التىن كۇزدىڭ جىلى دا جايماشۋاق كۇندەرىندە قازاق مادەنيەتى مەن ونەرىنىڭ قاسيەتتى شاڭىراعى ەلوردامىز – استانا قالاسىنىڭ مۋزىكالىق جاس كورەرمەن تەاترى شىرايلى شىمكەنتكە گاسترولدىك ساپارمەن كەلدى. بۇل ءبىزدىڭ وڭۇستىك ءوڭىرى ءۇشىن ەلەۋلى وقيعا بولدى دەپ ەسەپتەۋگە ابدەن بولادى. ەڭبەك دەمالىسىمنىڭ استانادا وتكىزگەن كۇندەرىمدە ءوزىم تاماشالاعان مۋزىكالىق جاس كورەرمەن تەاترى رەپەرتۋارىنداعى ء«شامشى», «ماحاببات بار ما؟», «شانەل №5», «اباي – توعجان», «عاشىق جۇرەك», «گاۋھارتاس» مۋزىكالىق دراماسى تەاتر سۇيەر قاۋىمىنىڭ نازارىنا ۇسىنىلدى. وسى اتالعان ساحنالىق قويىلىمدارمەن قۋانا-قۋانا قايتا قاۋىشتىم دەپ ەرەكشە سەزىممەن ايتا الامىن. ساحنا شىمىلدىعى زال تولى كورەرمەننىڭ جۇرەكجاردى قوشەمەتىمەن اشىلدى. جانىڭا جىلى ساۋلە شۋاعىن ۇيالاتار «كەلشى, ايىم» ءانىنىڭ اۋەنى دە قويىلىم بارىسىنان حابار بەرگەندەي وي سالادى. جازۋشى دۋلات يسابەكوۆ پوۆەسىنىڭ جەلىسى بويىنشا ساحنالانعان «گاۋھارتاس» مۋزىكالىق دراماسى كەرەمەت ۇزدىك قويىلىم ەكەندىگى ەل اۋزىندا ءجۇر. رەجيسسەرى ءارى تەاتر ديرەكتورى قازاقستاننىڭ ەڭبەك سىڭىرگەن قايراتكەرى اسحات ماەميروۆ. اۆتورلىق تۇلعا مەن قايىركەڭ ءرولىن سومداعان تانىمال اكتەر اسىلحان تولەپوۆ ءوزىنىڭ تابيعي دارىنى مەن تىنىمسىز ەڭبەگىنىڭ ارقاسىندا ونەر شىڭىن باعىندىرىپ جۇرگەن مۋزىكالىق جاس كورەرمەن تەاترىنىڭ وتە تالانتتى اكتەرى.
سپەكتاكلدى كورىپ وتىرىپ, سوڭىندا جانىڭمەن ەگىلىپ, كوڭىلىڭ بوساماۋى مۇمكىن ەمەس. قاتال دا ءور مىنەزدى تاستان, جانى نازىك سالتانات پەن سەزىمتال, اقىنجاندى قايىركەڭ كورەرمەن جۇرەگىنەن ۇلكەن ورىن الادى.
«گاۋھارتاس» مۋزىكالىق دراماسى ۇلتتىق ساحنا ونەرىنىڭ زور جەتىستىگى دەپ ايتۋعا ابدەن نەگىز بار. ەندەشە, كورەرمەن, «گاۋھارتاستى» كورەلىك. ال مۋزىكالىق جاس كورەرمەن تەاترى ۇجىمىنا, جالپى اكتەرلەر قۇرامىنا, اتاپ ايتسام, ورازالى يگىلىك, ينابات ريزابەكقىزى, سالامات مۇقاشەۆ, ماقپال دۇيسەن, باقداۋلەت ورازبەك, ەرنار مۇحامبەت, اققانات قۋاندىقوۆ پەن اسىلحان تولەپوۆكە شىعارماشىلىق تولاعاي تابىستار تىلەيمىن.
عازيزا ءالىباي,
ق.بەكتاەۆ اتىنداعى جالپى ءبىلىم بەرەتىن ورتا مەكتەپ مۇعالىمى
تۇركىستان وبلىسى,
ورداباسى اۋدانى
