اباي وبلىستىق مادەنيەت, تىلدەردى دامىتۋ جانە ارحيۆ ءىسى باسقارماسىنىڭ ۇيىمداستىرۋىمەن شىمىلدىعىن اشقان ايتۋلى مادەني ششارا ەكى كۇنگە جالعاسادى. ەلىمىزدىڭ الماتى, شىمكەنت, جەزقازعان, كوكشەتاۋ, تۇركىستان, اقتوبە, اتىراۋ, سەمەي قالالارىنان كەلگەن 19 جاس تالانتتىڭ ونەرىن قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى نۇرجامال ۇسەنباەۆا باستاعان قازىلار القاسى باعالايتىن بولادى.
بايقاۋ باستالار الدىندا ارنايى وتكىزىلگەن ءباسپاسوز ءماسليحاتىندا ءسوز العان نۇرجامال پەرنەبەكقىزى اتاپ وتكەندەي بەكەن جىلىسباەۆ قازاق ۆوكال ونەرىنىڭ پاتريارحى رەتىندە وسىناۋ بەكزات ونەردىڭ نەگىزىن سالۋشى بىرەگەي تۇلعا رەتىندە ەرەكشەلەنەدى.
ء«بىز ءۇشىن الدىمەن بەكەن جىلىسباەۆ – قازاق ونەرىندە ۆوكال مەكتەبىنىڭ قالىپتاسۋىنا بار عۇمىرىن ارناعان ۇلكەن تالانت يەسى. سان تالانتتىڭ قاناتىن قاتايتقان عاجايىپ ۇستاز. ول ۇستاز عانا ەمەس, بارىمىزگە اكەلىك قامقورلىعىن دا ايامايتىن ۇلكەن جۇرەكتىڭ يەسى ەدى. ءبىز بۇگىن سول ارداقتى ۇستازىمىزدىڭ تۋعان جەرى – سەمەي قالاسىنا, قاسيەتتى اباي ەلىنە كەلگەنىمىزگە ەرەكشە قۋانىشتىمىز. ۇستازىمىزدىڭ اتىن ۇلىقتاپ, وسىنداي بايقاۋ وتكىزۋگە مۇرىندىق بولعان اباي وبلىسىنىڭ اكىمدىگىنە زور العىسىمىزدى بىلدىرگىمىز كەلەدى. بەكەن جىلىسباەۆ ءبىز ءۇشىن قازاق ۆوكال ونەرىنىڭ پاتريارحى رەتىندە ماڭگىلىك قۇرمەتپەن اتالادى. وسى بايقاۋعا قاتىسۋعا تالاپتانىپ, ونەر كورسەتۋدىڭ ءوزى قاتىسۋشىلار ءۇشىن زور باقىت دەپ ويلايمىن», دەگەن نۇرجامال ۇسەنباەۆا جاس تالانتتارعا ساتتىلىك تىلەدى.
ەكى كەزەڭنەن تۇراتىن رەسپۋبليكالىق بايقاۋ قورىتىندىسى ەرتەڭ, 13 قازان كۇنى كەشكىسىن اباي اتىنداعى تەاتردا جاريالانىپ, گالا-كونتسەرتپەن تۇيىندەلەتىن بولادى.
