فوتو: اشىق دەرەككوز
قاداعالاۋشى ورگاننىڭ مالىمەتىنشە, الەۋمەتتىك جەلىلەر مەن ينتەرنەت-رەسۋرستاردا «ونلاين I كونسۋلتاتسيا بەرۋ جانە قولداۋ قۇقىعى» دەگەن اتاۋمەن جاريالانعان بەينەروليك 240 مىڭنان استام قارالىم جيناعان. وندا ازاماتتارعا اقشالاي قاراجاتتى قايتارۋعا مەملەكەتتىك ورگان اتىنان جاردەم كورسەتۋ ۇسىنىلادى.
الايدا تەكسەرۋ بارىسىندا اتالعان بەينەماتەريالدىڭ جاساندى ينتەللەكت (ديپفەيك) تەحنولوگيالارىن پايدالانا وتىرىپ جاسالعانى انىقتالعان. ونىڭ نەگىزگى ماقساتى – ازاماتتاردى اداستىرىپ, كەيىننەن ولاردىڭ قاراجاتىن جىمقىرۋ.
سونىمەن قاتار, بەينەروليكتە كورسەتىلگەن «ينۆەستيتسيالاردى باقىلاۋ اگەنتتىگى» دەگەن اتاۋمەن قازاقستاندا ەشقانداي مەملەكەتتىك ورگان جوق ەكەنى رەسمي تۇردە حابارلاندى.
قۇزىرلى ورگاننىڭ تۇسىندىرۋىنشە, قۇقىق قورعاۋ جانە مەملەكەتتىك ورگاندار قىزمەتكەرلەرىنىڭ بەينەسىن پايدالانۋ – الاياقتاردىڭ ازاماتتاردىڭ سەنىمىنە كىرۋ تاسىلدەرىنىڭ ءبىرى. مۇنداي ايلا-تاسىلدەر ادامداردى جالعان اقپاراتقا يلاندىرۋدى جەڭىلدەتەدى.
باس پروكۋراتۋرا ازاماتتاردى جالعان اقپارات تاراتۋدان باس تارتۋعا شاقىردى
باس پروكۋراتۋرانىڭ تاپسىرماسى بويىنشا ىشكى ىستەر مينيسترلىگى اتالعان بەينەماتەريالدى ازىرلەۋگە جانە تاراتۋعا قاتىسى بار تۇلعالاردى انىقتاۋ ماقساتىندا تەكسەرۋ جۇرگىزىپ جاتىر. كىنالىلەر زاڭناماعا سايكەس جاۋاپكەرشىلىككە تارتىلادى.
وسىعان بايلانىستى باس پروكۋراتۋرا ازاماتتاردى بارىنشا قىراعى بولۋعا ۇندەيدى. الەۋمەتتىك جەلىلەردە, مەسسەندجەرلەردە جانە وزگە دە ينتەرنەت-رەسۋرستاردا تارالاتىن اقپاراتقا سىني كوزقاراسپەن قاراپ, كۇماندى سىلتەمەلەردى اشپاۋ قاجەت. سونداي-اق جەكە دەرەكتەردى جانە اقشالاي قاراجاتتى ءۇشىنشى تۇلعالارعا بەرمەۋ ماڭىزدى.
SMS-بلاستەر مەن ديپفەيك: باس پروكۋراتۋرا 18 جاڭا كيبەرقاۋىپتى انىقتادى
ايتا كەتەيىك, مەملەكەتتىك ورگاندار مەسسەندجەرلەر, الەۋمەتتىك جەلىلەر نەمەسە بوگدە ونلاين-پلاتفورمالار ارقىلى اقشا قاراجاتىن قايتارۋ بويىنشا قىزمەت كورسەتپەيدى.
وسىنداي دەرەكتەر انىقتالعان جاعدايدا ازاماتتارعا قۇقىق قورعاۋ ورگاندارىنا دەرەۋ جۇگىنۋ نەمەسە «102» نومىرىنە حابارلاسۋ ۇسىنىلادى.
الاياقتىقتىڭ جاڭا ءتاسىلى تارادى: قاسكۇنەمدەر داۋىسىن وزگەرتىپ, سەنىمگە كىرەدى
