وتكەن جىلى «QSOIL – Quest System of Interactive Learning – ينتەراكتيۆتى وقىتۋدىڭ كۆەست جۇيەسى» جوباسىنا اۆتورلىق قۇقىق العان جاس تالاپ ەربولات سەمباەۆتىڭ ايتۋىنشا, تەوريا مەن تاجىريبەنى ۇشتاستىرۋ ارقىلى عانا مەكتەپتە ساپالى ءبىلىم بەرۋگە قول جەتكىزۋگە بولادى. ول ءۇشىن ءتۇرلى وقۋ ادىستەرىنىڭ كومەگىنە سۇيەنە وتىرىپ, ءبىلىم الۋعا ق ۇلىقسىز وقۋشىلاردى دا ىنتالاندىرىپ وتىرۋ ماڭىزدى. ءىلياس ەكەۋى جاساپ شىعارعان ونلاين جۇيە ۇستازدارعا وقۋشىلار ورىنداعان باقىلاۋ جۇمىستارىن تەكسەرۋگە, قورىتىندى باعا شىعارۋعا كومەكتەسەدى.
– عىلىمي جەتەكشىمىز بوريس زەلەنوۆتىڭ وففلاين رەجىمدە وتكىزىپ جۇرگەن «ەرۋديت» ويىنىنا ءتانتى بولاتىنبىز. قىزىققانىمىز سونشا, ۇستازىمىزدىڭ كەلەسى زياتكەرلىك ويىندى وتكىزگەنىن اسىعا كۇتەتىنبىز. ويىن بارىسىندا وقۋشىلار ءماجىلىس زالىنا جينالىپ, توپتارعا ءبولىنىپ, قاعازعا جازىلعان سۇراقتارعا جاۋاپ بەرىپ, قىزىقتى ۆيكتورينالىق جارىسقا قاتىساتىن. ال ءبىز جاساپ شىعارعان جوبا – سول «Erudit Plus» – «ەرۋديت» ويىنىنىڭ ەلەكتروندى نۇسقاسى. ويىننىڭ ەلەكتروندى نۇسقاسى ىڭعايلىراق ءارى وعان بىردەن بىرنەشە سىنىپتىڭ وقۋشىلارى قاتىسا الادى, – دەيدى ەربولات سەمباەۆ.
«Go» دەپ اتالاتىن باعدارلامالاۋ تىلىندە ازىرلەنگەن جوبانى ىسكە اسىرۋ بارىسىندا وقۋشىلار «Web sockets» تەحنولوگياسى مەن «Postgres» جانە «Docker» مالىمەتتەر قورىن پايدالانعان. جاس ونەرتاپقىشتاردىڭ عىلىمي جەتەكشىسى بوريس زەلەنوۆتىڭ ايتۋىنا قاراعاندا, اتالعان تەحنولوگيانىڭ كۇردەلى تاقىرىپتاردى وڭاي يگەرۋگە, وقۋشىلاردىڭ ءبىلىم ساپاسىن ارتتىرۋعا كومەگى زور.
– شاكىرتتەرىم ويلاپ تاپقان جاڭا جۇيەنى قاراشا ايىندا تاجىريبەدەن وتكىزىپ, تۇڭعىش رەت رەسمي ءبىلىم جارىسىن وتكىزۋدى جوسپارلاپ وتىرمىز. ودان كەيىن وبلىس, رەسپۋبليكا كولەمىنە شىعۋعا تالپىنىپ كورەمىز, – دەيدى اقپاراتتىق تەحنولوگيا ءپانىنىڭ مۇعالىمى بوريس زەلەنوۆ.
قوستاناي وبلىسى
