مەملەكەت باسشىسى ساۋدا, ونەركاسىپ, كولىك, لوگيستيكا, اۋىل شارۋاشىلىعى جانە تۋريزم سياقتى كوپتەگەن باعىت بويىنشا قازاقستاننىڭ شىڭجاڭمەن اراداعى قارىم-قاتىناستارىنىڭ ناتيجەلەرىن جوعارى باعالادى.
«قازاقستاننىڭ شىڭجاڭمەن ءوزارا ساۋدا-ساتتىق ماسەلەسىندە وڭىرلىك ىنتىماقتاستىقتىڭ قولدانىستاعى مەحانيزمدەرىنىڭ ءمانى زور. مەنىڭ ويىمشا, ولاردى دۇرىس پايدالانا بىلسەك, ايتارلىقتاي ىلگەرىلەۋگە بولادى. قازاقستان ءسىزدىڭ ايماعىڭىزعا جەتكىزىلەتىن ءونىم تۇرلەرىن ۇلعايتۋعا دايىن. اتاپ ايتقاندا, مەتاللۋرگيا, مۇناي حيمياسى, ماشينا جاساۋ, تاماق ونىمدەرىن, سونداي-اق قۇرىلىس ماتەريالدارىن ەكسپورتتاي الامىز. ال اگروونەركاسىپ جانە ازىق-ت ۇلىك سەكتورىنداعى ىقپالداستىققا كەلەر بولساق, بۇل باعىتتاعى الەۋەتىمىز زور. قازاقستان قىتاي نارىعىنا ەكولوگيالىق تازا اۋىل شارۋاشىلىعى ونىمدەرىن تۇراقتى جەتكىزە الادى دەپ سانايمىز», دەدى قاسىم-جومارت توقاەۆ.
پرەزيدەنتتىڭ ايتۋىنشا, قازاقستاننىڭ شەكارالاس ءتورت وبلىسى مەن شىڭجاڭ ولكەسى اراسىندا تىعىز بايلانىس ورناعان. قازاقستاننىڭ قىتايمەن ساۋدا-ساتتىعىنىڭ جالپى كولەمى بويىنشا شىڭجاڭ-ۇيعىر اۆتونوميالىق اۋدانىنىڭ ۇلەسى 40 پايىزدان اسادى. بۇل رەتتە ەلىمىزدىڭ شىڭجاڭمەن تاۋار اينالىمى بيىلعى جارتىجىلدىقتا 87 پايىزعا ءوسىپ, 8,5 ميلليارد دوللاردى قۇرادى.
سونىمەن قاتار مەملەكەت باسشىسى قازاقستان مەن قىتاي اراسىنداعى ءۇشىنشى تەمىرجول وتكەلىن سالۋدىڭ ماڭىزدىلىعىنا نازار اۋداردى. پرەزيدەنت وسى جوبانى ىسكە اسىرۋعا جاقىن ارادا كىرىسۋگە بولادى دەپ ەسەپتەيدى.
ساۋدا-ەكونوميكالىق بايلانىستاردان بولەك, سۋ سالاسىنداعى ىنتىماقتاستىقتى دامىتۋدىڭ جانە ترانسشەكارالىق وزەندەردى پايدالانۋدىڭ ماڭىزدى ەكەنى اتاپ ءوتىلدى.
كەزدەسۋ بارىسىندا قاسىم-جومارت توقاەۆ تۋريزم سالاسىنا ايرىقشا توقتالدى.
