كوللاجدى جاساعان – الماس ماناپ, «EQ»
WAPES – بۇل جۇمىسپەن قامتۋ قىزمەتىنە نەمەسە ەڭبەك نارىعىنداعى ساياساتتى دامىتۋعا جاۋاپتى مەملەكەتتىك جانە ۇكىمەتتىك ورگانداردىڭ حالىقارالىق كوممەرتسيالىق ەمەس قاۋىمداستىعى. ونى 1988 جىلى كانادا, فرانتسيا, گەرمانيا, نيدەرلاند, شۆەتسيا, اقش ەلدەرى حالىقارالىق ەڭبەك ۇيىمىمەن بىرلەسىپ قۇرعان. WAPES-كە مۇشە ەلدەر ءوزارا جاھاندىق كاسىبي بايلانىس ورناتۋدى كوزدەيدى. ياعني جۇمىسقا ورنالاستىرۋ, ەڭبەك ميگراتسياسى, كاسىپتىك وقىتۋ, مەملەكەتتىك جۇمىسپەن قامتۋ قىزمەتتەرىنىڭ بىرلەسكەن جوبالارى مەن ءىس-شارالارى شەڭبەرىندە ىنتىماقتاستىقتى ارتتىرادى.
ەڭبەك رەسۋرستارىن دامىتۋ ورتالىعىنىڭ دەرەگىنشە, ەلىمىزدەگى مەملەكەتتىك جۇمىسپەن قامتۋ قىزمەتىنە وڭىرلەردەگى جانە ءىرى قالالارداعى 20 ەڭبەك موبيلدىلىگى ورتالىعى, اۋداندار مەن قالالاردا ورنالاسقان 207 مانساپ ورتالىعى, جۇمىسپەن قامتۋ ماسەلەلەرى جونىندەگى جەرگىلىكتى ورگاندار كىرەدى.
ەلىمىز جۇمىسپەن قامتۋ جانە ەڭبەك نارىعى سالاسىندا اقپارات الماسۋ ماقساتىندا WAPES-كە مۇشە ەلدەرمەن بايلانىس ورناتا وتىرىپ, مەملەكەتتىك جۇمىسپەن قامتۋ سالاسىنداعى ۇردىستەر تۋرالى جۇرگىزىلەتىن جوبالار مەن زەرتتەۋلەرگە قاتىسا الادى. بۇل – ەلىمىزدىڭ جۇمىسپەن قامتۋ قىزمەتىنىڭ كاسىبي الەۋەتىن ارتتىرۋعا جانە ونىڭ قىزمەتىنە وزىق حالىقارالىق تاجىريبەنى ەنگىزۋگە, مەملەكەتتىك جۇمىسپەن قامتۋ ستراتەگياسى مەن قىزمەتى بويىنشا جاھاندىق ديالوگكە ۇلەس قوسۋعا, حالىقارالىق ارەناداعى جۇمىسپەن قامتۋ سالاسىنداعى مۇمكىندىگىن كورسەتۋگە, سونداي-اق قازاق ەلىنىڭ الەم ەلدەرى الدىندا ەڭبەك نارىعى بويىنشا سەنىمدى سەرىكتەس بولا الاتىنىن كورسەتەدى.
