ءىس-شاراعا ۇلتتىق عىلىم اكادەمياسىنىڭ اكادەميگى عاريفوللا ەسىم, سەنات دەپۋتاتى بەكبولات ورىنبەكوۆ, «قازاق گازەتتەرى» جشس باس ديرەكتورى, اكادەميك ديحان قامزابەك ۇلى, تەحنيكا عىلىمدارىنىڭ دوكتورى, ياساۋي كەسەنەسى عيماراتىنىڭ گەومەتريالىق ولشەمىن زەرتتەگەن اۋەز بايدىبەكوۆ, ىسكەر ازامات نۇرلان الجانقۇلوۆ جانە وقىتۋشى-پروفەسسورلار, ءدىن سالاسى ماماندارى, شاكىرتتەر قاتىستى.
– كىتاپتى جازعان ازامات جاماشەۆ, ەرنار ماجەن, دوربەتحان جومارت سىندى جىگىتتەرگە العىسىمدى بىلدىرەمىن. حالىقتىڭ تۇلەۋىنە بىردەن-ءبىر ۇيىتقى بولاتىن ءدىن سالاسى مەن ۇلتتىق ءداستۇر ساباقتاسا سيپاتتالعان قوس كىتاپتىڭ حالقىمىزدىڭ رۋحاني ومىرىنە زور اسەرىن تيگىزەدى دەپ ەسەپتەيمىن. جاستار دا, ۇلكەن كىسىلەر دە وسى كىتاپتاردى الا وتىرىپ, ءوز ىشىنەن تالداۋ جۇرگىزىپ, جاقسى قورىتىندى شىعارادى دەپ ويلايمىن. بىزگە وسىنداي زامان تالابىنا ساي كىتاپتار كەرەك, – دەدى سەناتور ب.ورىنبەكوۆ.
«سايىن دالانىڭ ساڭلاق عۇلامالارى» ەڭبەگىندە ۇلى دالا توسىندە قۇرىلعان مەملەكەتتەردىڭ تاريحى, ۇستانعان دىندەرى, ولاردىڭ يسلامدى قابىلداۋىنا تۇرتكى بولعان وقيعالار, ولارعا جاسالعان جورىقتار, مەشىت-مەدرەسەلەردىڭ پايدا بولۋى, عىلىم مەن ءبىلىمنىڭ دامۋى ەگجەي-تەگجەي زەردەلەنگەن. قازاق حالقىنىڭ مەملەكەت بولىپ قۇرىلعاننان باستاپ, بۇگىنگى كۇنىمىزگە دەيىنگى ءدىني احۋال, وعان اسەر ەتكەن تاريحي جانە ساياسي وقيعالار دا ءسوز ەتىلەدى.
– شىنىندا, ءدىن تاريحى, ءدىن ماسەلەسى دەگەن ۇعىمدار ەندى قالىپتاسىپ, زەرتتەلىپ جاتىر. سونىمەن بىرگە ءدىن ماسەلەسى قازىر قوعامدا كۇن تارتىبىندە تۇر. ءبىزدىڭ تاريحىمىزعا ءدىن قاي تۇرعىدان كەلدى جانە ءبىز ونى قالاي تۇسىندىردىك؟ بۇگىندە «بيتكە وكپەلەپ, تونىن وتقا جاعىپ» ءداستۇرلى ءدىنىمىزدى دە مانسۇقتاۋشىلار بەلەڭ الا باستادى. ءدىن ءاۋ باستان قازاق وتباسىندا جوعارى قۇندىلىق سانالعان. كەزىندە ءبىزدىڭ ءاليحان بوكەيحان, ءنازىر تورەقۇل ۇلى سىندى زيالىلار 1923 جىلى «تەمىرقازىق» دەگەن جۋرنال شىعاردى. سىزدەر جاريالاپ وتىرعان «تەمىرقازىق» تا ۇلكەن باستاما بولىپ, بولاشاقتا وسى باعىتتا كوپتەگەن ەڭبەكتىڭ شىعۋىنا مۇمكىندىك تۋعىزادى دەپ ويلايمىن, – دەدى د.قامزابەك ۇلى.
اكادەميك عاريفوللا ەسىم ءوز كەزەگىندە قازاق حالقىنىڭ ۇلتتىق رۋحانياتى نىعايىپ كەلە جاتقانىن العا تارتىپ, جيناقتىڭ العىسوزىن جازعان اۆتور رەتىندە قوس كىتاپقا جوعارى باعا بەرىپ ءوتتى.
اتالعان كىتاپتار ءىرى كىتاپ دۇكەندەرىندە ساتىلىمعا تۇسكەن. ىرگەلى ەڭبەكتەرگە قىزىعۋشىلىق تانىتۋشى وقىرمان شوعىرى دا قالىڭ.
