فوتو: اشىق دەرەككوز
دەپۋتاتتىڭ سوزىنشە, لۋدومانيا – ەلىمىزدەگى ەڭ ۇلكەن ماسەلەلەردىڭ ءبىرى, بۇنى قانشاما حاتتار جانە حالىقپەن كەزدەسۋلەر راستاي تۇسەدى. وكىنىشكە قاراي, دۇنيەجۇزى بويىنشا لۋدومانياعا بايلانىستى قازاقستان ەڭ بەلسەندىلەردىڭ قاتارىندا تۇر.
«157 مىڭ قۇقىق بۇزۋشىلىقتىڭ 31 مىڭى قۇمار ويىندارى كەسىرىنەن جاسالعان. ال اجىراسۋدىڭ 40 پايىزى لۋدومانيادان بولعان. ءوز-وزىنە قول جۇمساۋدىڭ باستى سەبەبى - اسىرا ۇلكەن قارىز جانە نەسيە. پروكۋراتۋرادان الىنعان رەسمي مالىمەت بويىنشا بىلتىر 3 676 ءسۋيتسيدتىڭ ءاربىر بەسىنشىسى قۇمار ويىندارىنا قاتىستى بولعان. بىراق ءبىز ىشكى ىستەر مينيسترلىگىمەن دە سويلەستىك, كورسەتكىش 50 پايىزعا دەيىن بارادى», دەدى رۋسلان بەردەنوۆ.
ونىڭ ايتۋىنشا, ەلىمىزدەگى جالپى 3 ملن 500 مىڭ ەر بالانىڭ 700 مىڭنان استامى ءبىر رەت بولسىن ءباس تىككەن, ياعني, قالاي ويناۋدى بىلەدى, لۋدومانيامەن تانىس دەگەن ءسوز. بۇل 1 ملن-نان استام قۇمارپازدار سانى ودان ءارى وسەتىنىن بىلدىرەدى.
ءماجىلىستىڭ قارجى جانە بيۋدجەت كوميتەتىنىڭ مۇشەسى ر. بەردەنوۆتىڭ ايتۋىنا قاراعاندا, ونىڭ ارىپتەستەرى ايتىپ جۇرگەن 350 مىڭ لۋدومان بار دەگەن ەسكى كورسەتكىش قازىرگى تاڭدا 1 ملن-عا جەتكەن. تاعى ءبىر الاڭداتارلىعى - 2017 جىلدان باستاپ بۋكمەكەرلىك بيزنەس اينالىمى 15 ملرد بولسا, 2022 جىلى 554 ملرد, ال 2023 جىلى 1 تريلليون تەڭگەگە جەتپەكشى. اينالىم 70 ەسە وسسە دە, سالىق تولەۋ مولشەرى وزگەرمەي, سول 2017 جىلعى مولشەردە تۇرىپ قالعان. جاۋاپتى مينيستر ونلاين جۇيەسىن جاپساق, بيۋدجەتكە تۇسەتىن سالىق ازايىپ قالادى دەگەن نەگىزدەمە ايتادى. نەگىزگى ماقسات سالىق بولسا, 2017 جىلدان بەرى سالىق كوتەرۋ ماسەلەسى ايتىلماعان.
«قاۋىپسىزدىك كەڭەسىندە مەملەكەت باسشىسى «ويىن بيزنەسىندە» قاراجاتتىڭ بارلىق قوزعالىسىن قاداعالاپ, بۇزۋشىلىقتار انىقتالعان كەزدە قاجەتتى شارالاردى قولدانۋ ماڭىزدى ەكەنىن ەرەكشە اتاپ ءوتتى. قاجەتتى شەشىم قابىلدار الدىندا كونستيتۋتسيامىزدىڭ ءبىرىنشى بابىنا سايكەس, مەملەكەتتىڭ ەڭ قىمبات قازىناسى ادام جانە ونىڭ ءومىرى دەگەن قاعيدانى قاتاڭ ۇستانۋىمىز قاجەت», دەپ تۇيىندەدى رۋسلان بەردەنوۆ.
