فوتو: اشىق دەرەككوز
«وزىق IT-ينفراقۇرىلىم تسيفرلىق يندۋسترياداعى كەلەشەك پروگرەسكە, اتاپ ايتقاندا جاساندى ينتەللەكتىنىڭ دامۋىنا نەگىز قالايدى. سوندىقتان ينفراقۇرىلىمدى دامىتقان كەزدە IT-ءونىم ازىرلەۋشىلەردىڭ قاجەتتىلىگى ءاردايىم الدىن الا ەسكەرىلۋگە ءتيىس. ەڭ الدىمەن, ءبىز ەسەپتەۋىش ورتالىقتاردىڭ قۋاتىن ارتتىرۋىمىز قاجەت. ۇكىمەتكە ەكى جىل ىشىندە جاساندى ينتەللەكتىگە ماماندانعان داتا-ورتالىقتاردىڭ قۇرىلىسىن جۇرگىزۋدى تاپسىرامىن», دەدى مەملەكەت باسشىسى.
سونداي-اق بۇل ىسكە Amazon, Google, Mastercard جانە Citigroup سياقتى الەمگە تانىمال كومپانيالاردى تارتۋعا بولاتىنىن ايتتى.
«جاقىندا نيۋ-يورك قالاسىنا جاساعان ساپارىمدا اتالعان كومپانيالاردىڭ باسشىلارىمەن كەزدەستىم. ءتيىستى ۋاعدالاستىقتارعا قول جەتكىزدىك. سونىمەن قاتار جاساندى ينتەللەكتىگە ارنالعان دەرەكتەر ەكوجۇيەسىن دامىتۋ ماڭىزدى. شىن مانىندە, جاساندى ينتەللەكتىنىڭ «قورەگى», قوزعاۋشى كۇشى – ۇلكەن دەرەكتەر قورى. قازاقستاندا وسى سالادا ءتۇرلى شەشىمدەر جۇزەگە اسىرىلدى.
الايدا مەملەكەتتىك ورگانداردا جيناقتالعان ۇشى-قيىرسىز دەرەكتەر قورىنا قولجەتىمدىلىك شەكتەۋلى بولۋىنا بايلانىستى ونىڭ الەۋەتى ءالى تولىق پايدالانىلماي وتىر. بۇل جەردە اقپاراتتىڭ «اشىقتىق پرەزۋمپتسياسىن» باسشىلىققا الۋ كەرەك. Smart Data Ukimet ارقىلى ءانونيمدى دەرەكتەرگە ەركىن قول جەتكىزۋدى قامتاماسىز ەتۋ قاجەت. مەن بۇل جەردە بارلىق اقپاراتتىڭ ءانونيمدى بولعانى ءارى سەنىمدى قورعالعانى ءجون ەكەنىن ايتىپ وتىرمىن. جەكە دەرەكتەردىڭ تارالىپ كەتۋىنە قاتىستى بارلىق قاۋىپتى جويۋ كەرەك. سونىمەن قاتار كەلەسى جىلى ۇلتتىق جاساندى ينتەللەكت پلاتفورماسىن ىسكە قوسقان دۇرىس. بۇل باستاما مەملەكەت پەن ءىرى بيزنەس دەرەكتەرىن بىرىكتىرىپ, ولاردىڭ وزەكتىلىگى مەن قولجەتىمدىگىن قامتاماسىز ەتۋگە ءتيىس», دەدى ەل پرەزيدەنتى.
سونداي-اق پرەزيدەنت ۇكىمەتكە 5G ماسەلەسىن 2025 جىلدىڭ سوڭىنا دەيىن اياقتاۋدى تاپسىردى.
«بۇل شارالاردىڭ ءبارى جاساندى ينتەللەكت ەلەمەنتتەرىن پايدالاناتىن ستارتاپتارىمىزدىڭ قازاقستاندا جانە الەمدە سۇرانىسقا يە, مۇلدە جاڭا IT شەشىمدەر جاساۋىنا مۇمكىندىك بەرەدى. ۇلتتىق ستاتيستيكا بيۋروسىن ناعىز تسيفرلىق ۆەدومستۆوعا اينالدىراتىن ماڭىزدى رەفورمانى جۇزەگە اسىرۋ كەرەك. ستاتيستيكالىق جانە باسقا دا دەرەكتەردى رەتكە كەلتىرۋ ءۇشىن كەشەندى شارالار قابىلداۋ قاجەت. ونىڭ ىشىندە باسقارۋ ساياساتىن ازىرلەۋ, دەرەكتەردىڭ ماقساتتى ارحيتەكتۋراسىن انىقتاۋ ماسەلەسىن نازاردان تىس قالدىرماعان ءجون. بۇل مەملەكەتتىڭ ءتيىمدى شەشىمدەر قابىلداۋىنىڭ نەگىزگى شارتى بولادى. 5G جەلىسىن كەڭ كولەمدە ەنگىزۋ يننوۆاتسيانىڭ دامۋىنا تىڭ سەرپىن بەرەدى. بۇل پروتسەسس قازاقستاندا قازىردىڭ وزىندە ءجۇرىپ جاتىر.
2027 جىلعا دەيىن بارلىق وبلىس ورتالىقتارىن ۇيالى بايلانىستىڭ جاڭا بۋىنىمەن قامتۋ مىندەتى بۇعان دەيىن جۇكتەلگەن بولاتىن. الايدا تەحنولوگيانىڭ قارىشتاپ دامۋ جاعدايىندا ءبىز دە قارقىندى ارتتىرۋىمىز كەرەك. ۇكىمەت بۇل جۇمىستى مەرزىمىنەن بۇرىن, ياعني 2025 جىلدىڭ سوڭىنا دەيىن اياقتاۋى قاجەت. ارينە, مەرزىمنىڭ وزگەرۋى كورسەتىلەتىن قىزمەتتەردىڭ ساپاسىنا اسەر ەتپەۋگە ءتيىس. بۇدان بولەك, بۇل ماقساتقا جەتۋ ءۇشىن تومەنگى وربيتاداعى سپۋتنيكتىك جۇيەلەردىڭ مۇمكىندىكتەرىن پايدالانا وتىرىپ, شالعاي اۋدان تۇرعىندارىن ينتەرنەتپەن قامتاماسىز ەتۋ ماڭىزدى. ۇكىمەت بۇل ماسەلەنى جان-جاقتى پىسىقتاۋى كەرەك. قاجەت بولعان جاعدايدا زاڭناماعا وزگەرىستەر ەنگىزۋگە بولادى», دەدى قاسىم-جومارت توقاەۆ.
