اكادەميالىق ادالدىق ليگاسى – ەلىمىزدەگى جوعارى جانە جوعارى وقۋ ورنىنان كەيىنگى ءبىلىم بەرۋ ۇيىمدارىنىڭ بىرلەستىگى. ليگا ەلدەگى ءبىلىم بەرۋ ساپاسىن ىلگەرىلەتۋ جانە دامىتۋ ماقساتىندا وسىدان 5 جىل بۇرىن قۇرىلعان بولاتىن.
ليگا جۇرگىزەتىن جوعارى وقۋ ورىندارىنىڭ رەيتينگىندە تۇلەكتەردىڭ ورتاشا جالاقىسى, جۇمىسقا ورنالاسۋ دەڭگەيى جانە جۇمىس ىزدەۋ ۇزاقتىعى, سونداي-اق تۇلەكتەردىڭ ساراپتامالىق باعاسى مەن مانساپتىق الەۋەتى سياقتى بىرقاتار وبەكتيۆتى كورسەتكىش قامتىلادى. رەيتينگتى انىقتاۋ ءۇشىن عىلىم جانە جوعارى ءبىلىم مينيسترلىگى ۇسىناتىن ۋنيۆەرسيتەتتىك وقۋ باعدارلامالارىنىڭ ساپاسى تۋرالى رەسمي اقپارات پايدالانىلادى. اقپاراتتى «اتامەكەن» ۇلتتىق كاسىپكەرلەر پالاتاسى جيناپ, وڭدەيدى. پالاتا جاۋاپتى مينيسترلىكتىڭ تاپسىرىسى بويىنشا ۋنيۆەرسيتەتتەردىڭ ءبىلىم بەرۋ باعدارلامالارىنىڭ جىل سايىنعى رەيتينگىن جاريالاپ تۇرادى.
عىلىم جانە جوعارى ءبىلىم مينيسترلىگى تاراتقان اقپاراتقا سۇيەنسەك, ليگا جاريالاعان رەيتينگ مىناداي فورمۋلا بويىنشا جۇرگىزىلەدى: ءبىلىم بەرۋ باعدارلامالارى تيىمدىلىگىنىڭ ورتاشا باعاسىنا ءبىلىم بەرۋ باعدارلامالارىنىڭ رەيتينگىندەگى ورنى, باسەكەلەستەر سانى, ءبىلىم بەرۋ باعدارلامالارىنىڭ سانى اسەر ەتەدى. ۋنيۆەرسيتەت پوزيتسيالارىن ەسەپتەۋدىڭ بۇل ءتاسىلى بىرنەشە باعدارلاماسى بار جوعارى وقۋ ورىندارىن دا ءادىل سالىستىرۋعا سەپتەسەدى. رەيتينگتەگى كوشباسشىلار – ءبىلىم بەرۋ باعدارلامالارىنىڭ ورتاشا تيىمدىلىگى باسقا وقۋ ورىندارىمەن سالىستىرعاندا جوعارى ۋنيۆەرسيتەتتەر. رەيتينگ جوعارى وقۋ ورىندارىن ءوز باعدارلامالارىن جەتىلدىرۋگە ىنتالاندىرىپ, تۇلەكتەرىنىڭ ەڭبەك نارىعىنداعى تابىستى بولاشاعىنا قىزىعۋشىلىقتارىن ارتتىرۋ ءۇشىن جۇرگىزىلەدى.
اكادەميالىق ادالدىق ليگاسىنىڭ رەيتينگ ناتيجەسىنە نەگىزدەلە جاسالعان ەلىمىزدىڭ توپ-10 ۋنيۆەرسيتەتى: 1) قازاقستان-بريتان تەحنيكالىق ۋنيۆەرسيتەتى (ورتاشا باعا 91,59%); 2) م.نارىكباەۆ اتىنداعى KAZGUU ۋنيۆەرسيتەتى (91,04%); 3) قازاقستان-نەمىس ۋنيۆەرسيتەتى (84,45%); 4) كيمەپ ۋنيۆەرسيتەتى (84,34%); 5) ع.داۋكەەۆ اتىنداعى الماتى ەنەرگەتيكا جانە بايلانىس ۋنيۆەرسيتەتى (78,20%); 6) حالىقارالىق اقپاراتتىق تەحنولوگيالار ۋنيۆەرسيتەتى (76,61%); 7) ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى (72,75%); 8) ق.ساتباەۆ اتىنداعى ەكىباستۇز ينجەنەرلىك-تەحنيكالىق ينستيتۋتى (70,57%); 9) نارحوز ۋنيۆەرسيتەتى (69,73%); 10) م.قوزىباەۆ اتىنداعى سولتۇستىك قازاقستان ۋنيۆەرسيتەتى (67,75%).
رەيتينگ ناتيجەلەرى اقپاراتتىق-تالدامالىق داشبورد فورماتىندا ۇسىنىلعان. ونىڭ كومەگىمەن تالاپكەر رەيتينگتەگى جوعارى وقۋ ورىندارىنىڭ پوزيتسيالارىمەن تانىسىپ قانا قويماي, سونىمەن قاتار ورتاشا جالاقى, جۇمىسقا ورنالاسۋدىڭ ورتاشا دەڭگەيى جانە تۇلەكتەردىڭ جۇمىس ىزدەۋ ۇزاقتىعى بويىنشا جوعارى وقۋ ورىندارىنىڭ ناقتى ءبىلىم بەرۋ باعدارلامالارىن سالىستىرا الادى. بۇل ۋنيۆەرسيتەت پەن ماماندىقتى تاڭداۋ كەزىندە دۇرىس شەشىمدى قابىلداۋعا كومەكتەسەدى.
