مەڭدىقارا, سارىكول, قاراسۋ اۋداندارىنداعى جىلۋ بازالارىنداعى تاسكومىردىڭ تونناسى – 25 مىڭ تەڭگە. ال ول جەردەن اۋىلدىق وكرۋگتەرگە كومىر تاسيتىن كولىكتەر شاقىرىمىنا 300-350 تەڭگە قۇن سۇراپ تۇر. مىسالى, مەڭدىقارا اۋدانىنىڭ ورتالىعى بوروۆسكوي مەن تەڭىز اۋىلىنىڭ اراسى 40-45 شاقىرىمداي بولادى. ال تەڭىزدەگى ءبىر ءۇي قىستاي شامامەن 5-6 توننا كومىر جاعادى دەسەك, وعان اۋدان ورتالىعىنان كومىر جەتكىزىپ بەرۋشىنىڭ ەڭبەگى 14 مىڭ تەڭگە تۇرادى.
قارابالىق اۋدانىنداعى كومىردىڭ تونناسى 17 مىڭنان باستالىپ, 18 500 تەڭگەگە دەيىن بارادى. مىسالى, توعىزاقتاعى «بوگاتىر كومىر» سەرىكتەستىگىندە شۇباركول كومىرى تونناسىنا 17 مىڭ تەڭگەدەن بولسا, قارابالىقتىڭ باسىنداعى «استىق اليانس» سەرىكتەستىگى ءدال وسى كومىردى 18 مىڭنان ساتىپ جاتىر.
توعىز جولدىڭ تورابىندا جاتقان امانقاراعايداعى تەمىرجول تۇيىعىندا تاسكومىردىڭ تونناسى – 18 مىڭ تەڭگە. اۋليەكول, ناۋىرزىم اۋداندارىنا كومىر وسى جەردەن بارادى. ونى جەتكىزىپ بەرەتىن كولىكتەردىڭ قۇنى ءار اۋىلدىڭ الىس-جاقىندىعىنا بايلانىستى. ماسەلەن, امانقاراعايدان 40 شاقىرىم قاشىقتا جاتقان سۇلۋكول اۋىلىنىڭ تۇرعىندارى كومىر جەتكىزىپ بەرگەن كولىك جۇرگىزۋشىسىنە 26 مىڭ تەڭگە ۇستاتادى. ال ناۋىرزىم اۋدانىندا وتىن تاسۋدى كاسىپ ەتكەن جەكە كولىكتەر كومىردىڭ تونناسىن 25 مىڭ تەڭگەدەن ساتىپ ءجۇر.
تورعاي وڭىرىندەگى اعايىن قىسقى وتىنىن جىلدا تىكەلەي شۇباركولدەن جەتكىزىپ الۋشى ەدى. بيىل ول جول جابىلىپ, قازىر ارقالىقتان تاسىپ جاتىر. جانگەلدين, امانگەلدى اۋداندارىندا بىلتىر ءبىر توننا كومىردىڭ قۇنى 19-20 مىڭ تەڭگە ەدى, قازىر 25 مىڭ تەڭگە تۇرادى. امانگەلدىنىڭ جىلۋ بازاسىنداعى ساپالى كومىردىڭ تونناسى – 26 مىڭ تەڭگە.
