SWIFT جۇيەسىنىڭ حابارلاۋىنشا, قازاقستان ۇلتتىق بانكى مەن گونكونگ ۆاليۋتالىق باسقارماسى CBDC-كوننەكتور بەتاتەستىلەۋىنە كەلىسىمىن بەرگەن. ەگەر جوبا ءساتتى اياقتالسا, وندا بۇل ترانسشەكارالىق تولەمدەردى جاساۋدا تسيفرلى ۆاليۋتانى قولدانۋعا مۇمكىندىك بەرمەك.
«قازىر ۇلتتىق بانك بەلسەندى تۇردە دايىنداپ جاتقان تسيفرلى تەڭگە جانە باسقا دا CBDC-نى SWIFT ارقىلى ترانسشەكارالىق اۋدارىمداردى جاساۋدا قولدانۋعا بولادى. CBDC كوننەكتورىن دامىتۋ تۋرالى شەشىم SWIFT-ءتىڭ ءارتۇرلى CBDC-ءدى ءبىر-بىرىمەن جانە فياتتى اقشامەن بايلانىستىرۋ جونىندەگى كۇش-جىگەرىنىڭ جالعاسى. جىل باسىندا SWIFT 12 اپتا ىشىندە ەكى ءتۇرلى بلوكچەين جەلىلەرى مەن قولدانىستاعى فيات اقشا تولەم جۇيەلەرى اراسىنداعى 5 000-عا جۋىق ترانزاكتسيانى مودەلدەيتىن ارنايى جوبانى ازىرلەدى. بۇل جۇمىسقا 18 ۇيىم, سونىڭ ىشىندە فرانتسيا, گەرمانيا جانە سينگاپۋر بانكتەرى, سونداي-اق 15 ءىرى كوممەرتسيالىق بانك قاتىستى», دەپ مالىمدەيدى Halyk Finance اناليتيكالىق ورتالىعى.
وسى سىناقتىڭ بارلىعىنىڭ تۇپكى ماقساتى – ءارتۇرلى تسيفرلىق ۆاليۋتا مەن ءداستۇرلى تولەم جۇيەسىنىڭ ءوزارا ارەكەتتەسۋىن (ۇيلەسىمدىلىگى, ءوزارا ارەكەتتەسۋ مۇمكىندىگى) قامتاماسىز ەتۋ.
«تسيفرلى ۆاليۋتالارمەن بايلانىستى تاۋەكەلدەردىڭ ءبىرى – ولاردىڭ بولشەكتەنۋى, ويتكەنى ءاربىر تسيفرلىق ۆاليۋتانىڭ وزىندىك ەكوجۇيەسى مەن ەرەكشەلىكتەرى بار. دەمەك, ءداستۇرلى جۇيەلەر مەن تسيفرلىق ۆاليۋتالار اراسىنداعى ينتەروپەرابەلدىلىك ترانزاكتسيالاردىڭ قاۋىپسىزدىگى مەن ۇزدىكسىزدىگىن قامتاماسىز ەتۋ ءۇشىن وتە ماڭىزدى, اسىرەسە ترانسشەكارالىق تولەمدەر جاعدايىندا», دەيدى اناليتيكتەر.
تسيفرلى تەڭگەنى ەنگىزۋ تۋرالى بايانداماعا سۇيەنەتىن بولساق, SWIFT-ءتىڭ تەستىلەۋدى جۇرگىزۋى ەكى كەزەڭگە سوزىلادى. ءبىرىنشى كەزەڭدە CBDC-كوننەكتور تسيفرلى تەڭگە پلاتفورماسىنا ينتەگراتسيالانادى. ەكىنشى كەزەڭدە وزگە ورتالىق بانكتەرمەن تەستىلىك ترانزاكتسيالار جۇرگىزىلەدى. مۇنداي حابار الماسۋ وپەراتسيالارىن جاساۋ ءۇشىن ISO 20022 حالىقارالىق ستاندارتى پايدالانىلادى.
