بيىل تاراس شەۆچەنكو اتىنداعى حالىقارالىق سىيلىق الەم ادەبيەتىنە قوسقان زور ۇلەسى جانە ۋكراينا ادەبيەتىن قازاقستاندا ايتارلىقتاي تانىمال ەتكەنى ءۇشىن جازۋشى روللان سەيسەنباەۆقا بەرىلدى. ۋكراينانىڭ حالىقارالىق ادەبيەت جانە ونەر اكادەمياسى بەلگىلەگەن بۇل قۇرمەتتى سىيلىق كورنەكتى جازۋشىلارعا, جۋرناليستەرگە, اۋدارماشىلارعا, عالىمدارعا, ونەر قايراتكەرلەرىنە, مەملەكەت جانە قوعام قايراتكەرلەرىنە جانقيارلىق, قوعامدىق جانە قايىرىمدىلىق قىزمەتتەرى ءۇشىن بەرىلەدى.
اۆتوردىڭ ء«وزىمدى ىزدەپ ءجۇرمىن», «شايتاننىڭ تاعى», «ەشقايدا باستامايتىن باسپالداقتار», ء«ومىر سۇرگىڭ كەلسە», «قازىبەكتىڭ ورالۋى», «تۇنگى ديالوگ», «قۇم كەزگەن ولىكتەر», تاعى باسقا پروزالىق, دراماتۋرگيالىق تۋىندىلارى وقىرمانعا جاقسى تانىس. روللان سەيسەنباەۆ قالامگەر, اۋدارماشى, باسپاگەر عانا ەمەس, بەلسەندى قوعام قايراتكەرى ەكەنىن دە بىلەمىز. ول لوندوننىڭ تورىنەن اباي ءۇيىن, حالىقارالىق اباي كلۋبىن جانە «امانات» حالىقارالىق ادەبي جۋرنالىن اشتى.
روللان سەيسەنباەۆتىڭ ادەبيەتكە سىڭىرگەن ەڭبەگىن حالىقارالىق دەڭگەيدە مويىنداۋ ونىڭ شىعارمالارىندا گۋمانيزم, بەيبىتشىلىك, ىزگىلىك, ادىلدىك, جالپىادامزاتتىق قۇندىلىقتار تاقىرىپتارىن كوتەرۋىمەن بايلانىستى بولسا كەرەك. قازاق جازۋشىسىمەن بىرگە بيىل تاراس شەۆچەنكو اتىنداعى سىيلىقتىڭ لاۋرەاتتارى تىزىمىندە ۋكراينانىڭ حالىق اقىنى ۆاسيلي سيمونەنكو, سونداي-اق ۋكراين اقىندارى مەن اۋدارماشىلارى ۆاسيلي باركا مەن بوگدان بويچۋك تا بار.
جازۋشى قايراتكەرلىك ەڭبەگى ءۇشىن بۇعان دەيىن دە بىرنەشە رەت جوعارى حالىقارالىق ماراپاتقا يە بولدى. بىلتىر حالىقارالىق ونەر ورتالىعى «Radius» (اقش), حالىقارالىق ونەر ورتالىعى «Pegasus Brucke», سونىمەن بىرگە ون مەملەكەتتىڭ حالىقارالىق قوعامدىق ۇيىمدارى روللان سەيسەنباەۆقا «الەمنىڭ التىن جازۋشىسى» اتاعىن تابىس ەتتى. بۇل جوعارى اتاق جازۋشىلاردىڭ ەڭبەكتەرى مەن قۋاتتى شىعارماشىلىق ۇمتىلىستارى ءۇشىن تاعايىندالعان. ەسكە سالساق, امەريكالىق «Amazon Crossing» باسپاسىنان اۆتوردىڭ «قۇم كەزگەن ولىكتەر» رومان-ەپوسى جارىق كورگەن بولاتىن.
