بۇعان دەيىن ماماندار جۇرگىزگەن تالداۋ ناتيجەسى كوڭىل كونشىتپەيدى. قالا مەكتەپتەرىندەگى سپورت الاڭدارىنىڭ 90 پايىزى ەسكىرىپ, زاماناۋي تالاپتارعا مۇلدەم ساي كەلمەيتىنى انىقتالعان. جارىقتاندىرۋدىڭ ناشارلىعى مەن قاۋىپسىز جابىننىڭ جوقتىعى ورەندەردىڭ سپورتقا دەگەن ىنتاسىن تەجەپ كەلگەن. وسى تۇيتكىلدى شەشۋ ماقساتىندا «قازاقستان حالقىنا» قورى تەمىرتاۋدا «تولىق قامتۋ» مودەلىن ىسكە اسىردى. بۇل – جەكەلەگەن نىسانداردى ەمەس, تۇتاس ءبىر قالانىڭ سپورتتىق ينفراقۇرىلىمىن كەشەندى تۇردە جاڭارتۋدىڭ بىرەگەي تاجىريبەسى.
قاراعاندى وبلىسىندا قور جالپى سوماسى 24 ملرد 750 ملن تەڭگەگە 33 الەۋمەتتىك جوبانى يگەرىپ جاتىر. قوماقتى قاراجاتتىڭ ەلەۋلى بولىگى – 2,5 ملرد تەڭگەسى تىكەلەي تەمىرتاۋدىڭ سپورتتىق ينفراقۇرىلىمىنا باعىتتالدى. بۇل ينۆەستيتسيانىڭ 2,4 ملرد تەڭگەسىن «قازاقستان حالقىنا» قورى بولسە, 100 ملن تەڭگەسىن سەرىكتەس «باتىر بولامىن» قورى قامتاماسىز ەتتى. ناتيجەسى دە كوپ كۇتتىرگەن جوق. نەبارى ءۇش ايدىڭ ىشىندە قالانىڭ 30 مەكتەبىندە زاماناۋي سپورت كەشەندەرى بوي كوتەردى. 30 فۋتبول الاڭى, 28 باسكەتبول-ۆولەيبول الاڭى, 29 workout جاتتىعۋ ايماعى, 5 حوككەي كورتى, 30 سەكىرۋ ايماعى مەن كەدەرگىلەر جولاعى وقۋشىلار يگىلىگىنە بەرىلدى.
تەحنولوگيالىق ساپاسىنا كەلەتىن بولساق, مەكتەپ اۋلاسىنداعى جابدىقتار حالىقارالىق ستاندارتتاردان كەم تۇسپەيدى. ماسەلەن, باسكەتبول قالقاندارى NBA دەڭگەيىندەگى بروندالعان شىنىدان جاسالسا, الاڭ بوياۋى 600 گرادۋس تەمپەراتۋرادا كۇيدىرىلىپ باسىلعان. بۇل اتالعان نىساندار كەم دەگەندە الداعى ون جىل بويى جاڭارتۋدى قاجەت ەتپەي, ۇرپاق يگىلىگىنە قىزمەت ەتەدى دەگەن ءسوز.
جوبانىڭ ماڭىزى تۋرالى «قازاقستان حالقىنا» قورىنىڭ باسقارما مۇشەسى سەرىكبەك ەلشىبەكوۆ: «بىزگە ءاربىر بالانىڭ سپورتپەن اينالىسۋعا مۇمكىندىگى بولۋى – باستى مىندەت. پرەزيدەنتىمىز قاسىم-جومارت توقاەۆ اتاپ وتكەندەي, سپورت اسىرەسە شاعىن قالالار مەن اۋىلدىق جەرلەردە قولجەتىمدى بولۋعا ءتيىس. ءبىز ورناتقان جابدىقتاردىڭ ساپاسى ءتىپتى مەگاپوليستەردەگى كاسىبي كلۋبتاردان كەم تۇسپەيدى. «باتىر بولامىن» قورىمەن بىرلەسىپ, ەلىمىز كولەمىندە 200-دەن استام سپورت زالىن سالدىق. سول جەرلەردەن بۇگىندە الەم چەمپيوندارى شىعىپ جاتىر. تەمىرتاۋدا دوپ تەۋىپ جۇرگەن بۇگىنگى جاس جەتكىنشەكتەردى جاقىن ارادا حالىقارالىق ارەنالاردان كورەتىنىمىزگە سەنىمىم كامىل. ماقساتىمىز – ءاربىر بالانىڭ تۇرعىلىقتى جەرىنە قاراماستان, ەڭ زاماناۋي الاڭداردا جاتتىعۋىنا جاعداي جاساۋ», دەيدى.
تەمىرتاۋ قالاسىندا ءتورت كۇنگە سوزىلعان تارتىستى دودا «قازاقستان حالقىنا» قورى كۋبوگى» ءوز مارەسىنە جەتتى. جارىسقا قاتىسقان بارلىق كوماندالار جاڭا الاڭداردا ءوز شەبەرلىكتەرىن ورتاعا سالىپ, سپورتقا دەگەن جوعارى ىنتاسىن كورسەتتى. تۋرنير قورىتىندىسىندا جەڭىس تۇعىرىنان كورىنگەن ۇزدىكتەر انىقتالدى. 6-7 سىنىپ وقۋشىلارى اراسىندا №17 مەكتەپ كومانداسى توپ جارىپ, التىننان القا تاقتى. ەكىنشى ورىندى №12 مەكتەپ يەلەنسە, ۇزدىك ۇشتىكتى №2 مەكتەپ تۇيىندەدى. 8-10 سىنىپ وقۋشىلارى اراسىنداعى باسەكەدە ءبىلىم-يننوۆاتسيا ليتسەيىنىڭ ورەندەرى قارسىلاس شاق كەلتىرمەي, جەڭىمپاز اتاندى. كۇمىس جۇلدە №17 مەكتەپكە بۇيىرسا, ءا.بوكەيحان اتىنداعى گيمنازيا وقۋشىلارى قولا جۇلدەنى قاناعات تۇتتى.
جۇلدەگەرلەرگە اقشالاي سىيلىقتار, جاڭا سپورتتىق فورمالار, سومكەلەر مەن دوپتار تابىستالدى. ماراپاتتار جاس تالانتتارعا ۇلكەن قولداۋ ءارى الداعى حالىقارالىق جارىستارعا دايىندىقتىڭ باستاۋى بولماق.
بۇل باستاما تەمىرتاۋمەن عانا شەكتەلمەيدى. بۇعان دەيىن وسىنداي نىساندار قاراعاندى, شاحتينسك, ساران, بالقاش, جەزقازعان قالالارىنداعى ارنايى مەكتەپ-ينتەرناتتار مەن بالالاردى قولداۋ ورتالىقتارىندا سالىنعان بولاتىن. قازىرگى تاڭدا جاڭا الاڭدار تەك دەنەشىنىقتىرۋ ساباقتارىنا عانا ەمەس, سەكتسيالار مەن مەكتەپ جانىنداعى لاگەرلەردىڭ جۇمىسىن جانداندىرۋعا, بۇقارالىق سپورتتى جاڭا بەلەسكە كوتەرۋگە مۇمكىندىك بەرىپ وتىر.
قاراعاندى وبلىسى,
تەمىرتاۋ قالاسى
