ماسكەۋ اۋىلدىق وكرۋگىنە ءۇش جىلدان بەرى قۇنى 800 ملن تەڭگە بولاتىن سۋ قۇبىرى تارتىلىپ جاتىر. مەردىگەر كەلىسىم-شارت بويىنشا جوبانى وتكەن شىلدە ايىندا اياقتاۋى كەرەك ەدى. الايدا قارجىلىق ماسەلەلەر تۋىنداپ, جۇمىس توقتاپ قالعان.
– شىعىس قازاقستان وبلىسىنان كەلگەن مەردىگەر كومپانيا ءوز مىندەتىن ۋاقىتىندا ورىنداي الماعاندىقتان, 10 قازاننان باستاپ اتالعان اۋىلدىق وكرۋگ كولەمىندە تەحنوگەندىك سيپاتتاعى توتەنشە جاعداي جاريالاۋعا ءماجبۇر بولىپ وتىرمىز. ويتكەنى تۇرعىنداردىڭ ءومىر ءسۇرۋ جاعدايىنا نۇقسان كەلدى. قۇرىلىس-مونتاج جۇمىستارىنىڭ ءجۇرىپ جاتقانىنا ءۇش جىلدان اسىپ كەتتى. جۇمىس ورنىندا 2 ادام قارايىپ جۇرگەنى بولماسا, مەردىگەر سەرىكتەستىك بيىل مۇلدە جۇمىس جۇرگىزبەدى دەسەك تە بولادى, – دەدى قوستاناي اۋدانىنىڭ اكىمى بەرىك تاڭجارىقوۆ.
«Qazconstructions» جشس كومپانياسى وسى جىلعا بولىنگەن 250 ملن تەڭگە قارجىنىڭ 18 ملن-ىن عانا يگەرگەن. مۇنىڭ سىرتىندا, جەرگىلىكتى تۇرعىندار دا وكپە-رەنىش, شاعىمدارىن ايتىپ, ساعىزداي سوزىلىپ كەتكەن اۋىز سۋ ماسەلەسىن جەدەل شەشىپ بەرۋدى تالاپ ەتكەن.
– ماسكەۋ اۋىلىندا 500-دەن اسا ءۇي ءتۇتىن تۇتەتىپ وتىر. ءار اۋلادا قۇدىق بار. بىراق قىستا بۇل قۇدىقتار ورتايىپ كەتەدى دە, كەيدە, ءتىپتى شەلەككە سۋ ىلىنبەي قالاتىن جاعدايلار بولادى. قازىر بۇل اۋىلدى تۇراقتى اۋىز سۋمەن قامتاماسىز ەتە الماي وتىرمىز. سوندىقتان توتەنشە جاعداي جونىندەگى كوميسسيا وسىنداي قادامعا بارىپ وتىر, – دەدى اكىم.
قازىر سۋ قۇبىرىنداعى اقاۋدى انىقتاۋ جانە ونى تەحنيكالىق زەرتتەۋدەن وتكىزۋ جۇمىستارى ءجۇرىپ جاتىر. بار ماسەلە كونكۋرس وتكىزۋگە كەلىپ تىرەلىپ تۇر. اكىمدىك ماماندارى اتالعان جوبا 2018 جىلعى بولعاندىقتان, وعان جەدەل تۇردە تاعى ءبىر كونكۋرس جاريالاۋ مۇمكىن ەمەس دەيدى.
سوعان قاراماستان توقتاپ قالعان اۋىز سۋ قۇبىرىنىڭ قۇرىلىسى قايتا جانداناتىن بولدى. جوبانى قابىلداپ العان جاڭا مەردىگەر ماسكەۋگە جەلتوقسان ايىندا اۋىز سۋ جەتكىزۋدى جوسپارلاپ وتىر.
قوستاناي وبلىسى
