فوتونى تۇسىرگەن اۆتور
«سولو» ادىسىندەگى مارافوندا جالعىزىلىك جولعا شىققان ەرنات استانا قالاسىن اينالىپ ءجۇردى. «مەن بۇل مارافوندى رەسپۋبليكا كۇنىنە جانە باۋىرلاس تۇركيا مەملەكەتىنىڭ 100 جىلدىعىنا ارنايمىن. انادولىداعى تۇرىك اعايىننىڭ ءتۇپ قازىعى, اتا جۇرتى – قازاقتىڭ جەرى التاي ولكەسى. مۇستافا كەمەل اتاتۇرىك 1924 جىلى تۇرىك رەسپۋبليكاسىن قۇردى. ال ءاليحان بوكەيحان باستاعان الاش ارىستارى ءبىر تۋدىڭ استىنا بىرىگىپ, 1917 جىلى الاش اۆتونومياسىنىڭ قازىعىن قاقتى. رەسپۋبليكا كۇنىنە وراي جوسپارلاعان ۆەلوشەرۋدە مەجەلەگەن ۋاقىتتا كەلۋىمە كۇزدىڭ قارا سۋىعى ايتارلىقتاي كەدەرگىسىن كەلتىرىپ كەشىگىپ جەتتىم. قارسى سوققان جەل جىلدامدىعىمدى تەجەسە, ارقامدى قارىعان ىزعار دا بوگەسىن بولدى. 60 شاقىرىمنان كەيىن جارتى ساعاتقا ايالداپ, اس-سۋىمدى ءىشتىم, ودان كەيىن توقتاعام جوق. اتا-بابالارىمىزدىڭ ازاتتىق جولىنداعى ارپالىسقا تولى ەڭبەگىن, تاۋەلسىزدىككە قول جەتكىزۋ ءۇشىن باستارىن قاتەرگە تىككەنىن كەيىنگى ۇرپاق ۇمىتپاۋى ءتيىس. ەگەمەندىكتىڭ نىعايۋىنا ءار ازامات ءوزىنىڭ تيتتەي دە بولسا ۇلەسىن قوسۋى كەرەك دەپ سانايمىن. سوندىقتان دا ەلىمىز ءۇشىن ايتۋلى مەرەكە قارساڭىندا «سۇرجەكەيىمدى» (ۆەلوسيپەد) سايلاپ جولعا شىقتىم. مەجەلەگەن قاشىقتىق 100 شاقىرىم بولۋى ءتيىس ەدى. حالىقارالىق سەرتيفيكات بەرىلگەن Strava قوسىمشاسىنىڭ كورسەتكىشى بويىنشا باسىپ وتكەن جولىم – 106 شاقىرىم. بۇل سان دا كەزدەيسوقتىق ەمەس دەپ پايىمدايمىن, سەبەبى بيىل ءاليحان بوكەيحان باستاعان الاش ارىستارى قۇرعان ۇلتتىق مەملەكەت – الاش اۆتونومياسىنا 106 جىل تولدى. بىلتىر ۇلت ۇستازى احمەت بايتۇرسىن ۇلىنىڭ 150 جىلدىق مەرەيتويى يۋنەسكو كولەمىندە تويلاندى. قايراتكەردىڭ مەرەيتويىنا وراي تۋعان توپىراعى تورعايدان شىعىپ 55 كۇن ءجۇرىپ, ىستانبۇل قالاسىنا دەيىن 5555 شاقىرىم جولدى ۆەلوسيپەدپەن ءوندىردىم», دەيدى ە.مەلس ۇلى.
ۆەلومارافونشى كەلەسى جىلدىڭ ءساۋىر ايىندا تۇركيا ەلىنەن باستاپ, ەۋروپا قۇرلىعىنىڭ 10 مەملەكەتىن كوكتەي ءوتىپ, جازعى وليمپيادا ويىندارى ۇيىمداستىرىلاتىن پاريج قالاسىنا دەيىن بارۋدى جوسپارلاپ وتىر. ول بۇل شەرۋىن اكادەميك قانىش ساتباەۆتىڭ تۋعانىنا 125 جىل جانە مۇسىلمان حالىقتارى اراسىنان تۇڭعىش بولىپ تاەكۆوندادان 6-دان يەگەرى اتانعان مۇستافا وزتىرىكتىڭ تۋعانىنا 70 جىل تولۋىنا ورايلاستىرماق.
ۆەلوشەرۋشىنى تۇركيانىڭ قازاقستانداعى توتەنشە جانە وكىلەتتى ەلشىسى مۇستافا كاپۋدجۋ باستاعان باستاماشىل توپ ەسىل وزەنىنىڭ جاعالاۋىنداعى مۇستافا كەمال اتاتۇرىك ەسكەرتكىشىنىڭ الدىندا سالتاناتپەن قارسى الدى.