«بىزدىڭشە, بۇل تسيفرلى تەڭگە مەن ۇلتتىق تولەم جۇيەسىن ودان ءارى قاراي دامىتۋداعى ءپوزيتيۆتى جاعداي. SWIFT سياقتى حالىقارالىق جۇيەمەن ينتەگراتسيا جاساۋ جانە ترانسشەكارالىق تولەمدەر مۇمكىندىگى تسيفرلى تەڭگەگە دەگەن سەنىمدى ارتتىرادى. ايتا كەتۋ كەرەك, تسيفرلى تەڭگە ارنايى ەلەكتروندىق ءاميانداردا ساقتالاتىن بىرەگەي تسيفرلىق جازبالار (توكەندەر) تۇرىندە شىعارىلادى. بۇل رەتتە ول ءداستۇرلى اقشانى الماستىرمايدى, تەك ونى تولىقتىرادى. وزدەرىنىڭ تەحنولوگيالىق ەرەكشەلىكتەرىنىڭ ارقاسىندا مۇنداي تسيفرلى ۆاليۋتالار تيىمدىلىكتى, جەدەلدىكتى جانە ەسەپ ايىرىسۋ اشىقتىعىن ارتتىرۋ ءۇشىن اۋقىمدى مۇمكىندىكتەر اشادى», دەپ پىكىر بىلدىرەدى Halyk Finance ساراپشىلارى.
ۇلتتىق بانكتىڭ حابارلاۋىنشا, تسيفرلىق تەڭگە 2025 جىلدىڭ سوڭىنا دەيىن 3 فازادا ەنگىزىلەدى. جوبانى ىسكە اسىرۋ جول كارتاسىنا سايكەس, 2023 جىلى ءبىرىنشى كەزەڭ ىسكە اسىرىلادى. تسيفرلىق تەڭگە پلاتفورماسىنىڭ – تاجىريبەلى-ونەركاسىپتىك جانە زەرتتەۋ (R&D) اتتى ەكى كونتۋرى (دامۋ باعىتى) قۇرىلدى.
«تاجىريبەلى-ونەركاسىپتىك پايدالانۋ اياسىندا تسيفرلىق تەڭگەنى تولەم قۇرالى رەتىندە پايدالانۋ ءۇشىن بارلىق بازالىق ستسەناري ىسكە اسىرىلادى, قارجى نارىعىنىڭ قاتىسۋشىلارىمەن جانە قارجى ينفراقۇرىلىمىنىڭ پروۆايدەرلەرىمەن ينتەگراتسيالىق بايلانىس ورناتىلادى. سونداي-اق سمارت-كەلىسىمشارتتاردى پايدالانۋ ارقىلى باعدارلامالاناتىن تولەمدەر تەتىگى ەنگىزىلەدى. بۇل كونتۋر تست جۇيەسىنىڭ نەگىزگى فۋنكتسيونالدىعىن جانە ونىڭ كەيىنگى جۇمىسىن جۇزەگە اسىرۋعا ارنالعان. زەرتتەۋ كونتۋرى اياسىندا ورتالىق بانكتەردىڭ تسيفرلىق ۆاليۋتالارىندا ترانسشەكارالىق ەسەپ ايىرىسۋلار تەستىلەۋدەن وتەدى, تسيفرلىق اكتيۆتەر يندۋسترياسى نارىعىنا قاتىسۋشىلارمەن ءوزارا بايلانىس ورناتىلىپ, توكەندەلگەن اكتيۆتەر ءۇشىن ەسەپتىك ينفراقۇرىلىم رەتىندە تسيفرلىق تەڭگە پايدالانىلادى», دەپ مالىمدەدى ۇب.
جوبانىڭ ءى فازاسىن ىسكە اسىرۋ قورىتىندىسى 2023 جىلى ۇلتتىق ۆاليۋتانىڭ 30 جىلدىعىنا وراي وتەتىن قازاقستان قارجىگەرلەرىنىڭ كونگرەسى اياسىندا شىعارىلماق. تولىققاندى ناتيجەسى 2023 جىلعى جەلتوقساندا قورىتىندى ەسەپ (blueprint paper) فورماتىندا ۇسىنىلادى دەپ جوسپارلانعان.
تسيفرلىق تەڭگە قولما-قول جانە قولما-قولسىز اقشالاردىڭ ورنىن اۋىستىرۋعا باعىتتالماعان, ول قولدانىستا قاتار جۇرە بەرەدى. تسيفرلىق تەڭگە قارجىلىق قىزمەتتەردىڭ قولجەتىمدىلىگىن ارتتىرادى, يننوۆاتسيالىق قارجى ونىمدەرىن جاساۋ ءۇشىن جاڭا مۇمكىندىكتەر اشادى, مەملەكەتتىك شىعىستاردىڭ تيىمدىلىگىن ەسەلەيدى, سونداي-اق ترانسشەكارالىق تولەمدەردە شىعىندى ازايتادى.
