جيىندى وزبەكستاننىڭ جاستار ساياساتى جانە سپورت ءمينيسترى ادحام يكراموۆ اشتى. بايانداماشى ازياداعى بەيبىتشىلىكتى, قاۋىپسىزدىك پەن تۇراقتىلىقتى ىلگەرىلەتۋگە ارنالعان ۇكىمەتارالىق فورۋم رەتىندە اوسشك ماڭىزىن, سونداي-اق اوسشك جاستار كەڭەسىنىڭ جاستاردى دامىتۋعا ورتاق كوزقاراستى قالىپتاستىرۋداعى ءرولىن اتاپ ءوتتى. سالا باسشىسى وزبەكستاننىڭ جاستار ساياساتىنداعى كەيىنگى وزگەرىستەر تۋرالى اڭگىمەلەپ بەردى. جاستار پارلامەنتى سىندى باستامالار مەن ءار اۋداندا جاستار اگەنتتىگىنىڭ وكىلدەرىن تاعايىنداۋ باستامالارىنا توقتالدى. سونداي-اق زورلىق-زومبىلىق, ەكسترەميزمنىڭ الدىن الۋ ماقساتىندا جاستاردىڭ راديكالدانۋىنا جول بەرمەۋ قاجەت ەكەنىن جەتكىزدى.
ءوزىنىڭ قۇتتىقتاۋ سوزىندە اوسشك باس حاتشىسى, ەلشى قايرات سارىباي ۇيىمنىڭ ايماقتىق ۇدەرىستەردى دامىتۋىنا وزبەكستاننىڭ قوسقان بەلسەندى ءرولى مەن ۇلەسىن ەرەكشە اتاپ ءوتتى. ق.سارىباي وتكەن جىلى استانادا وتكەن اوسشك التىنشى سامميتىندە وزبەكستان پرەزيدەنتى شاۆكات ميرزيوەۆ جاستار مۇددەسىنە قاتىستى جۇيەلى ىنتىماقتاستىق شاقىرعانىن قاتىسۋشىلار ەسىنە سالدى. ءارتۇرلى جاستاعى ادامدار اراسىنداعى ءوزارا تۇسىنىستىكتى دامىتۋ جانە جاستاردىڭ ەڭ وزەكتى ماسەلەلەرىنىڭ شەشىمىن بىرلەسىپ ىزدەۋ ءۇشىن پرەزيدەنت ميرزيوەۆ جاڭا فورماتتى – جاستار كەڭەسىنىڭ وسى وتىرىسىندا باستالعان «ۇرپاقتار ديالوگىن» ۇسىندى. اتالعان باستاما ساپالى ءبىلىم بەرۋ, كليماتتىڭ وزگەرۋى جانە كرەاتيۆتى ەكونوميكا ماسەلەلەرىنە ارنالعان.
اوسشك باس حاتشىسى 2023 جىلعى 21 قىركۇيەكتە نيۋ-يوركتە وتكەن اوسشك مينيسترلەر كەڭەسى وتىرىسىنىڭ قورىتىندىلارىنا توقتالدى. اتاپ ايتقاندا, اوسشك ترانسفورماتسياسىنىڭ جول كارتاسىن بەكىتۋ جانە تۇراقتى دامۋ ماقساتىن ىلگەرىلەتۋ ءۇشىن ۆولونتەرلىك قىزمەتكە جاردەمدەسۋ تۋرالى مالىمدەمەنى قابىلداۋ جونىندەگى شەشىمدەردى اڭگىمەلەپ بەردى. سونىمەن قاتار باس حاتشى اوسشك-ءنىڭ جاڭا باستامالارىمەن تانىستىردى. سونىڭ ىشىندە 2024 جىلى استانادا جاستار كەڭەسىنىڭ قامقورلىعىمەن ۇيىمعا مۇشە مەملەكەتتەردە ۆولونتەرلىك قوزعالىستار كوشباسشىلارىنىڭ كەزدەسۋىن وتكىزۋ, سونداي-اق اوسشك ەلدەرىنىڭ جەتەكشى ۋنيۆەرسيتەتتەرىندە سەرىكتەستىك جەلىسىن قۇرۋ بار.
«وسكەلەڭ ۇرپاق – ازياداعى تۇراقتى دامۋ مەن وركەندەۋدىڭ نەگىزگى قوزعاۋشى كۇشى جاستارىمىزدىڭ قۇقىقتارى مەن مۇمكىندىكتەرىن جاقسارتۋعا, گۇلدەنگەن, ءادىل جانە ينكليۋزيۆتى ازيانى بىرلەسە قۇرۋعا ارنالعان باعىتتى بەلگىلەگەن ءجون», دەدى قايرات سارىباي.
جاستار كەڭەسى وتىرىسى بارىسىندا قاتىسۋشىلار ءوز ەلىندەگى ۇلتتىق جاستار ساياساتى تۋرالى بايانداما جاسادى. سونىمەن قاتار جاستاردىڭ راديكالدانۋىنىڭ تۇپكى سەبەپتەرىن جانە ونىڭ تامىر جايۋىنا جول بەرمەۋ ءۇشىن باق جانە باسقا دا قۇرالدار ارقىلى قالاي بىرلەسىپ جۇمىس ىستەي الاتىنىن تالقىلادى.
اوسشك جاستار كەڭەسىنىڭ التىنشى وتىرىسىنا ازەربايجان, بانگلادەش, يزرايل, ءۇندىستان, يوردانيا, يراك, قازاقستان, كامبودجا, قىتاي, قىرعىزستان, پالەستينا, رەسەي, تاجىكستان, تايلاند, تۇركيا, وزبەكستان جانە شري-لانكادان 100-دەن استام وكىل قاتىستى. اتالعان كەڭەس – ۇيىمعا مۇشە مەملەكەتتەرگە تيەسىلى جاستار ۇيىمدارىنىڭ, بىرلەستىكتەرى مەن قوزعالىستارىنىڭ قىزمەتىن ۇيلەستىرەتىن كونسۋلتاتيۆتىك-كەڭەسشى ورگان. جاستار كەڭەسى ازياداعى ءوزارا ءىس-قيمىلدى, بەيبىتشىلىك پەن دوستىقتى نىعايتۋ ءۇشىن ۇيىمداعى جان-جاقتى ىنتىماقتاستىققا جاردەمدەسەدى.
