فوتو: ۇكىمەت, تەلەگرام
وتكەن كۇزگى-قىسقى كەزەڭدە قازاقستاننىڭ ءبىرتۇتاس ەلەكتر ەنەرگەتيكالىق جۇيەسىندە تۇتىنۋ ماكسيمۋمى 2025 جىلعى 18 جەلتوقساندا تىركەلىپ, 17 724 مۆت-تى قۇرادى. بۇل الدىڭعى 2024-2025 جىلدارداعى كەزەڭمەن سالىستىرعاندا 3%-عا نەمەسە 521 مۆت-قا جوعارى.
جالپى, 2025 جىلدىڭ قورىتىندىسى بويىنشا ەلەكتر ەنەرگياسىن تۇتىنۋ كولەمى دە ايتارلىقتاي ارتقان. اتاپ ايتقاندا, 2024 جىلمەن سالىستىرعاندا 4,6 ملرد كۆتساعاتقا نەمەسە 3,8%-عا ءوسىپ, 124,6 ملرد كۆتساعاتقا جەتتى.
ەلەكتر ەنەرگياسىن ءوندىرۋ كورسەتكىشى دە وڭ ديناميكا كورسەتكەن. 2025 جىلى ءوندىرىس كولەمى 5,2 ملرد كۆتساعاتقا نەمەسە 4,4%-عا ارتىپ, 123,1 ملرد كۆتساعاتتى قۇرادى. بۇل ەلدەگى ەنەرگياعا دەگەن سۇرانىستىڭ ارتىپ وتىرعانىن جانە گەنەراتسيا مۇمكىندىكتەرىنىڭ كەزەڭ-كەزەڭىمەن كۇشەيىپ كەلە جاتقانىن اڭعارتادى.
ءىرى ەنەرگەتيكالىق نىسانداردان تارايتىن زياندى شىعارىندىلار 35 پايىزعا ازايادى
الداعى كەزەڭگە بولجام دا ناقتىلاندى. مامانداردىڭ باعالاۋىنشا, 2026-2027 جىلدارداعى كۇزگى-قىسقى كەزەڭدە ماكسيمالدى تۇتىنۋ كولەمى 18,2 گۆت دەڭگەيىنە جەتەدى. وسى جۇكتەمەنى ەڭسەرۋ ءۇشىن ءىرى ەلەكتر ستانسالارى ناقتى رەجيمدە جۇمىس ىستەۋگە ءتيىس. اتاپ ايتقاندا:
– ەكىباستۇز گرەس-1 – 8 بلوك;
– ەكىباستۇز گرەس-2 – 2 بلوك;
– «ەەك» اق – 7 بلوك;
– جامبىل گرەس-ءى – 4 بلوك, ونىڭ ىشىندە ءبىر رەزەرۆتىك بلوك تۇراقتى دايىندىقتا بولۋى قاجەت.
سونىمەن بىرگە, تۇراقتى ەنەرگيامەن قامتۋ ءۇشىن بىرقاتار ماڭىزدى مىندەت ايقىندالدى. جوسپارلانعان جاڭا قۋاتتاردى ىسكە قوسۋ, سونىڭ ىشىندە تۇركىستان جانە قىزىلوردا بۋ-گاز قوندىرعىلارى, الماتى جەو-2 مەن جەو-3 جاڭعىرتۋ جوبالارى ۋاقىتىلى اياقتالۋعا ءتيىس.
بۇدان بولەك, نەگىزگى گەنەراتسيالايتىن جانە ەلەكتر جەلىلىك جابدىقتاردى جوندەۋ جۇمىستارى جۇيەلىك وپەراتورمەن كەلىسىلگەن مەرزىمدە تولىق ورىندالۋى قاجەت. جىلۋ ەلەكتر ستانسالارىندا كومىردىڭ نورماتيۆتىك قورى قامتاماسىز ەتىلىپ, گاز ەلەكتر ستانسالارى ءۇشىن كوگىلدىر وتىننىڭ ۇزدىكسىز جەتكىزىلۋى دە باستى نازاردا بولادى.
سونداي-اق, جامبىل گرەس-ءىن جەتكىلىكتى كولەمدە وتىنمەن جانە سالقىنداتقىش سۋمەن قامتۋ ماسەلەلەرى الدىن الا شەشىلۋى ءتيىس. بۇل الداعى ماۋسىمدا تاۋەكەلدەردى ازايتىپ, ەنەرگەتيكالىق جۇيەنىڭ تۇراقتى جۇمىس ىستەۋىنە مۇمكىندىك بەرەدى.
