ادامزات ىزگىلىگىنە قىزمەت ەتكەن تۇلعانى سىيلايتىن ادامزاتتىڭ ۇرپاعى ءۇشىن بۇل – ار-نامىسقا تيەتىن نارسە. مىناداي ەتىپ كوزىن اقيتىپ, اۋزىن بۇرتيتىپ, كوزىن ءشۇرتيتىپ سالىپ قويىپ, سونى ەلەمەي جۇرە بەرۋ – ازاماتتىققا سىن. اسىرەقىزىل پاتريوت ادام ەمەسپىن, بىراق مىنا سۋرەتتى كورىپ تۇرىپ, قاسىنان ءۇنسىز ءوتىپ كەتە المايسىڭ. قۇرىلىس كومپانياسىنىڭ باسشىسى «جۇرتقا ۇناپ جاتىر» دەگەندى قانداي ويمەن, قانداي پاراسات-پايىمنىڭ بيىگىنەن قاراپ ايتىپ تۇرعانىن بىلمەيمىن. ول كىسىنىڭ تۇسىنىگىنە مەن باعا بەرە المايمىن. بۇل مۇرال كوپ ادامعا ۇنامايدى, دەدى.
قالا اكىمدىگىنىڭ وكىلدەرىنەن «سىزدەر نە دەيسىزدەر؟» دەپ سۇراپ كورىپ ەدىك, ونى بوياپ تاستاۋ كەرەك شىعار دەگەن ءدۇدامالداۋ جاۋاپ الدىق. ۇلت ۇستازىنىڭ مۇراسىن زەرتتەپ جۇرگەن يبراحيم اعىتاي اعامىزدى اپارىپ, الگى مۇرالدى كورسەتىپ ەدىك, ءوڭى بىردەن سۇرلانىپ سالا بەردى. اقساقال «سوتقا بەرەمىن!» دەگەن ءسوزدى سىبىرلاپ قايتالاي بەردى.
تاياۋدا شىعىس قازاقستان وڭىرىندەگى ارىپتەسىمىز مەرەي قاينار ۇلى وسكەمەندەگى ءاليحان بوكەيحاننىڭ مۇرالىن سالىپ جىبەرىپتى. ۇلت كوسەمىنىڭ بەينەسىنە قاراي بەرگىڭ كەلەدى. كوز تويىپ, كوڭىل توعايادى. «ۇلتىنا, جۇرتىنا قىزمەت قىلۋ – بىلىمنەن ەمەس, مىنەزدەن» دەگەن سوزىنەن رۋح ويانادى. كىم سالدى ەكەن؟
قوستاناي وبلىسى