«تۋريزم سالاسىنداعى ىنتىماقتاستىقتىڭ كەلەشەگى زور. قازاقستاننىڭ بۇل باعىتتاعى مول الەۋەتىن ەسكەرە وتىرىپ, جاقىندا تۋريزم جانە سپورت مينيسترلىگىن قۇردىم. ءبىز قازاقستانعا ساياحاتتايتىن قىتايلىق تۋريستەر سانى ارتادى دەپ ۇمىتتەنەمىز. ۇكىمەتىمىز ەلدەگى تۋريزم سالاسىن دامىتۋعا بار كۇش-جىگەرىن جۇمسايدى. سونىمەن قاتار قىتايدا كەلەسى جىل قازاق ءتۋريزمىنىڭ جىلى بولىپ جاريالاندى. ارينە, ءبىز وتانداستارىمىزدىڭ ءسىزدىڭ ەلمەن جانە ونىڭ اسەم تابيعاتىمەن, الەۋمەتتىك-ەكونوميكالىق دامۋ جەتىستىكتەرىمەن تانىسۋى ءۇشىن قىتايعا ساياحاتتاپ بارۋىن قولدايمىز», دەدى مەملەكەت باسشىسى.
سونىمەن قاتار پرەزيدەنت قازاقستان مەن شىڭجاڭ-ۇيعىر اۆتونوميالىق اۋدانىنىڭ تاريحي-مادەني, گۋمانيتارلىق بايلانىستارىنىڭ ءمانى مەن ماڭىزىنا نازار اۋداردى.
«شىڭجاڭ ەجەلدەن ءوزىنىڭ جوعارى مادەنيەتىمەن ايگىلى. جەرگىلىكتى شىعارماشىلىق ۇجىمدار حالىقارالىق دارەجەدە مويىندالعان. ءبىز مادەني-رۋحاني بايلانىستاردىڭ جان-جاقتى دامۋىنا, ەكى ەل ونەرپازدارىنىڭ ءبىر-بىرىنە گاسترولدىك ساپارلار ۇيىمداستىرۋىنا قولداۋ كورسەتەمىز. بۇل تاتۋ كورشىلىك جانە دوستىق قاتىناستاردىڭ نىعايۋىنا وڭ ىقپال ەتەتىنى ءسوزسىز», دەدى مەملەكەت باسشىسى.
ما سينجۋي قازاقستان پرەزيدەنتى مەن قحر توراعاسىنىڭ كەلىسسوزدەرى بارىسىندا قول جەتكىزىلگەن ۋاعدالاستىقتاردى جۇزەگە اسىرۋدىڭ ماڭىزدىلىعىن, سونداي-اق ء«بىر بەلدەۋ, ءبىر جول» فورۋمىندا كوتەرىلگەن باستامالاردىڭ ءمانى زور ەكەنىن ايتتى.
«ءبىز اۋىل شارۋاشىلىعى, ترانسشەكارالىق ساۋدا, ەنەرگەتيكا سالالارىنا باسا ءمان بەرە وتىرىپ, ساۋدا-ەكونوميكالىق ىنتىماقتاستىقتى ودان ءارى نىعايتامىز. سونىمەن قاتار عىلىمي ۇيىمدار, جوعارى وقۋ ورىندارى جانە كاسىپورىندار اراسىنداعى قارىم-قاتىناستى جولعا قويامىز. قازاقستانعا نەمەسە شىڭجاڭ ولكەسىنە ينۆەستيتسيا قۇيىپ, بيزنەس اشۋدى كوزدەيتىن بىرلەسكەن كاسىپورىنداردى ىنتالاندىرامىز», دەدى شىڭجاڭ-ۇيعىر اۆتونوميالىق اۋدانى پارتيا كوميتەتىنىڭ حاتشىسى.
ما سينجۋي قازاقستان پرەزيدەنتىنىڭ شىڭجاڭعا ساپارىن تاريحي وقيعا رەتىندە باعالاپ, شىڭجاڭ-ۇيعىر اۆتونوميالىق اۋدانىنىڭ باسشىلىعى ءبىزدىڭ ەلمەن اراداعى ىنتىماقتاستىقتى كەڭەيتۋگە جانە تۇراقتى بايلانىستى ساقتاۋعا مۇددەلى ەكەنىن جەتكىزدى.
كەزدەسۋ سوڭىندا قازاقستان پرەزيدەنتىنىڭ شىڭجاڭ ولكەسىنە ساپارى ايماقارالىق ىنتىماقتاستىقتىڭ ودان ءارى نىعايۋىنا ىقپال ەتەتىنى اتاپ ءوتىلدى.
