كورەرمەن نازارىنا ۇسىنىلعان جۇمىستاردىڭ بارلىعى – جاساندى ينتەللەكت تۋىندىلارى. ونەرسۇيەر قاۋىم تابيعات, ميفولوگيا, تاريح, ارحيتەكتۋرا جانە تاعى دا باسقا ومىرلىك ءمانى بار سالالاردى قامتيتىن 10 ءتۇرلى ساناتقا بولىنگەن 120-دان اسا سۋرەتتى تاماشالاي الادى.
جاساندى ينتەللەكت – ماشينالاردى ادامشا ويلاۋعا ۇيرەتەتىن كومپيۋتەرلىك تەحنولوگيا. ونى قولدانۋعا بولاتىن سالالاردىڭ سانى شەكسىز. كورمەدەگى جۇمىستاردىڭ باسىم بولىگى جاساندى ينتەللەكتىنىڭ قازاقستاندى سۋرەتتەۋىنە ارنالعان. كورمەنىڭ اشىلۋىنا كەلگەندەر ەلىمىزدىڭ تابيعاتى, ارحيتەكتۋراسى مەن مول داستارقانى تۋرالى نەيروجۇيە سالعان سۋرەتتەردى تاماشالادى. ءاربىر بولىگىنە دەيىن انىق كورىنەتىن ءمىنسىز سۋرەتتەر توپتاماسى تەحنولوگياعا جاقىن جاندارعا ايرىقشا اسەر سىيلايدى.
كورمە ۇيىمداستىرۋشىلارى ماڭىزدى جوبالاردى تانىستىرا وتىرىپ, كورەرمەنگە قازاقستانداعى نەيروجۇيە تۋىندىلارىنىڭ تۇڭعىش ەكسپوزيتسياسىن ءبىرىنشى بولىپ ۇسىنۋدى كوزدەگەن. «اتالعان ونەر جارمەڭكەسى تۋىندىلاردى جاڭاشا جاساۋ ادىستەرىن زەرتتەۋگە بەيىمدەيدى. مۇنى شىعارماشىلىق پەن جاسامپازدىقتىڭ جاڭا باعىتى دەپ تانىعانىمىز دۇرىس شىعار. كورمەنىڭ باستى جوباسى – وسى ءىس-شارا ءۇشىن ارنايى جاسالعان «تسيفرلىق ەۆوليۋتسيا» اتتى يممەرسيۆتى فيلم», دەيدى مەملەكەتتىك ورتالىق مۋزەي ديرەكتورى راشيدا حاريپوۆا.
اتالعان تۋىندىدا يدەيالار الەمى مەن ماتەريا الەمىنە, دامۋ مەن ەۆوليۋتسياعا دەگەن جاڭا كوزقاراس تۋرالى وي قوزعالادى. مۋلتيمەديالىق زالدىڭ قابىرعاسى مەن ەدەندەرىندە كورسەتىلەتىن فيلم ارقىلى اينالاداعى ءتۇرلى قۇبىلىستاردى جان دۇنيەڭىزبەن سەزىنەسىز. سونداي-اق كورمە ەكسپوزيتسياسىنىڭ نەگىزگى بولىگىن تولىقتىرعان وتاندىق اۆتورلاردىڭ قولتاڭباسى كورەرمەندى بەيجاي قالدىرمايدى.
– كورمەدە قازاق ەرتەگىلەرى, ەپوستار مەن ميفولوگيا كەيىپكەرلەرى ەرەكشە باعىتتا سالىنعان. بۇعان دەيىن جوبامىز بەلارۋستىڭ بىرنەشە قالاسىندا تابىستى ءوتىپ, كورەرمەندەر جىلى قابىلدادى. ءبىز تاڭداۋدى تالعامپاز كورەرمەننىڭ ءوز ەنشىسىنە قالدىرىپ وتىرمىز. جوبا كورەرمەنگە سۋرەتشى الدە ماشينا دەگەن ساۋالدى قويادى. جاساندى ينتەللەكتىنىڭ ارعى جاعىندا ادامنىڭ اقىل ويى جاتقانىن ۇمىتپاۋىمىز كەرەك. ياعني ونى ادام جاساعان. ول نەعۇرلىم اقىلدى بولسا, نەيروندىق جەلىنىڭ ناتيجەسى سوعۇرلىم جاقسى بولادى, – دەيدى ۇيىمداستىرۋشى جانار كوروتكوۆا.
كورمەنىڭ تاعى ءبىر ەرەكشەلىگى ونداعى تاقىرىپتىق كۆەستتەر مەن ارنايى ۇيىمداستىرىلعان فوتوايماق ءتۇرلى فورماتتا سۋرەتكە تۇسۋگە مۇمكىندىك سىيلايدى. بىرەگەي جوبا قاراشا ايىنىڭ سوڭىنا دەيىن جالعاسپاق.
الماتى
